Read Quechua Cuzco Bible 1988 NÚMEROS 31 Bible Online

NÚMEROS 31 - Quechua Cuzco Bible 1988 bible

NÚMEROS 31

²—Madián runakunata muchuchiy Israel llaqtayta huchallichisqanmanta, chay qhepatataq wañukapunki, nispa.

³Hinan Moisesqa llaqtata nirqan: —Wakinniykichis awqa-tinkuypaq wakichikuychis, hinaspa Madián runakuna muchuchiq phawaykuychis, Señor Dios contra huchallikusqankumanta.

⁴Sapanka ayllumantan waranqa qharikunata awqa-tinkuyman kachankichis, nispa.

⁵Chaymi sapanka ayllumanta akllarqanku waranqa qharikunata, llapanpitaq karqan chunka iskayniyoq waranqa awqa-tinkuypaq wakichisqa qharikuna.

⁶Moisesqa paykunatan awqa-tinkuyman kacharqan, sacerdote Eleazarpa churin Fineestaq umallinku rirqan. Paymi aparqan Dios yupaychana karpapi kaq ch'uya kaqkunata, awqankuman phawaykunankupaq tocana trompetakunatawan.

⁷Hinan paykunaqa Señor Diospa Moisesta kamachisqanman hina Madián runakuna contra maqanakuspa llapan qharikunata wañuchirqanku.

⁸Madián suyu phisqantin reykunatan wañuchirqanku, Evita, Rekimta, Surta, Hurta, Rebatawan. Beorpa churin Balaamtapas wañuchillarqankutaq.

⁹Hinaspa Israel runakunaqa Madián warmikunata wawankutapas presota aparqanku, uywankutapas tukuy kaqninkutapas lliwta qechurqanku.

¹⁰Chaymantataq llapan llaqtankuta karpankutapas lliwta kanaykurqanku.

¹¹Hinaspa llapan llat'anasqankuta uywakunatapas runakunatapas kawsaykunatapas

¹²Moisesman, sacerdote Eleazarman, Israel llaqtamanwan aparqanku, paykunan karpa-karpapi kasharqanku Jericó qhaway Jordán mayu qaylla Moab suyu pampapi.

¹³Moisestaq sacerdote Eleazarpiwan llapan ayllu umallikunapiwan karpa-karpamanta lloqsirqanku awqa-tinkuymanta kutimuq soldadokunata chaskiq.

¹⁴Hinan Moisesqa phiñakurqan waranqa soldado umallikunapaq pachak soldado umallikunapaqwan,

¹⁵nirqantaq: —¿Imanaqtintaq warmikunatari mana wañuchirqankichischu?

¹⁶Chay warmikunan riki Balaampa yuyaychasqan kaspa Israel runakunata Señor Dios contra huchallichirqan, Peor nisqa cheqaspi Baal idolotapas yupaychachirqan. Chay hawan Señor Diosqa llaqtanta millay onqoywan muchuchirqan.

¹⁷Chhaynaqa kunanpacha wañuchiychis llapan qhari wawakunata, qhariwan puñuq llapan warmikunatapas.

¹⁸Doncella sipaskunallata ama wañuchinkichischu, paykunaqa qankunapaqmi kanqa.

¹⁹Hinaspataq hayk'an wañuchiqkuna, wañusqata llamiykuqkunapas karpa-karpamanta sapaqpi qanchis p'unchay qhepakuychis. Hinaspa qankunapas preso apamusqaykichispas ch'uyanchakuychis, kinsakaq p'unchaypiwan qanchiskaq p'unchaypiwan.

²⁰Ch'uyanchakullankichistaq llapan p'achaykichista, qaramanta ruwasqa llapan kaqkunata, cabra millmamanta llapan awasqakunata, k'ullumanta ruwasqa hayk'an kaqkunatapas, nispa.

²¹Hinan sacerdote Eleazarqa awqa-tinkuyman riq llapan soldadokunata nirqan: —Kayqa Señor Diosmi Moisesta khaynata kamachisqa:

²²—Qorimanta, qolqemanta, broncemanta, fierromanta, titimanta otaq estañomanta mana ruphaq kaqkunata llapanta ninaman churaspa ch'uyanchaychis, hinaspa ch'uyanchana unupi maylliychis. Wakin ruphaq kaqkunatataq unuwan limpiota maylliychis.

²³

²⁴Qanchiskaq p'unchaytaq p'achaykichista t'aqsakuychis ch'uya kanaykichispaq. Chay qhepataqa karpa-karpaman haykuyta atinkichismi, nispan, nispa.

²⁵Señor Diosmi Moisesta nirqan:

²⁶—Qanpiwan sacerdote Eleazarpiwan ayllu umallikunapiwan Madián runakunata llat'anaspa apamusqanku runakunata uywakunatawan yupaychis.

²⁷Hinaspa iskayman t'aqaspa rakiychis huk t'aqata maqanakuyman riq soldadokunapaq, hukkaq t'aqatataq wakin Israel runakunapaq.

²⁸Chaymantataq maqanakuyman riq soldadokunaman tupaq runakunamanta, torokunamanta, asnokunamanta, cabrakunamanta, ovejakunamantawan ñoqapaq t'aqapuwankichis sapa phisqa pachakmanta hukta.

²⁹Hinaspan chaykunata sacerdote Eleazarman qonkichis ñoqapaq ofrendata hina.

³⁰Hinallataq Israel runakunaman tupaq runakunamanta, torokunamanta, asnokunamanta, cabrakunamanta, ovejakunamanta, hayk'an kaq animalkunamantawan t'aqankichis sapa phisqa chunkamanta hukta. Hinaspa chaykunata qonkichis Ñoqawan Tupana Karpata qhawaq Leví runakunaman, nispa.

³¹Hinan Moisesqa sacerdote Eleazarpiwan Señor Diospa kamachisqanman hina ruwarqanku.

³²Israel soldadokunaq llat'anasqankumanta llapan qhepaqmi karqan soqta pachak qanchis chunka phisqayoq waranqa ovejantin cabrantin,

³³qanchis chunka iskayniyoq waranqa toro,

³⁴soqta chunka hukniyoq waranqa asno,

³⁵kinsa chunka iskayniyoq waranqa doncella sipaskunapiwan.

³⁶Chaymi soldadokunaman tupaq t'aqa karqan: Kinsa pachak kinsa chunka qanchisniyoq waranqa phisqa pachakniyoq ovejantin cabrantin,

³⁷chaykunamantan qorqanku Señor Diospaq ofrendata hina soqta pachak qanchis chunka phisqayoqta.

³⁸Kinsa chunka soqtayoq waranqa toromantataq Señor Diospaq qorqanku qanchis chunka iskayniyoq torota.

³⁹Kinsa chunka waranqa phisqa pachakniyoq asnomantataq Señor Diospaq qorqanku soqta chunka hukniyoq asnota.

⁴⁰Chunka soqtayoq waranqa doncella sipaskunamantataq Señor Diospaq ofrendata hina qorqanku kinsa chunka iskayniyoq sipaskunata.

⁴¹Hinan Moisesqa Señor Diospaq chay ofrendakunata sacerdote Eleazarman qorqan, Señor Diospa kamachisqanman hina.

⁴²Moisesqa soldadokunaman tupaq chhikallatataqmi Israel runakunapaq t'aqarqan. Chaymi karqan kinsa pachak kinsa chunka qanchisniyoq waranqa phisqa pachakniyoq ovejantin cabrantin,

⁴³

⁴⁴kinsa chunka soqtayoq waranqa toro,

⁴⁵kinsa chunka waranqa phisqa pachakniyoq asno,

⁴⁶chunka soqtayoq waranqa doncella sipaskunapiwan.

⁴⁷Chay runakunamanta uywakunamantan Moisesqa T'aqarqan sapa phisqa chunkamanta hukta, hinaspa Dioswan Tupana Karpata qhawaq Leví runakunaman chaykunata qorqan, Señor Diospa kamachisqanman hina.

⁴⁸Chaymantataq waranqa soldado umallikuna pachak soldado umallikunapiwan Moisesman rirqanku,

⁴⁹hinaspa payta nirqanku: —Ñoqayku kamachiykikunan kamachisqayku soldadokunata watukuyku, manan hukpas wañunkuchu, llapanmi kashanku.

⁵⁰Chaymi Señor Diospaq ofrendata apamushayku sapankaq tarisqayku qori alhajakunata: chipanakunata, makiman walqanakunata, sortijakunata, aretekunata, kunkaman walqanakunatawan. Chaykunatan Señor Diosman haywayku huchaykumanta ch'uyanchasqa kanaykupaq, nispa.

⁵¹Hinan Moisesqa Eleazarpiwan llapan chay qori alhajakunata paykunamanta chaskirqayku.

⁵²Chay umallikunaq ofrenda qosqankun pesarqan yaqa pachak isqon chunkayoq kilo hina.

⁵³Sapanka soldadokunan maqanakuypi awqankumanta imallatapas qechuspa paykunapaq apakurqanku.

⁵⁴Ahinatan Moisesqa Eleazarpiwan umallikunamanta qori alhajakuna apasqankuta chaskirqanku, hinaspa Dioswan Tupana Karpaman aparqanku, Señor Diospa ruwasqankunata Israel runakuna yuyarishanallanpaq.