Read Quechua Cuzco Bible 1988 MIKÍAS 6 Bible Online

MIKÍAS 6 - Quechua Cuzco Bible 1988 bible

MIKÍAS 6

¹Kunan Señor Diospa rimasqanta uyariychis: ¡Sayariy, orqokunaq qayllanpi ñoqa contra quejakuy, moqokunapas simiykita uyarichun!

²Orqokuna, llaqtanta Señor Diospa huchachasqanta uyariychis, kay pacha qaqa sayaq teqsikunapas uyariychis. Señor Diosmi llaqtan contra quejakun, Israel contran ch'atayta mast'arin.

³Señor Diosmi nin: Llaqtalláy, ¿imanarqaykin? Chayri, ¿imapin sayk'uchirqayki? Kutichimuway.

⁴Ñoqan Egipto suyumanta horqomurqayki, kamachi kashaqtiykin kacharichimurqayki, Moiseswan, Aaronwan, Mariawanmi pusachimurqayki.

⁵Llaqtalláy, kunan yuyariy, ima nispachus Moab suyu rey Balakpa yuyaychasqanta, ima nispataqchus Beorpa churin Balaampa Balakman kutichisqanta. Yuyariy Sitimmanta Gilgalman rishaqtiyki imachus kasqanta, imaynatachus qanta qespichisqayta reparanaykipaq, nispa.

⁶¿Imantintaq Señor Diosta yupaychaqri asuykusaq? ¿Imantintaq Qollana Diosta yupaychaqri qayllaykusaq? ¿Paymanqa ruphachina sacrificio apantinchu asuykusaq? ¿Paymanqa watayoq torillokunantinchu qayllaykusaq?

⁷Señor Diosqa waranqa-waranqa anejotapas, chunka waranqa mayu hina aceitetapas kusisqachu chaskinqa? ¿Phiwi qhari wawaytachu huchallikusqaymanta qosaq? ¿Ukhuypa rurusqantachu huchallikusqaymanta haywasaq?

⁸Yaw runa, Señor Diosmi imachus allin kasqanta willarqasunkiña, payqa imatachus mañakusqaykitapas nirqasunkiñan: Chanin kaqllatapunin ruwanayki, mana p'itiyllatapunin munakunayki, Diosniykitapas kasuspallapunin kawsanayki, nispa.

⁹Señor Diosta manchakuqqa yachayniyoqmi. Señor Diosmi llaqtaman waqyakushan: Uyariychis, Judá ayllupas llaqtapi huñukuqkunapas.

¹⁰¿Qonqaymanchu mana chaninpi tarisqaykichista? ¿Manachu qhawariyman ñakasqay waqllichisqa arrobata?

¹¹¿Manachu huchachasaq waqllisqa balanzayoqta? ¿Manachu huchachasaq waqllisqa pesokunata churaq runata?

¹²Kay llaqta qhapaqkunaqa sarunchaqkaman kanku, chaypi tiyaqkunaqa llullakunan q'otuqkunan kanku.

¹³Chaymi ñoqapas thuniyta qallariyki, huchaykikunamantan purunyachisqayki.

¹⁴Mikhunkin, manataqmi saksaykunkichu, aswanpas yarqasqallapunin kashanki. Mikhunatan huñunki, manataqmi imapas kapunqachu, waqaychankiña chaypas awqa-tinkuypin ch'usaqyachipusaq.

¹⁵T'akankin, manataqmi ichhunkichu, olivotan kutaspa ch'irwanki, manataqmi chay aceitewan hawikunkichu, uvastan sarunki, manataqmi chay vinota ukyankichu.

¹⁶Rey Omriq kamachikusqankunatan hunt'arqanki, hinallataq Ahab aylluq ruwasqankunatapas ruwarqanki, paykunaq purisqanta hinan purirqankipas. Chaymi ñoqa purunyachipusqayki, runaykikunatapas asipayachisaqmi, wak llaqtakunataq k'amisunki, nispa.