Read Quechua Cuzco Bible 1988 NAHUM 2 Bible Online

NAHUM 2 - Quechua Cuzco Bible 1988 bible

NAHUM 2

¹Señor Diosmi Jacobpa qhapaq-kayninta wakmanta t'ikarichinqa, Israelpa hatun-kayninta wakmanta rikhurichinqa, qechuqninkunaña llat'anarqanku chaypas, uvas chakrankutaña chaqorqanku chaypas. Yaw Nínive llaqta, thuniqniykin qan contra phawamun, ¡pukarapi soldadoykikunata sayachiy! ¡Ñanta makilla qhawachiy! ¡Allinta kallpachakuy! ¡Kallpasapaykikunata huñuykuy!

³Awqa soldadokunaq escudonqa pukan, maqanakuqkunaq p'achanqa sansaq pukan. Phawaykunankupaqmi wakichikunku, llusk'achasqa carretankun k'anchaywan lliphipin, caballonkun phawariy-phawariyllaña kashan.

⁴Carretakunan callekunapi phawaykachan, plazakunapin phawanaqan, hap'ichisqa nina hinan k'anchan, illapa hinan q'enqo-q'enqota phawan.

⁵Umalliqa allinnin soldadonkunatan waqyan, paykunataqmi tanqarparinakusparaq hamunku, llaqta perqamanmi phawaykunku, patankupin qatana hina escudokuna kashan perqa patamanta ch'aqemusqakunawan mana k'irisqa kanankupaq.

⁶Mayu hark'achisqakunan q'asakun, reypa wasintaq thallarparipun.

⁷Llaqta Qoyatan presota apanku, kamachin warmikunan urpi hina anchinku, qhasqonkuta takakuspankun waqankupas.

⁸Nínive llaqtaqa p'uytuchasqa unu hinan, q'asasqa p'uytumanta hinan runankunaqa wakwarqonku. Paykunatan kunkayoqta waqyanku: ¡Sayaykuychis! ¡Kutirimuychis! nispa, ichaqa manan mayqenpas kutirinchu.

⁹¡Qolqeta horqoychis! ¡Qorita qechuychis! ¡Imaymana hunt'an kasqa! ¡Imaymana illan kasqa!

¹⁰¡Thunisqan, llat'anasqan, ch'usaqyachisqan Niniveqa kapushan! Runakunan mancharisqa chiriyanraq, tullunkun mana takyanchu, cuerponkun manchasqa khatatatan, uyankupas q'ellumanraqmi tukun.

¹¹¿Maytaq leonkunaq t'oqon hina Nínive llaqtaqa? Chaypin uña leonkunaman mikhuchirqanku, orqo leonpas, china leonpas, uña leonkunapas chaypin mana imanasqalla tiyarqan.

¹²Chay leonqa askhatan uñankunapaq wañuchirqan, chinanpaqpas hap'isqanta llik'irqarirqan, t'oqonkunatapas mikhunawan hunt'achirqan.

¹³Tukuy-atiyniyoq Señor Diosmi nin: Ñoqaqa qan contran kashani, awqa-tinkuna carretaykikunata kanaykuspan q'osñirichisaq, awqa-tinkuypin soldadoykikunata wañuchisaq, manañan hukkunata llat'anankiñachu, manañataqmi hayk'aqpas kachapuriykikunaqa manchachispa rimanqakuñachu, nispa.