Read Quechua Cuzco Bible 1988 MIKÍAS 2 Bible Online

MIKÍAS 2 - Quechua Cuzco Bible 1988 bible

MIKÍAS 2

¹¡Imaynaraqmi kanqaku mana chaninkaqta yuyaykuqkunaqa! ¡Imaynaraqmi kanqaku puñunanku ukhupi mana allinkaqta yuyaykuqkunaqa! Paqarimuqtinmi yuyaykusqankuta ruwanku, paykuna atiyniyoq kasqankurayku.

²Chakrakunatan munapakunku, hinaspan chaykunata qechunku, wasikunatapas munapakunku, hinaspan chaykunata hap'inku. Runata q'otuspan wasintapas qechunku, hinallataq wasi-masinkunatapas q'otuspa tayta-mamankuq saqesqan chakrakunatapas qechunku.

³Chaymi Señor Diosqa nin: Ñoqapas hatun llakitan chayachimusqaykichis, chaymantaqa manapunin ayqenkichischu, llaki-phutiy tiempon kanqa, chayraykun mana qhariy-qharichu purinkichis.

⁴Chay p'unchaypin runakunaqa k'amisunkichis, kay harawiwanmi takipayasunkichis: Imaymananchistan qechupuwanchis, llaqtaypa hallp'anqa rakisqan kapun. ¡Imaynatan Señor Diosqa chakranchiskunata qechupuwarqanchis wak runakunaman chaykunata qoykapuspa! nispanku, nispa.

⁵Chaymi Señor Diospa llaqtan huñunakuqtinqa mana pipas kanqachu sorteaspa hallp'akunata rakinanpaq.

⁶Paykunan qapariykuwan: Ama rimapayawaykuchu, ama chaykunata niwaykuchu, manan hatun llakiqa chayamuwanqakuchu, nispa.

⁷Yaw Jacobpa mirayninkuna, ¿allintachu nishankichis: Señor Diosqa manan ñoqaykupaqqa phiñakushanchu, manan payqa chaykunata ruwanqachu, nispa? Chaypas Señor Diospa siminqa chanin runakunapaqqa allinninpaqmi.

⁸Chaymi Señor Diosqa nin: ¡Qankunaqa llaqtay contran sayarinkichis! ¡Qankunaqa sumaq tiyakushaqkunaq ponchontan ch'utinkichis! Awqa-tinkuymantan soldadokuna kutimunku sumaqta kawsayta munaspa, qankunataq ichaqa imaymanankuta qechunkichis.

⁹Llaqtay warmikunatan sumaq wasinkumanta qarqonkichis, wawankuman qosqay saminchakunatan wiñaypaq qechupunkichis.

¹⁰¡Sayariychis! ¡Puriychis! ¡Manan kay hallp'apiqa samaykuwaqchisñachu! Qankunaqa sinchi qhellin kashankichis, chaymi mana khuyapayaykusqa wañuchisqa kankichis.

¹¹Pipas llullakuyta kamarispa nisunkichis: Señor Diosmi vinotapas aqhatapas qosunkichis, nispa chayqa, chaytapunin qankunaqa profetaykichis kananpaq munawaqchis, nispa.

¹²Señor Diosmi nin: Jacobpa mirayninkuna, cheqaqtapunin llapallaykichista huñuykamusqaykichis, cheqaqtapunin Israelmanta puchuqta huñuykamusaq. Kanchapin ovejakunata hina huñuykamusaq, q'achu-q'achu ukhupi uywa t'aqata hina. Yapamantan hallp'aykichisqa runa hunt'a kapushanqa, nispa.

¹³Diosmi ñanta kicharispa ñawpaqenkuta rinqa, paykunataq llaqta punkunta lloqsispa kacharisqa kapunqaku, Reyninku Señor Diospas ñawpaqenkutan rinqa.