Read Quechua Cuzco Bible 1988 NÚMEROS 7 Bible Online

NÚMEROS 7 - Quechua Cuzco Bible 1988 bible

NÚMEROS 7

¹Dioswan Tupana Karpata sayarichiyta tukuspanmi Moisesqa aceiteta karpaman hich'aykuspa sapaqcharqan chaypi kashaq serviciokunantinta, hinallataq altartapas serviciokunantinta.

²Chaymantataq runa yupayta yanapaq ayllu umallikuna

³Señor Diosman ofrendankuta apaspa qorqanku toldosqa soqta carretakunata, chunka iskayniyoq torokunatawan. Chay umallikunaqa iskay-iskaymantan carretata qorqanku, torotataq ichaqa sapanka huktakama qorqanku. Llapan chaykunatan Dioswan Tupana Karpaq ñawpaqenman churarqanku.

⁴Hinan Señor Diosqa Moisesta nirqan:

⁵—Chaskiy chay carretakunata torokunatapas Ñoqawan Tupana Karpapi llank'aq Leví runakunapaq, hinaspa paykunaman chaykunata qonki imapichus sapanka llank'ashanku chayman hina, nispa.

⁶Chaymi Moisesqa carretakunatapas torokunatapas chaskirqan, hinaspa Leví runakunaman rakirqan.

⁷Gersonpa mirayninmanmi qorqan iskay carretata tawa torotawan, llank'anankupaq necesitasqankuman hina.

⁸Aaronpa churin Itamarpa kamachisqan Merariq mirayninmantaq qorqan tawa carretata pusaq torotawan, llank'anankupaq necesitasqankuman hina.

⁹Kohatpa mirayninmantaq ichaqa mana qorqanchu carretatapas torotapas, ch'uya kaqkunata rikrankupi apananku kasqanrayku.

¹⁰Altarta Señor Diospaq sapaqchashaqtinmi ayllu umallikunaqa ofrendankuta aparqanku, hinaspa altarpa ñawpaqenman churarqanku.

¹¹Hinan Señor Diosqa Moisesta nirqan: —Sapa p'unchaymi huk ayllu umalli ofrendanta apanqa altarta sapaqchanapaq, nispa.

¹²Chaymi ñawpaqkaq p'unchay Judá ayllumanta Aminadabpa churin Naasonqa ofrendanta aparqan.

¹³Paypa ofrendanmi karqan huk qolqe puruña, chaymi pesarqan huk kilo kuskanninta, huk qolqe p'uku, chaytaq pesarqan kuskan kilo yaparisqata, Dioswan Tupana Karpapi chanin pesanaman hina. Ñut'u hak'uwan aceitewan pitusqawanmi puruñapas p'ukupas hunt'a karqan.

¹⁴Pachak gramo hina pesaq qori pocillon hunt'a inciensoyoq karqan.

¹⁵Hinallataq huk torillo, huk anejo, watayoq huk borrego ruphachina sacrificiopaq,

¹⁶huk orqo cabra hucha pampachay sacrificiopaq,

¹⁷iskay toro, phisqa oveja, phisqa orqo cabra, watayoq phisqa borregotaq sumaq kawsay sacrificiopaq karqan.

¹⁸Iskaykaq p'unchaytaq Isakar aylluq umallin Zuarpa churin Natanael ofrendanta aparqan,

¹⁹paypa ofrendanmi karqan Naasonpa ofrendan kikillantaq.

²⁴Kinsakaq p'unchaytaq Zabulón aylluq umallin Helonpa churin Eliab ofrendanta aparqan,

²⁵paypa ofrendanpas Naasonpa ofrendan kikillantaqmi karqan.

³⁰Tawakaq p'unchaytaq Rubén aylluq umallin Sedeurpa churin Elisur ofrendanta aparqan,

³¹paypa ofrendanpas Naasonpa ofrendan kikillantaqmi karqan.

³⁶Phisqakaq p'unchaytaq Simeón aylluq umallin Zurisadaipa churin Selumiel ofrendanta aparqan,

³⁷paypa ofrendanpas Naasonpa ofrendan kikillantaqmi karqan.

⁴²Soqtakaq p'unchaytaq Gad aylluq umallin Reuelpa churin Eliasaf ofrendanta aparqan,

⁴³paypa ofrendanpas Naasonpa ofrendan kikillantaqmi karqan.

⁴⁸Qanchiskaq p'unchaytaq Efraín aylluq umallin Amiudpa churin Elisama ofrendanta aparqan,

⁴⁹paypa ofrendanpas Naasonpa ofrendan kikillantaqmi karqan.

⁵⁴Pusaqkaq p'unchaytaq Manasés aylluq umallin Pedasurpa churin Gamaliel ofrendanta aparqan,

⁵⁵paypa ofrendanpas Naasonpa ofrendan kikillantaqmi karqan.

⁶⁰Isqonkaq p'unchaytaq Benjamín aylluq umallin Gedeoniq churin Abidán ofrendanta aparqan,

⁶¹paypa ofrendanpas Naasonpa ofrendan kikillantaqmi karqan.

⁶⁶Chunkakaq p'unchaytaq Dan aylluq umallin Amisaipa churin Ahiezer ofrendanta aparqan,

⁶⁷paypa ofrendanpas Naasonpa ofrendan kikillantaqmi karqan.

⁷²Chunka hukniyoqkaq p'unchaytaq Aser aylluq umallin Okranpa churin Pagiel ofrendanta aparqan,

⁷³paypa ofrendanpas Naasonpa ofrendan kikillantaqmi karqan.

⁷⁸Chunka iskayniyoqkaq p'unchaytaq Neftalí aylluq umallin Enanpa churin Ahira ofrendanta aparqan,

⁷⁹paypa ofrendanpas Naasonpa ofrendan kikillantaqmi karqan.

⁸⁴Chhaynatan Israel ayllu umallikunaqa altarta sapaqchashaqtinku ofrendankuta aparqanku chunka iskayniyoq qolqe puruñakunata, chunka iskayniyoq qolqe p'ukukunata, chunka iskayniyoq qori pocillokunatawan.

⁸⁵Sapanka qolqe puruñan pesarqan huk kilo kuskanninta hina, sapanka p'ukutaq pesarqan kuskan kilo yaparisqata. Llapan qolqe puruñakuna llapan qolqe p'ukukuna iskay chunka pusaqniyoq kilota hina pesarqan, Dioswan Tupana Karpapi chanin pesanaman hina.

⁸⁶Chunka iskayniyoq qori pocillokunataq hunt'a inciensoyoqkama karqan, chaykunan sapanka pesarqan pachak gramota hina Dioswan Tupana Karpapi chanin pesanaman hina. Llapan qori pocillokunan pesarqan huk kilo kuskanninta hina.

⁸⁷Ruphachina sacrificiopaq uywakunan llapan karqan chunka iskayniyoq torillokuna, chunka iskayniyoq ovejakuna, watayoq borregokuna chunka iskayniyoq, sapanka t'aqa uywakuna ruru ofrendantinkama. Hucha pampachay sacrificiopaqtaq chunka iskayniyoq orqo cabrakuna karqan.

⁸⁸Sumaq kawsay sacrificiopaq uywakunataq llapan karqan iskay chunka tawayoq torillo, soqta chunka oveja, soqta chunka orqo cabra, watayoq borregotaq soqta chunka. Chaykunan karqan aceitewan hich'aykusqaña altarta sapaqchanapaq ofrendakuna.

⁸⁹Moisesmi Dioswan Tupana Karpata haykurqan Señor Dioswan rimaq, hinaspan Señor Diospa kunkanta uyarirqan rimanakuy cajaq patanpi kashaq iskay raphrayoqkunaq chawpinmanta.