Read Quechua Cuzco Bible 1988 NÚMEROS 4 Bible Online

NÚMEROS 4 - Quechua Cuzco Bible 1988 bible

NÚMEROS 4

¹Señor Diosmi Moisesta Aarontawan nirqan:

²—Leví ayllu Kohatpa miraynin runakunata yupaychis ayllunkuman hina, familiankuman hina.

³Ñoqawan Tupana Karpapi llank'ay atiq qharikunata yupankichis kinsa chunka watayoqmanta phisqa chunka watayoqkama.

⁴Paykunan Ch'uya Cheqaspi kaqkunata waqaychaypi llank'anqaku.

⁵Israel runakuna huk cheqasman astakuspa puririqtinmi, Aaronqa churinkunapiwan karpapi Ch'uyay-Ch'uya Cheqasta t'aqaq cortinata horqonqaku, hinaspa chay cortinawan rimanakuy cajata qatanqaku.

⁶Chay patamantaq llamp'uy-llamp'u qarakunata churanqaku, hinaspa sani-puka awasqawan qataykuspa wantuna k'aspikunata churanqaku.

⁷Hinallataq ñawpaqeypi t'anta churana mesatapas sani-puka awasqawan qatanqaku, hinaspataq chay pataman churanqaku p'ukukunata, pocillokunata, qerukunata, vino ofrendapaq p'uyñukunata, mesaman mana p'itiy churana t'antatawan.

⁸Llapan chaykuna patamanmi rawraq-puka awasqawan qatanqaku, hinaspa llamp'uy-llamp'u qarawan pakaykuspa wantuna k'aspinkunata churanqaku.

⁹Chaymantataq huk sani-puka awasqawan qatanqaku candelerota, lamparachakunata, pábilo allichanakunata, uspha p'ukukunata, aceite churana llapan p'uyñukunatawan.

¹⁰Llapan chaykunata llamp'uy-llamp'u qarakunawan p'istunqaku, hinaspa wantuna k'aspi pataman churanqaku apanapaq.

¹¹Qori altar patamanpas sani-puka awasqata mast'anqaku, chay patamantaq llamp'uy-llamp'u qarakunawan p'istunqaku, hinaspa wantuna k'aspikunata churanqaku.

¹²Chaymanmi Ch'uya Cheqaspi kaq llapan serviciokunata huñunqaku, hinaspa sani-puka awasqapi p'istuspa llamp'uy-llamp'u qarakunawan p'istunqaku, chaytataq wantuna k'aspi pataman apanapaq churanqaku.

¹³Altarpi kaq usphata wiratawan pichanqaku, hinaspa altarta sani-puka awasqawan qatanqaku.

¹⁴Chay patamantaq churanqaku altarpi haywanapaq kaq serviciokunata: —sansa churanakunata, trinchekunata, lampakunata, puruñakunatawan. Llapan chaykunatan llamp'uy-llamp'u qarakunawan qatanqaku, hinaspa wantuna k'aspikunata churanqaku apanapaq.

¹⁵Yupaychanapaq t'aqasqa hayk'an kaqta llapan serviciokunatawan Aaronqa churinkunapiwan qatayta tukuqtinku, llapa runakuna puririnanpaq hina kashaqtintaq, Kohatpa mirayninkuna rinqaku tukuy chaykunata apanankupaq. Ichaqa manan ch'uya kaqkunataqa llaminqakuchu, ama wañunankupaq. Ñoqawan Tupana Karpapi tukuy kaqkunataqa paykunan astanqaku.

¹⁶Sacerdote Aaronpa churin Eleazartaq makilla qhawanqa candeleroq aceitenta, sumaq q'apaq inciensota, sapa p'unchay haywana ruru ofrendakunata, hawina aceiteta ima. Hinallataq paypa cuentanpi kanqa Ñoqawan Tupana Karpa, chaypi tukuy kaqkuna, llapan ch'uya kaqkuna, serviciokuna ima, nispa.

¹⁷Señor Diosmi Moisesta Aarontawan nirqan:

¹⁸—Paqtataq Kohatpa ayllun Leví ayllukuna ukhumanta ch'usaqyanman.

¹⁹Ch'uya kaqkunaman qayllaykuspaqa wañunkumanmi, chhaynaqa ama wañunankupaq kay hinata ruwankichis: —Ch'uya Cheqasman haykuspanmi Aaronqa churinkunapiwan Kohat ayllu runakunaman willanqa imatachus llank'anankuta, imatachus apanankutapas.

²⁰Paykunaqa haykuspa ch'uya kaqkunata huk ratolla rikunkuman chaypas, wañunkumanmi, nispa.

²¹Señor Diosmi Moisesta nirqan:

²²—Gersonpa miraynintapas yupallaytaq ayllunkuman hina familiankuman hina,

²³Ñoqawan Tupana Karpapi llank'ay atiq qharikunata yupay kinsa chunka watayoqmanta phisqa chunka watayoqkama.

²⁴Paykuna kaykunata apaspa llank'anqaku:

²⁵—karpata, karpa cortinakunata, karpaq patan qatasqa llamp'uy-llamp'u qarakunata, karpa punku cortinata,

²⁶karpa kancha muyuriq cortinakunata, karpa kancha punku cortinata, hap'ichina waskhakunata, hayk'an kaq serviciokunata, herramientakunatawan.

²⁷Aaronmi churinkunapiwan Gersonpa mirayninkunata kamachinqa llank'ananku kaqkunapi astananku kaqkunapiwan. Paykunamanqa qanmi imatachus apanankuta sut'ita rikuchinki.

²⁸Chaykunan Ñoqawan Tupana Karpapi Gersonpa miraynin ayllukunaq llank'anan kanqa, kamachiqninkutaq Aaronpa churin Itamar kanqa.

²⁹Merariq mirayninkunatapas yupallaytaq ayllunkuman hina familiankuman hina.

³⁰Ñoqawan Tupana Karpapi llank'ay atiq qharikunata yupay kinsa chunka watayoqmanta phisqa chunka watayoqkama.

³¹Karpapi llank'anankupas astanankupas kaykuna kanqa: —karpa marcokuna, sayaq k'aspikuna, suskhuq k'aspikuna, k'aspipaq sayanakuna,

³²karpa kancha muyuriq sayaq k'aspikuna, k'aspipaq sayanakuna, takarpukuna, waskhakuna, hayk'an kaq serviciokuna, herramientakuna ima. Qantaq sapankaman sut'ita rikuchinki imakunatachus apanankuta.

³³Chaykunan Ñoqawan Tupana Karpapi Merariq miraynin ayllukunaq llank'anan kanqa, kamachiqninkutaq Aaronpa churin Itamar kanqa, nispa.

³⁴Chaymi Moisesqa Aaronpiwan llaqta umallikunapiwan Kohatpa mirayninta ayllunkuman hina familiankuman hina yuparqanku.

³⁵Hinan Dioswan Tupana Karpapi llank'ay atiq qharikuna kinsa chunka watayoqmanta phisqa chunka watayoqkama

³⁶iskay waranqa qanchis pachak phisqa chunkayoq karqan.

³⁷Kohatpa mirayninkunan chay chhika karqan, Señor Diospa Moisesta kamachisqanman hina Moisespiwan Aaronpiwan paykunata yupaqtinku.

³⁸Gersonpa mirayninmi ayllunkuman hina familiankuman hina yupasqa karqan.

³⁹Dioswan Tupana Karpapi llank'ay atiq qharikunataq kinsa chunka watayoqmanta phisqa chunka watayoqkama

⁴⁰iskay waranqa soqta pachak kinsa chunkayoq karqan.

⁴¹Gersonpa mirayninkunan chay chhika karqan, Señor Diospa kamachisqanman hina Moisespiwan Aaronpiwan paykunata yupaqtinku.

⁴²Merariq mirayninmi ayllunkuman hina familiankuman hina yupasqa karqan.

⁴³Dioswan Tupana Karpapi llank'ay atiq qharikunataq kinsa chunka watayoqmanta phisqa chunka watayoqkama

⁴⁴kinsa waranqa iskay pachakniyoq karqan.

⁴⁵Merariq mirayninkunan chay chhika karqan Señor Diospa Moisesta kamachisqanman hina Moisespiwan Aaronpiwan paykunata yupaqtinku.

⁴⁶Ahinatan llapan Leví ayllu runakunata ayllunkuman hina familiankuman hina yuparqanku Moisespiwan Aaronpiwan Israel umallikunapiwan.

⁴⁷Dioswan Tupana Karpapi llank'ay atiq q'epiy atiq qharikuna kinsa chunka watayoqmanta phisqa chunka watayoqkama

⁴⁸pusaq waranqa phisqa pachak pusaq chunkayoq karqan.

⁴⁹Chay runakunan yupasqa karqan Señor Diospa Moisesta kamachisqanman hina. Chaymantataq Moisesqa sapankaman imatachus llank'anankuta apanankutapas sut'ita rikuchirqan, Señor Diospa payta kamachisqanman hina.