Read Quechua Cuzco Bible 1988 MIKÍAS 7 Bible Online

MIKÍAS 7 - Quechua Cuzco Bible 1988 bible

MIKÍAS 7

¹¡Ay llakisqan kashani! Uvas pallasqa qhepata qhellapaq runa hinan kashani, manan huk k'allmallapas mikhunapaq qhepanchu. Ruphay mitapi ruru pallaq runa hinan kashani, manataqmi munasqay higostapas tarinichu.

²Manan kay suyupi Dios sonqo runa kapunchu, manan runakuna ukhupi chanin runa qhepanchu. Lliwmi runata wañuchinapaq qhamiyanku, sapankan runamasinpaq toqllata churanku.

³Mana allinkaqta ruwanankupaqqa kusallañan kanku, kamachikuqkunaqa sinchitan mat'inku, juezkunapas lluk'iykachikunkun, atiyniyoqkunapas ima munasqankutan rimanku, hinaspan juezkunawan rimanakunku chayta ruwanankupaq.

⁴Allinninkaqninkuqa khiska hinan, aswan chaninkaqtaq t'ankarmantapas aswan millayraq. Ichaqa llaqtanta Diospa muchuchinan p'unchaymi chayamushan, llaqta qhawaq profetakunaq willasqan p'unchaymi chayamushan, chaymi runakunaqa anchata llaksakushanku.

⁵Ama runa-masiykichispa siminta hap'iychischu, amallataq reqsinakuq-masiykichismanpas k'askakuychischu, warmiykiwan rimashaspapas allinta yuyaykukuspa rimay.

⁶Churin taytanta k'amin, ususintaq maman contra sayarin, qhachunmi suegran contra sayarin, runaq awqankunaqa ayllunkunallataqmi.

⁷Ñoqan ichaqa Señor Diosta makilla qhawapakusaq, qespichiwaqniy Diostan suyakusaq, payqa uyariwanqan.

⁸Qan awqayqa, ama kusipayawaychu, urmaniña chaypas sayarisaqmi, laqhayaqpiña tiyasaq chaypas, Señor Diosmi k'anchaykuwanqa.

⁹Señor Dios contra huchallikusqayraykun paypa k'arak phiñakusqanta muchusaq, chaykamaqa paymi uyarichikusqayta taripanqa, hinaspan chaninchaykapuwanqa. Paymi k'anchayman horqowanqa, ñoqataq chaninchapuwasqanta rikusaq.

¹⁰Awqaypas chaytaqa rikunqan, hinan chaywan p'enqakunqa. Paymi niwarqan: ¿Maytaq Apu Señor Diosniykiri? nispa. Ichaqa kunanmi chay awqata kusipayasaq, calle t'uru hina sarusqa kasqanta qhawarispa.

¹¹Jerusalén, perqaykikunaq perqasqa kanan p'unchaymi chayamushan, chay p'unchaypin qorpaykikuna yaparikunqa.

¹²Chay p'unchaypin tukuyneqmanta hamusunkiku, Asiria suyumantapas Egipto suyumantapas, Eufrates qayllamantapas, hatun mama qochakunamantapas, karu orqokunamantapas.

¹³Kay pachataq ichaqa purunyachisqa kanqa, chaypi tiyaqkunaq huchallikusqanrayku.

¹⁴Señor Diosníy, llaqtaykita tawnaykiwan michiy, akllakusqayki llaqtata pusay, sapallanmi ch'aphra-ch'aphrapi tiyan, sumaq q'achuyoq hallp'akunatan muyuykunpas. Ñawpa p'unchaykunapi hina Basán q'achukunamanpas Galaad q'achukunamanpas pusay.

¹⁵Egipto suyumanta horqomuwasqaykiku p'unchaykunapi hina utirayanakunata rikuchiwayku.

¹⁶Hatun suyukunan chayta rikunqaku, ancha atiyniyoqña kashaspankupas pisipanqakun. Upa hinan roqt'o hinan kanqaku.

¹⁷Ñut'u hallp'atan mach'aqway hina llaqwanqaku, pampanta suchuq mach'aqwaykuna hinan kanqaku. Pukarankumantan khatatataspa lloqsinqaku, qan Apu Señor Diosniykumanmi khatatataspa hamusunkiku, hinaspan manchakusunkiku.

¹⁸Diosníy, manan qan hinaqa kanchu, qanmi huchata pampachanki, hinaspa kay puchuq llaqtaykiq mana kasukusqantapas qonqapunki. Manan wiñaypaqchu phiñakunki, mana p'itiyta runata munakuspaykiqa kusikunkin.

¹⁹Huktawanmi khuyapayaykuwankiku, mana chanin ruwasqaykutan t'ustunki, llapa huchaykutan mama qocha sonqoman wikch'uykunki.

²⁰Qanmi Jacobpa mirayninpaq hunt'aqpuni kanki, Abrahampa miraynintapas mana p'itiytan munakunki, imaynan ñawpa p'unchaykunapi machulaykuman prometerqanki hina.