Read Quechua Cuzco Bible 1988 MIKÍAS 1 Bible Online

MIKÍAS 1 - Quechua Cuzco Bible 1988 bible

MIKÍAS 1

¹Judá suyupi rey Jotam, rey Ahaz, rey Ezekiaspiwan kamachikushaqtinkun, Señor Diosqa Moreset llaqtayoq Mikiasman rimaykurqan. Huk rikhuriypin Samariamantawan Jerusalenmantawan payman rikuchirqan.

²Llapa llaqtakuna, kayta uyariychis, kay pachapi llapa tiyaqkuna, maki uyariychis. Qollana Señor Diosmi qankuna contra testigo hina rimanqa, ch'uya wasinmantapachan Señor Diosqa huchachanqa.

³Señor Diosmi maypichus tiyasqanmanta lloqsimushan, uraykamuspan orqo patakunata purimushan.

⁴Chaki sarunanpin wayq'okunapas ch'eqtakun, orqokunan chullurin ninaman churasqa wira hina, qhatata phaqchaykuq unu hina.

⁵Señor Diosmi chaykunata ruwan Jacobpa mana kasukusqanrayku, Israel runakunaq huchallikusqanrayku. ¿Imataq Jacobpa mana kasukusqanri? ¡Samaria llaqtapi ruwasqanmi! ¿Maypitaq Judá runakunari wak'a diosta yupaychanku? ¡Jerusalén llaqtapin!

⁶Chaymi Señor Diosqa nin: Samaria llaqtatan llapanta thunisaq, uvas mallkina chakramanmi tukuchisaq. Ruminkunatan wayq'oman wikch'uykusaq, teqsinkunatapas paskasaqmi.

⁷Llapa idolokunan ñut'usqa kanqa, yupaychana wasipi qoykusqakunapas ruphasqan kanqa, wak'a diosninkupas llapallanmi p'akisqa kanqa. Chaykunaqa tarisqa karqan yupaychana wasipi rabona warmikunaq pagachikusqanwanmi, wakmantan rabona warmikunallamantaq chaykunaqa pagasqa kanqa, nispa.

⁸Chaymi waqasaq anchisaq, chaymi q'ala chakipas mana p'achayoqpas purisaq, chacal nisqa animalkuna hinan aullakusaq, suri animal hinan qaparisaq.

⁹Samaria llaqtaq k'irisqa kasqanqa mana hampiy atiymi, Judá suyupas k'irisqallataqmi kashan. Awqaqa llaqtaypa tiyasqan kikin Jerusalenkaman chayan.

¹⁰Ama chaytaqa Gat llaqtapi tiyaqkunaman willaychischu, ama waqaychischu. Bet-le-afra llaqtapi tiyaqkuna, ñut'u hallp'api llakikuymanta qhospaychis.

¹¹Safir llaqtapi tiyaqkuna, q'alalla p'enqasqa kamachi-kayman riychis. Zaanán llaqtapi tiyaqkunaqa manchakuspan mana lloqsimunchu, Bet-esel llaqtapiqa wañuqkunamantan lutokushanku, chayraykun mana yanapaykuyta atisunkichischu.

¹²Marot llaqtapi tiyaqkunaqa sinchi llakisqan yanapayta suyashanku, Señor Diosqa hatun llakita kikin Jerusalenkamaraq chayachimusqanrayku.

¹³Lakis llaqtapi tiyaqkuna, caballokunata carretaykichisman wataychis, qankunan Sión llaqtata huchallikuyman tanqarqankichis, qankunawanmi Israel runakunaq huchanqa qallarirqan.

¹⁴Moreset-gat llaqtapi tiyaqkunata kacharpariychis. Akzib llaqtaqa Israel runakunatan q'otunqa.

¹⁵Maresa llaqtapi tiyaqkuna, wak atipaqmi llaqtaykita hap'ikapunqa. Israel suyupi uma runakunapas Adulam qaqa wasimanmi pakakuq haykunqaku.

¹⁶Munasqaykichis wawaykichiskunamanta llakikuspa chukchaykichista rutukuychis, suweq'ara hina kanaykipaq umaykichista p'aqlakuychis, wawaykichis kamachi-kayman ripunqaku chayrayku.