Read Quechua Cuzco Bible 1988 NÚMEROS 25 Bible Online

NÚMEROS 25 - Quechua Cuzco Bible 1988 bible

NÚMEROS 25

¹Israel runakuna Sitimpi tiyashaqtinmi Israel qharikunaqa Moab suyu warmikunawan wasanchayta qallarirqanku.

²Chay warmikunan paykunata waqyarqan diosninkuman sacrificiota haywanankupaq. Hinan Israel runakunaqa paykunawan mikhurqanku, diosninkutataq yupaycharqanku.

³Ahinapin paykunaqa Peor nisqa cheqaspi Baal idolota yupaychayta qallarirqanku. Chaymi Señor Diosqa Israel runakuna contra k'arakta phiñakurqan,

⁴hinaspan Moisesta nirqan: —Israel llaqta llapan umallikunata huñuy, hinaspa ñawpaqeypi sut'i p'unchaypi paykunata wañuchiy. Hinan Israel contra mana phiñakusaqñachu, nispa.

⁵Chaymi Moisesqa Israel juezkunata kamachirqan: — Sapankaykichispa aylluykichispi Peor nisqa cheqaspi Baal idolota yupaychaq qharikunata wañuchiychis, nispa.

⁶Dioswan Tupana Karpa punkupi Israel runakuna huñuykusqa kashaqtintaq, huk Israel qhari Madián warmita karpanman pusasharqan, Moisespas huñuykusqa llapa runakunapas rikushaqtin.

⁷Hinan chayta rikuspa sacerdote Aaronpa churin Eleazarpa churin Fineesqa Israel runakuna huñunasqamanta t'aqarikuspa huk lanzata hap'irqan.

⁸Hinaspa chay Israel runaq qhepanta qatiparqan puñunan karpakama, chaypitaq Israel qharita Madián warmitawan wiksankumanta lanzawan sat'irqorqan. Ahinapin Israel runakunata wañuchishaq millay onqoyqa thanipurqan,

⁹ichaqa ñan iskay chunka tawayoq waranqa runakunaña wañurqorqan.

¹⁰Hinan Señor Diosqa Moisesta nirqan:

¹¹—Eleazarpa churin Fineesmi Israel runakuna contra phiñakuyniyta thanichin, imaynan ñoqaqa paykunamanta wañuyta atini, chhaynallataqmi Fineesqa wañuyta atiwan. Chayraykun ñoqallatapuni yupaychawanankuta munaspapas, Fineespa ruwasqan hawa mana paykunata lliwtachu wañuchini.

¹²Chhaynaqa Fineesta niy: Señor Diosmi nin: Ñoqan qanwan rimanakuni allillan kawsanaykipaq.

¹³Hinallataq qanwan rimanakuni qanpas mirayniykipas wiñaypaq sacerdote kanaykichispaq, ñoqamanta wañuy atiq kaspa Israel runakunata pampachachiwasqaykirayku, nispa, nispayki.

¹⁴Madián warmiwan kuska wañuchisqa qhariqa Salupa churin Zimrin karqan, Saluqa Simeón ayllupi huk familia umallin karqan.

¹⁵Madián warmiq sutintaq Kozbi karqan, paypa taytan Zurqa Madián runakunaq huk ayllunpa umallinmi karqan.

¹⁶Señor Diosmi Moisesta nirqan:

¹⁷—Madián runakunaqa awqankuta hinan q'oturqasunkichis Peor nisqa cheqaspi Baal ídolo yupaychaywan, Madián umalliq ususin Kozbiq qhellichasqanwan. Baalta yupaychasqa hawa millay onqoy chayamuqtinmi chay Kozbiqa lanzawan wañuchisqa karqan. Chayrayku Madián runakunaq chay millay ruwayninkuna hawa phawaykuspa wañuchiychis, nispa.