Read Quechua Cuzco Bible 1988 NÚMEROS 6 Bible Online

NÚMEROS 6 - Quechua Cuzco Bible 1988 bible

NÚMEROS 6

¹Señor Diosmi Moisesta nirqan:

²—Israel runakunata niy: Huk qharipas warmipas Señor Diospaq t'aqasqa[1] kananpaq prometekuspa Señor Diosman sapaqchakunqa chayqa,

³manan ukyanqachu vinotapas cervezatapas, uvasmanta ch'irwasqa ima ukyanatapas. Manallataq mikhunqachu huq'o uvastapas ch'aki uvastapas.

⁴Señor Diospaq t'aqasqa kashasqan tiempopiqa manan uvas yuramanta chhikantapas mikhunqachu, manallataq muhuntapas ch'illpintapas mikhunqachu.

⁵Chukchantapas manan rutuchikunqachu, aswanpas hinallatan wiñachikunqa. Señor Diospaq t'aqasqa kashasqan tiempopiqa ch'uyan kanqa.

⁶Chukchanqa Señor Diospaq t'aqasqa kasqantan sut'inchan, chaymi chay tiempopiqa mana ayaman qayllaykunqachu. Manapunin taytanña mamanña wawqenña pananña wañusqa kashaqtinpas qayllaykunqachu, ama qhellichasqa kananpaq.

⁸Prometekusqan tiempo lliw hunt'akunankamaqa Señor Diospaq ch'uyan kanqa.

⁹Paypa qayllanpi pipas qonqay wañuqtin Señor Diospaq t'aqasqa-kayninta rikuchiq chukchanta qhellichanqa chayqa, qanchis p'unchay qhepatan chukchanta rutuchikunqa, hinaspa ch'uya kapunqa.

¹⁰Pusaqkaq p'unchaypitaq Dioswan Tupana Karpa punkupi kaq sacerdoteman apanqa iskay kullkuta, mana chayqa iskay malqo urpitapas.

¹¹Hinan sacerdoteqa haywanqa hukkaqta hucha pampachay sacrificiota, hukkaqtataq ruphachina sacrificiota, ahinapi ayata llamiykuspa qhellichakusqanmanta ch'uya kapunanpaq. Chay kikin p'unchaymi wakmanta chukchanta Señor Diospaq t'aqanqa,

¹²hinaspa Señor Diospaq t'aqasqa prometekusqan tiempota wakmanta qallarinqa, ñawpaq ruwasqanqa manan valepunchu qhellichakapusqan hawa. Chaymantataq Señor Diosman haywachinqa watayoq borregota kutichipuy sacrificiopaq.

¹³Señor Diosman t'aqakusqan tiempo hunt'akuqtintaq chay runaqa Dioswan Tupana Karpa punkuman rinqa,

¹⁴hinaspa Señor Diosman haywachinqa watayoq mana imanasqa borregota ruphachina sacrificiota, watayoq mana imanasqa ovejata hucha pampachay sacrificiota, mana imanasqa anejotataq sumaq kawsay sacrificiota.

¹⁵Sapanka sacrificiota haywachinqa ruru ofrendantinta vino ofrendantinta. Hinallataq chaywan kuskata huk canastapi mana qonchuyoq t'antata aceitetawan llusisqa llaphllay-llaphlla t'antata sacerdoteman apanqa. Chay t'antaqa ñut'u hak'umanta aceitewan chapuspa ruwasqan kanqa.

¹⁶Hinan sacerdoteqa Señor Diosman haywanqa hucha pampachay sacrificiota, ruphachina sacrificiota,

¹⁷sumaq kawsay sacrificiotawan sapankata ruru ofrendantinta vino ofrendantintakama. Haywallanqataq canastapi kaq mana qonchuyoq t'antatapas.

¹⁸Señor Diospaq t'aqasqa runaqa Dioswan Tupana Karpa punkupin chukchanta rutuchikunqa, hinaspa chay t'aqasqa chukchan rutuchikusqanta sumaq kawsay sacrificiota ruphashaq ninaman wikch'uykunqa.

¹⁹Chaymantataq sacerdoteqa chayasqaña kaqtin anejo qharminta hap'inqa canastapi mana qonchuyoq huk t'antatawan, mana qonchuyoq huk llaphllay-llaphlla t'antatawan, hinaspa Señor Diospaq t'aqasqa runaman llapanta qonqa chukchanta rutuchikusqan qhepataña.

²⁰Sacerdotetaq llapan chaykunata Señor Diosman sumaq sonqota apanqa. Chaykunaqa ancha ch'uyan, sacerdotemanmi tupan imaynan sumaq kawsay ofrendamanta pechonpas phakanpas tupan hinata. Chay qhepataqa Señor Diospaq t'aqasqa runaqa vinota ukyanmanmi.

²¹Chaymi kamachikuy kanqa Señor Diospaq t'aqasqa kananpaq prometekuq runapaq. Haywanan kaq ofrendakunamantapas wak ofrendakunata haywananpaq prometekunman chayqa, allinmi. Ichaqa lliw prometekusqantaqa hunt'anqapunin, nispayki, nispa.

²²Señor Diosmi Moisesta nirqan:

²³—Aaronta churinkunatawan kamachiy Israel runakunata khaynata saminchanankupaq:

²⁴Señor Diosmi saminchasunkipas waqaychasunkipas,

²⁵Señor Diosmi sumaqta qhawarisunkipas khuyapayasunkipas,

²⁶Señor Diosmi wañuyta atisunkipas, sumaq kawsaytataq qosunkipas, nispa.

²⁷Sacerdotekunan Israel runakunata sutiywan saminchanqaku, ñoqataq paykunata saminchasaq, nispa.