Read Quechua Cuzco Bible 1988 NÚMEROS 35 Bible Online

NÚMEROS 35 - Quechua Cuzco Bible 1988 bible

NÚMEROS 35

¹Jericó qhaway Jordán mayu qaylla Moab pampapin Señor Diosqa Moisesta nirqan:

²—Israel runakunata kamachiy hap'ikapusqanku suyupi llaqtakunata muyuriqninpi uywa michina campokunatawan Leví runakunaman qonankupaq.

³Chay llaqtakunapin Leví runakuna tiyanqaku, uywa michina campokunapitaq llapan uywakunata michinqaku.

⁴Uywa michina campokunaqa llaqta muyuriq perqa qhepamanta hawa ladoman tawa pachak phisqa chunkayoq metron kanqa.

⁵Chay uywa michinan tawa ladoyoq kanqa, sapanka ladotaq sayaypura isqon pachak metrokama kanqa. Llaqtataq chay uywa michina campo chawpipi kanqa.

⁶Leví runakunaman qonqaku chay llaqtakunamantan pakakuna llaqtaqa soqta kanqa, chaypin pakakunman runamasinta wañuchiq mayqen runapas. Chaymantapas qollanqakutaq tawa chunka iskayniyoq llaqtakunata.

⁷Chaymi Leví runakunaman llapanpi qonqaku tawa chunka pusaqniyoq llaqtakunata uywa michina campoyoqtakama.

⁸Israel runakunaq hap'ikapusqan suyupi llaqtakunata Leví runakunaman qoqtinkuqa, sapanka ayllun qonqa may chhikachus hallp'a tupasqanman hina, hatun hallp'akunamantaqa askha llaqtakunatan qonqaku, huch'uy hallp'akunamantataq pisi llaqtakunata qonqaku, nispa.

⁹Señor Diosmi Moisesta nirqan:

¹⁰—Israel runakunata niy: Canaán suyuman haykunaykichispaq Jordán mayuta chimpaspaykichisqa,

¹¹wakin llaqtakunata pakakuna llaqta kananpaq akllankichis, runamasinta mana yuyaypichu wañuchiq runa chaypi pakakunanpaq.

¹²Chaypin qespikunqa wañuqpa vengakuq ayllun payta wañuchinanmanta, manataq wañunqachu chay llaqta runakunaq huñunakuyninpi t'aqtasqa kanankama.

¹³Qosqaykichis llaqtakunamantan pakakunapaq soqta llaqta kanqa.

¹⁴Kinsa llaqtakuna kanqa Jordán mayu inti lloqsimuy ladopi, kinsa llaqtakunataq Canaán suyupi kanqa.

¹⁵Chay soqtantin llaqtakunan kanqa pakakuna llaqtakuna Israel runakunapaq, hinallataq qankunawan tiyaq otaq purikuqlla wak llaqtayoq runakunapaqpas. Chay llaqtakunapin pakakunqaku runamasinta mana yuyaypichu wañuchiq runakuna.

¹⁶Pipas runamasinta fierrowan takarqonman, hinataq chay takasqa runa wañunman chayqa, takaq runaqa runa wañuchiqmi, chayrayku payqa wañunanpaq huchachasqa kanqa.

¹⁷Pipas runamasinta rumiwan takarqonman, hinataq chay takasqa runa wañunman chayqa, takaq runaqa runa wañuchiqmi, chayraykun payqa wañunanpaq huchachasqa kanqa.

¹⁸Pipas runamasinta k'ulluwan takarqonman, hinataq chay takasqa runa wañunman chayqa, takaq runaqa runa wañuchiqmi, chayraykun payqa wañunanpaq huchachasqa kanqa.

¹⁹Wañuqpa vengakuq ayllunmi chay wañuchiq runataqa wañuchinanpuni, chaymi maypichus tupasqanpi wañuchinqa.

²⁰Pipas runamasinta cheqnikuspa tanqarparinman otaq mana allinta yuyaykuspa imawanpas waqtarqonman,

²¹mana chayqa cheqnikuspapas makinwan k'irinman, hinataq chay k'irisqa runa wañunman chayqa, k'iriq runaqa runa wañuchiqmi, chayraykun payqa wañunanpaq huchachasqa kanqa. Wañuqpa vengakuq ayllunmi chay wañuchiq runataqa tupaspan wañuchinqa.

²²Huk runa runamasinta mana cheqnikushaspa qonqay tanqarparinman, otaq mana yuyaypichu imawanpas qonqay chanqarqonman,

²³otaq mana rikushaspa rumiwanpas qonqay kachaykunman, mana awqan kashaspa, mana k'iriyta munashaspa, hinataq chay runamasin wañunman chayqa,

²⁴huñuykusqa runan t'aqtanqa wañuchiq runatawan wañuqpa vengakuq ayllun runatawan kay kamachikuyman hina.

²⁵Huñuykusqa runaqa waqaychanqan mana yuyaypichu wañuchiq runataqa wañuqpa vengakuq ayllun payta wañurqochinanmanta, chaymi kutichipunqaku mayqen llaqtapichus pakakusharqan chay kikin llaqtaman. Hinan chay wañuchiq runaqa pakakusqan llaqtapi qhepakunqa ch'uya aceitewan hawisqa uma sacerdote wañukapunankama.

²⁶Chay runa pakakuna llaqtamanta karunchanqa chayqa,

²⁷wañuqpa vengakuq ayllunmi llaqta hawapi tupaspa payta wañuchinman, wañuchisqanmantaqa manataqmi huchachasqachu kanqa.

²⁸Chayraykun payqa pakakuna llaqtapi qhepakunqa uma sacerdote wañukapunankama. Chay qhepatan ichaqa wasinman kutipunman.

²⁹Chay unanchaykunan qankunapaqpas mirayniykichispaqpas kikin kamachikuylla kanqa maypiña tiyaqtiykichispas.

³⁰Runa wañuchiqqa iskay kinsa testigoq rimarisqanwanmi wañuchinapaq huchachasqa kanqa. Ch'ulla testigoq rimarisqallanwanqa manan pitapas wañuchinapaq huchachayta atiwaqchischu.

³¹Huk runa wañuchiq wañunanpaq huchachasqa kashaspa, mana wañunanpaq qolqeta pagayta munaqtinqa, aman chaskinkichischu. Chay runa wañuchiqqa wañuchisqapunin kanqa.

³²Hinallataq runa wañuchiq pakakuna llaqtapi pakakushaspa manaraq uma sacerdote wañushaqtin, wasinta kutipuyta munaspa qolqeta pagayta munaqtinqa, aman chaskinkichischu.

³³Tiyanaykichis suyutaqa aman runa wañuchiykunawan qhellichankichischu. Runa wañuchiyqa suyutan qhellichan, chay qhellichayqa manan imawanpas ch'uyanchakunmanchu, aswanpas kikin wañuchiq runaq wañusqallanwanmi.

³⁴Ñoqa Señor Diosmi qankuna ukhupi tiyani, chaymi tiyanaykichis suyutaqa ama qhellichankichischu, nispayki, nispa.