Read Quechua Cuzco Bible 1988 MIKÍAS 3 Bible Online

MIKÍAS 3 - Quechua Cuzco Bible 1988 bible

MIKÍAS 3

¹Ñoqan nirqani: Jacobpa uma runankuna, uyariychis, Israel suyupi umallikuna, uyariychis: ¿Manachu qankunaqa imaynachus chaninchayta qhawanaykichis?

²Chaypas qankunaqa allinkaqtan cheqnikunkichis, mana allinkaqtataq munakunkichis, qaranta ch'utinkichis, aychantapas tullunankichis,

³Llaqtaytan kawsashaqllata mikhunkichis, qarankutan ch'utinkichis, tullunkutan p'akinkichis, perolpaq hinan kuchurqarinkichis, mankapaq aychata hinan wakichinkichis.

⁴Chaypachan Señor Diosta waqyakunkichis, ichaqa manan payqa kutichimusunkichischu. Millaykunata ruwasqaykichisraykun, chay p'unchaykunapi Señor Diosqa pakakusunkichis.

⁵Señor Diosmi llaqta pantachiq profetakunamanta nin: Mikhuchiqninkupaqmi sumaq kawsayta willanku, mana mikhuchiqninkupaqtaqmi ch'aqwata sayarichinku.

⁶Chaymi chay profetakunapaqqa tutayaykapunqa, rikhuriytaqa manañan rikunqakuñachu, manañan watuytapas atinqakuñachu. Chay profetakunapaqmi inti haykupunqa, p'unchaymi paykunapaq tutayaykapunqa.

⁷Hinaqtinmi profetakunaqa p'enqakunqaku, watuqkunapas p'enqasqa pukamanraq tukunqaku. Dios mana ima nispapas nimuqtinmi llapallanku usphurayanqaku, nispa.

⁸Ñoqatan ichaqa Señor Diospa Espiritun hunt'aykuwan atiywan, kuskachaywan, kallpawan ima, Dios contra sayariyninmanta Jacobta ch'atanaypaq, Israelta huchanmanta huchachanaypaq.

⁹Jacobpa uma runankuna, kayta uyariychis, Israel suyupi umallikuna, uyariychis. Qankunan chaninchayta cheqninkichis, kuskachaytapas llapanta q'ewinkichis.

¹⁰Qankunan runata wañuchispa Sión llaqtata perqankichis, mana chaninta ruwaspan Jerusalenta sayarichinkichis.

¹¹Juezninkuqa lluk'iykusqaraykun juzganku, sacerdotenkutaq qolqerayku yachachinku, profetankupas qolqepaqmi watunku chaypas Señor Diosmanmi hap'ipakunku: Ñoqanchiswanmi Señor Diosqa kashan, manan ima mana allinpas chayamuwasunchu, nispa.

¹²Chaymi huchallikusqaykichis hawa Sionqa chakra hina yapusqa kanqa, Jerusalenpas thunisqa soqyan kapunqa, yupaychana wasi orqotaq ch'aphra hunt'a kapunqa.