Read Quechua Cuzco Bible 1988 MIKÍAS 5 Bible Online

MIKÍAS 5 - Quechua Cuzco Bible 1988 bible

MIKÍAS 5

¹Jerusalén llaqta, llat'anaqniykikunan chayarqamuskunki, chayrayku llakikuspa cuerpoykita kuchurqarikuy. ¡Awqakunan muyuykuwanchis! ¡Israel suyu kamachikuqtan k'umuykachinqaku!

²Señor Diosmi nin: Qanqa, Efrata Belén, Judá llaqtakuna ukhupi huch'uyllaña kanki chaypas, qanmantan Israel suyuta kamachiq sayarimunqa, miramuyninqa ñawpaqmantañan, nispa.

³Chaymi Señor Diosqa llaqtanta saqenqa wawata suyashaq warmiq wachakunankamalla. Chay qhepatataq wakin wawqenkunaqa Israel llaqta-masinkunawan huñukapuq kutimpunqa.

⁴Paymi kamachikuq churasqa kaspa Señor Diospa atiyninwan llaqtanta michinqa, Apu Señor Diosninpa munaychakuyninpi kamachikunqa. Teqsimuyuntin llaqtakunan payta anchatapuni hatunchanqa, chaymi llaqtanqa mana manchapakuspa tiyanqa.

⁵Paymi thak-nisqa kawsayta apamunqa. Suyunchisman Asiria runakuna hunt'aykamuqtinmi, qhapaq wasinchiskunatapas saruykuqtinmi, paykuna contra qanchis kamachikuqkunata kachasunchis, hinallataq pusaq uma runakunatapas.

⁶Paykunan Asiria suyuta maqanakuypi atipanqaku, Nimrodpa hallp'antan atipanqaku. Hinaspan Asiria runakunamanta kacharichiwasunchis, suyunchisman hunt'aykamuqtinku, qorpanchiskunata saruykuqtinku.

⁷Jacobpa llaqtanmanta puchuq runakunaqa askha llaqtakuna ukhupin Señor Diospa sullachimusqan sulla hina kanqa, q'achu pataman paramuq para hinan kanqa. Paykunaqa manan runamanchu hap'ipakunku, aswanpas Diosmanmi hap'ipakunku.

⁸Ahinallataqmi Jacobpa llaqtanmanta puchuqqa hatun suyukuna ukhupi yunka animalkuna ukhupi león hina kanqa, oveja t'aqa ukhupi uña león hina kanqa, chaymi pasaspaqa sarurqarin llik'irqarin, manataqmi pipas kacharichiyta atinchu.

⁹Chay hinatan Jacobqa awqankunata atipanqa, hinan tukuy awqankunaqa wañuchisqa kanqaku.

¹⁰Señor Diosmi nin: Chay p'unchaypin caballoykikunata wañuchisaq, awqa-tinkuy carretaykikunatapas p'akisaq.

¹¹Llaqtaykikunatan raqay-raqayman tukuchisaq, llapa pukaraykikunatapas thunisaqmi.

¹²Layqaykikunatapas tukusaqmi, watuqniykikunapas manan kapunqachu.

¹³Idoloykikunatapas yupaychana saywa rumiykikunatapas p'akisaqmi, manañan hayk'aqpas ruwakusqayki dioskunaman k'umuykunkichu.

¹⁴Asera nisqa diosaykikunatan kumpasaq, llaqtaykikunatapas llapallantan thunisaq.

¹⁵K'arakta phiñakuspaymi, sinchita phiñakuspaymi mana kasuwaqniy hatun suyukunaman aynita kutichisaq, nispa.