Read Quechua Cuzco Bible 1988 NÚMEROS 9 Bible Online

NÚMEROS 9 - Quechua Cuzco Bible 1988 bible

NÚMEROS 9

¹Egipto suyumanta Israel runakunaq lloqsimusqan iskaykaq wata qallariy killapin Señor Diosqa Sinaí ch'inneqpi Moisesta nirqan:

²—Israel runakunaqa kay killaq chunka tawayoq p'unchay ch'isintan Alqaspa Pasarpariy Fiestata ruwanqaku imaynatachus kamachirqaykichis chay fiestata ruwanapaq chayman hina, nispa.

⁴Hinan Moisesqa Israel runakunata kamachirqan Alqaspa Pasarpariy Fiestata ruwanankupaq.

⁵Chaymi Israel runakunaqa chay killaq chunka tawayoq p'unchay ch'isinta Sinaí ch'inneqpi Alqaspa Pasarpariy Fiestata ruwarqanku, Señor Diospa Moisesta kamachisqanman hina lliwta ruwaspanku.

⁶Ichaqa wakin qharikunan Alqaspa Pasarpariy Fiestata chay p'unchay mana ruwarqankuchu, ayata llamispanku qhelli kasqankurayku. Hinan paykunaqa Moisesman Aaronmanwan chay kikin p'unchay rispa

⁷Moisesta nirqanku: —Ñoqaykun ayata llamirqayku chaymi qhelli kashayku, ¿hark'asqachu kasaqku unanchasqa p'unchaypi wakin Israel runakunawan kuska Señor Diosman ofrendata haywanaykumanta? nispa.

⁸Hinan Moisesqa kutichirqan: —Suyariychis imaynatachus ruwanaykichista Señor Diospa niwanankama, nispa.

⁹Señor Diostaq Moisesta nirqan: —Israel runakunata khaynata kamachiy:

¹⁰Llapallanmi qankunapas mirayniykichispas Alqaspa Pasarpariy Fiestataqa ruwankichis. Ayata llamiykusqan hawa qhelli kashaqpas karu puriypi kashaqkunapas,

¹¹iskaykaq killaq chunka tawayoq p'unchay ch'isinpi chay fiestata ruwankichis, borrego kankata mikhunkichis haya qoratawan mana qonchuyoq t'antatawan.

¹²Qhepantin p'unchaypaqqa aman chhikantapas puchunkichischu, amataq tulluntapas p'akinkichischu. Alqaspa Pasarpariy Fiestataqa tukuy yachachisqayman hinan ruwankichis.

¹³Pipas ch'uya kashaspa, mana puriypipas kashaspa Alqaspa Pasarpariy Fiestata mana ruwanqachu chayqa, manan llaqtaypi yupasqañachu kapunqa, unanchasqa p'unchaypi ofrendanta mana haywawasqanrayku. Chay huchanmantataqmi muchuchisqa kanqa.

¹⁴Qankunawan tiyaq wak llaqta runakunapas Alqaspa Pasarpariy Fiestata ruwayta munaspaqa, ruwanaykichispaq kamachisqayman hinan ruwanqa. Chay kikin kamachikuyllan kanqa wak llaqtayoqkunapaqpas Israel runakunapaqpas, nispayki, nispa.

¹⁵Dioswan Tupana Karpata sayarichisqanku p'unchaymi karpata phuyu pakaykurqan. Ch'isinmantapacha illarimuykamataq chay phuyuqa nina hina rikhurirqan.

¹⁶Ahinan sapa p'unchay mana p'itiy karqan, p'unchaymi karpata phuyu pakaykurqan, tutataq nina rawray hina karqan.

¹⁷Karpa patamanta phuyu puririqtinmi Israel runakunaqa astakurqanku, hinaspa maypichus phuyu sayaykusqan cheqaspi karpakurqanku.

¹⁸Israel runakunaqa Señor Dios kamachiqtinmi astakurqankupas karpakurqankupas. Karpa patapi phuyu sayashaqtinqa Israel runakunaqa manan puririrqankuchu.

¹⁹Karpa patapi unayta phuyu sayashaqtinqa, Israel runakunaqa Señor Diosta kasukuspankun mana puririrqankuchu.

²⁰Pisi p'unchaykunalla karpa patapi phuyu sayaqtinmi ichaqa, Señor Diospa kamachisqanman hina puririspa astakurqankupas karpakurqankupas.

²¹Mayninpiqa huk tutallan phuyu chaypi sayaq, tutamantataq puriripuq, chaymi Israel runakunapas astakullaqkutaq. Tutapas p'unchaypas phuyu puririqtinqa paykunapas astakullaqkutaqmi.

²²Karpa patapi phuyu sayaq iskay p'unchaytapas, huk killatapas, huk watapas chayqa, chaypin Israel runakunaqa qaynakuqku, manataq astakuqkuchu. Phuyu puririqtinmi ichaqa, astakurqanku.

²³Paykunaqa Señor Dios kamachiqtinmi karpakurqankupas astakurqankupas. Tukuy chaykunapiqa Señor Diosta servispallapunin kasharqanku, Señor Diospa Moiseswan kamachisqanman hina.