Read Quechua Cuzco Bible 1988 MIKÍAS 4 Bible Online

MIKÍAS 4 - Quechua Cuzco Bible 1988 bible

MIKÍAS 4

¹Hamuq p'unchaykunapin Señor Diospa wasin orqo aswan hatunkaray kanqa, llapa orqokunamantapas aswan alton kanqa. Chaymanmi llaqtakuna qhochurikamunqaku,

²askha hatun suyukunan pusarinakamunqaku: Hakuchis, Señor Diospa orqonman wichasun, Jacobpa Diosnin yupaychana wasiman wichasun. Paymi ñanninkunata yachachiwasun, chay ñanninkunatataq purisun, nispa. Sionmantapachan Señor Diospa yachachikuyninta yachachinqaku, Jerusalenmantapachan Señor Diosqa rimanqa.

³Señor Diosmi askha llaqtakunaq ch'aqwayninta kuskachanqa, karukaman atiyniyoq suyukunaq churanakuyninta t'aqtanqa. Espadankumantan yapuna takllakunata ruwakapunqaku, lanzankumantapas ichhunakunatan ruwakapunqaku. Manan mayqen suyupas huk suyuwan maqanakunqañachu, manan awqa-tinkuypaqpas yachaqanqakuñachu.

⁴Sapanka runan tiyaykunqa uvas yuran k'uchupipas higos sach'an k'uchupipas, manataqmi pipas manchachiqninku kanqachu, Tukuy-atiyniyoq Señor Diospa chay hinata ruwasqanrayku.

⁵Wak llaqtakunaqa diosninkutan kasunku yupaychanku, ñoqanchismi ichaqa Apu Señor Diosninchista wiñay-wiñaypaq kasusunpas yupaychasunpas.

⁶Señor Diosmi nin: Chay p'unchaypin ovejaykunata huñuykamusaq, k'irisqaykunatapas wist'ukunatapas pantapuqkunatapas.

⁷Chay wist'ukunawanmi wakmanta llaqtata paqarichisaq, pantapuqkunatapas atiyniyoq hatun suyumanmi tukuchisaq. Ñoqa Señor Diosmi Sión orqopi llaqtayta kamachisaq, chay p'unchaymanta wiñay-wiñaykama.

⁸Qanmi, Jerusalén, uywa qhawana torre kanki, Sión chawpipi pukara kanki. Qanmi suyupi wakmanta hatun llaqta kapunki, Israel suyuntinpi wakmanta kamachikuq kapunki, nispa.

⁹Kunanri, ¿imanaqtintaq qaparinki? ¿Wachakuq warmiq nanayninchu hap'isunki? ¿Manachu reyniyki kan? Icha, ¿yuyaychaqniykikunachu wañun?

¹⁰Sión llaqta, wachakushaq warmi hina q'ewiykachakuspa qapariy. Kunanqa llaqtamantan lloqsinki, hinaspan ch'usaq pampapi karpakunki, Babiloniakamataqmi chayankipas. Chaypin qespichisqa kanki, chaypin Señor Diosqa awqaykikunamanta qespichisunki.

¹¹Kunanmi askha hatun suyukuna awqayki huñukuspa ninku: ¡Jerusalenta sarunchasunchis! ¡Sionta thunispa q'ochukusunchis! nispa.

¹²Ichaqa chay suyukunaqa manan Señor Diospa yuyaykusqankunata yachankuchu, manan imachus ruwanankutapas entiendenkuchu, paymi chaykunata erapi phichakunata hina huñuykun.

¹³Sión llaqta, ¡sayariy! ¡Chaykunata saruy! Señor Diosmi nisunki: Ñoqan qosqayki fierro waqrayoq bronce phapatuyoq toroq kallpanta, hinan askha llaqtakunata ñut'urqarinki, paykunaq llat'anasqankutan ñoqa Señor Diosman qowanki, qhapaq-kayninkutapas ñoqa kay pachantin Señor Diospaqmi t'aqapuwanki, nispa.