Read Quechua Cuzco Bible 1988 NAHUM 3 Bible Online

NAHUM 3 - Quechua Cuzco Bible 1988 bible

NAHUM 3

¹¡Imaynaraqmi kanki runa wañuchiq llaqta! ¡Llullakuylla-llullakuqmi kanki! ¡Qechuylla-qechuqmi kanki! ¡Suwakushallankipunin!

²¡Uyariychis! Hasut'in ch'ataqeshan, ruedakunan raqhaqeshan, caballokunan q'aqraqeshan, carretakunan phawaspa maywikushan.

³¡Caballerian phawashan! ¡Espadakunan k'anchashan! ¡Lanzakunan lliphipishan! ¡Askhallañan k'irisqakunaqa! ¡Askhallañan ayakunapas! ¡Mana yupay atinan wañuchisqakunaqa! ¡Ayakunapin misk'akunku!

⁴Niniveqa sonqo suwaq munaymanmi tukurqan, rabona warmi hinan millayllaña karqan, kusallaña layqa warmi hinan karqan, qhellipi purisqankunawanmi hatun suyukunaq sonqonta suwarqan, llaqtakunatapas layqakusqankunawanmi kamachi-kayman aparqan, chaymi kunanqa muchuchisqapuni kapushan.

⁵Tukuy-atiyniyoq Señor Diosmi nin: Ñoqaqa awqaykin kashani, uyaykikaman polleraykita q'allpasqayki, hinaspan q'ala ukhuykita hatun suyukunaman rikuchisaq, p'enqayniykitapas llaqtakunamanmi qhawachisaq.

⁶Qanmanmi qhellikunata wikch'uykusqayki, pisichaspaymi qhawanapaq churasqayki.

⁷Llapa rikuqniykikunan ayqekusunkiku: ¡Nínive llaqtan thunisqa kapusqa! ¿Pin payta llakipayanqa? ¿Pin payta sonqochaykunqa? nispa.

⁸¿Qanqa Tebas llaqtamanta aswan allinchu kanki? Chay llaqtan Nilo mayu patapi kasharqan, unuwan muyuykusqan kasharqan, hark'aqninqa Nilo mayun karqan, unupas perqa hinan karqan.

⁹Etiopía suyuq Egipto suyuq hatun llaqtan kaspanmi ancha atiyniyoqña karqan, Fut runakuna Libia runakunan payta yanaparqan.

¹⁰Chaypas payqa preso apasqan karqan, wak suyumanmi apasqa karqan. Huch'uy wawankupas llapa calle esquinakunamanmi ch'aqesqa karqan, allichachaq runankunapaqmi sortearqanku, kamachikuq runakunatan thunkurqanku.

¹¹Qanpas t'ili machasqa hinan kanki, awqamantan pakakunki, awqamanta qespikunaykipaqmi maskhanki.

¹²Llapa pukaraykikunan poqosqa higosniyoq sach'a hina, chaykunata chhaphchinku chayqa, mikhuqninpa siminman urmaykun.

¹³Soldadoykikunaqa warmi t'aqa hinan, suyuykiman haykunakunaqa llapallanmi awqaykikunapaq kicharayashan, wisq'ana p'utiykikunataqa ninan ruphaykun.

¹⁴Awqataq muyuykusunki chayqa, unutayá huñukuy, pukaraykikunatayá allinta perqapay, t'uruchayyá, allintayá saruy, adobetayá sik'iy.

¹⁵Chaypas ninan ruphaykusunki, soldadokunan wañuchisunki, langosta hinan tukusunki. ¡Langosta hina askhayay! ¡T'iskut'isku hina miray!

¹⁶Negociaqniykikunatan hanaq pacha ch'askakunamantapas astawanraq askhayachirqanki, paykunaqa langosta hinan mikhuyta tukuspa ripunku.

¹⁷Uma runaykikunaqa langostakuna hinan, oficialniykikunapas wakwamuq langostakuna hinan, chiri p'unchaypin qencha patapi tiyarayashanku, inti lloqsimuqtintaq phalaripunku, manataq maymanchus risqanku yachakunchu.

¹⁸Yaw Asiria suyu rey, ¡kamachikuq runaykikunan wañupunku! ¡Apu runaykikunan chinkaripunku! Llaqtayki runakunaqa orqokunamanmi ch'eqeykunku, manataqmi pipas huñuykamuq kanchu.

¹⁹Manan k'irisqa kasqaykipaq hampi kanchu, mana hampiy atinan nanayniykiqa. Llapa runan millay sarunchasqaykitaqa muchurqankupuni, chaymi thunisqa kasqaykimanta uyarispa llapallanku kusisqa t'aqllakunku.