Read Quechua Cuzco Bible 1988 NÚMEROS 5 Bible Online

NÚMEROS 5 - Quechua Cuzco Bible 1988 bible

NÚMEROS 5

¹Señor Diosmi Moisesta nirqan:

²—Israel runakunata kamachiy llapan aycha qarapi millay onqoyniyoq runakunata, q'eya hisp'aq runakunata, wañusqata llamispa qhellichakuq runakunatapas karpa-karpa chawpimanta hawaman wikch'unankupaq.

³Warmipas qharipas kachun karpa-karpa chawpimanta hawaman wikch'uchunku. Ahinapin karpa-karpata mana qhellichanqakuchu, ñoqa paykuna chawpipi tiyasqayrayku, nispa.

⁴Hinan Israel runakunaqa Señor Diospa Moisesta kamachisqanta kasukuspanku llapan qhelli kaq runakunata karpa-karpa chawpimanta hawaman wikch'urqanku.

⁵Señor Diosmi Moisesta nirqan:

⁶—Israel runakunata kamachiy: Mayqen qharipas otaq warmipas Señor Diosta mana kasukuq kaspa runamasinta ima mana allintapas ruwan chayqa, huchachakunmi.

⁷Chaymi chay huchanta willakunqa, hinaspa runamasinta mana allin ruwasqanmanta pagapunqa, may chhikachus huchallikuspa ruwasqan kasqanman hina, chaymantaq phisqamanta hukninta yapaykuspa pagapunqa.

⁸Mayqen runamanchus pagapunan karqan chay runa wañukapunman, manataq qaylla ayllunpas kanmanchu pagapunanpaq chayqa, pagapunanpaq t'aqasqanqa Señor Diospaqmi kapunqa, chaytataq sacerdotekunaman qonqa, chay huchata pampachananpaq anejota sacrificiopi haywananqa sapaqmi kanqa.

⁹Israel runakunaq Señor Diospaq t'aqasqan llapan qokuykunatapas sacerdotekunamanmi apanqaku, sacerdotekunapaqtaq kanqapas.

¹⁰Señor Diospaq tukuy t'aqasqa ofrendakunata sacerdotekunaman apasqankuqa sacerdotekunapaqmi kanqa, nispayki, nispa.

¹¹Señor Diosmi Moisesta nirqan:

¹²—Israel runakunata kamachiy: Mayqen warmipas qosanta wasanchaspa

¹³wak qhariwan puñukunmanmi, qosantaq qhellichakusqanta mana yachanmanchu pakallapi huchallikusqanrayku mana pipas hap'isqanrayku. Chay hinatapuni warmi ruwaqtin, qosan celosakuspa payta tumpanman chayqa, sacerdotemanmi pusanqa. Hinallataq warmi mana wasanchashaqtin, qosan celosakuspa payta tumpanman chaypas, sacerdotemanmi pusanqa mayqenña kaqtinpas, warminta sacerdoteman pusaspaqa, huk kilo cebada hak'u ofrendatawanmi apanqa. Chay ofrendaqa huchata sut'inchanapaq celosakuqpa ofrendanmi, chayraykun chay ofrendamanqa mana aceitetapas inciensotapas hich'aykunqachu.

¹⁶Sacerdotetaq chay warmita pusaspa Señor Diospa ñawpaqenman qayllaykachinqa.

¹⁷Chaymantataq sacerdoteqa k'arpa qerupi ch'uya unuta wisinqa, hinaspa yupaychana karpaq pampanpi kaq ñut'u hallp'ata hoqarispa qerupi ch'uya unuman hach'iykunqa.

¹⁸Hinaspataq chukcha watakusqanta kacharparinqa, huchata sut'inchanapaq ofrendatataq makinman hap'iykachinqa. Sacerdotetaq hap'inqa ñakaypaq haya unuta,

¹⁹hinaspan payqa warmita jurachispa ninqa: Wak qhariwan mana puñukurqankichu, manataq qosaykitapas wasancharqankichu, manallataq qhellichakurqankipaschu wak qhariwan huchallikuspayki chayqa, manan imanasunkipaschu ñakaypaq kay haya unuqa.

²⁰Ichaqa qosaykita wasanchaspa wak qhariwan puñukurqanki, ahinapi huchallikuspataq qhellichakurqanki chayqa,

²¹Señor Diosmi llaqtayki runakuna ukhupi ñakasqa kasqaykita sut'inchanqa, sulluylla-sulluqmi kanki manañataq wachakunkichu.

²²Chhaynaqa kay unu ukyasqaykin sulluchisunki, mana wachakuqtataq ruwasunki, nispa. Hinan warmiqa kutichinqa: Ahinapuni kachun, nispa.

²³Sacerdotetaq chay ñakayta huk k'uyupi qelqanqa, chay qelqatataq haya unuwan qeruman maylliykunqa.

²⁴Wiksanpi hayayta qallariq unuta manaraq warmiman ukyachishaspataq,

²⁵celosakuy ofrendata warmiq makinmanta chaskinqa Señor Diospaq t'aqananpaq, chaymantataq altarman apanqa.

²⁶Hinaspa huk hapt'ay celosakuy ofrendatawan churaykuspa altarpi ruphachinqa llapallan Señor Diosman apamusqa kasqanta rikuchinapaq. Chaymantataq ñakaypaq haya unuta warmiman sacerdote ukyachinqa,

²⁷cheqaqtapuni qosanta wasanchaqtintaq chay unuqa warmiq ukhunta hayanqa, hinan sulluylla-sulluq kapunqa, manañataq wachakunqachu. Chaymi warmiqa llaqtan ukhupi ñakasqa kanqa.

²⁸Manataq chay warmi huchallikurqanchu chayqa, manan imapas kanqachu, aswanpas wachakushallanqapunin.

²⁹Mayqen warmipas qosanta wasanchaqtin qosan celosakuspa payta tumpanqa chayqa, chay kamachikuyman hinan ruwanqaku. Qosanqa Señor Diospa ñawpaqenmanmi warminta pusanqa, hinan sacerdoteqa chay kamachikuyman hina warmita ruwanqa.

³¹Qosanqa manan huchachasqachu kanqa, warmin ichaqa cheqaqtapuni wasanchaspaqa muchuchisqa kanqa, nispayki, nispa.