Read Quechua Cuzco Bible 1988 HABAKUK 1 Bible Online

HABAKUK 1 - Quechua Cuzco Bible 1988 bible

HABAKUK 1

¹Kaytan Señor Diosqa huk rikhuriypi profeta Habakukman rikuchirqan.

²Señor Diosnilláy, ¿hayk'aqkamataq waqyakamusqayki, manataq uyariwankichu? ¿Hayk'aqkamataq: ¡Sarunchashawankupunin! nispa qaparimusqayki, manataq qespichiwankikuchu?

³¿Imanaqtintaq mana chaninkaqta rikuchiwanki? ¿Imanaqtintaq alqochakuytapas ch'inlla qhawanki? Runa ch'utisqankutapas runa maqasqankutapas rikushanin, quejanakushankun churanakushankun.

⁴Kamachikuy simiqa waqllichisqan kapun, manan cheqaq chaninchaypas kapunchu, arí, millay runan chanin runata mat'iykun, chaymi chanin-kayta q'ewispa juzganku.

⁵Señor Diosmi nin: Hatun suyukunata qhawariychis, chaykunata qhawarispan musphankichispuni. Huk ruwanatan kawsashaqtiykichis ruwasaq, piña chayta willasuqtiykichispas manan creewaqchischu.

⁶Babilonia runakunatan atiyniyoqta sayarichimusaq, paykunaqa mana khuyapayakuqmi hawan-ukhunta ruwaqmi kanku, hallp'a pachantinmanmi mast'arikunku wak runakunaq hallp'anta qechunankupaq.

⁷Paykunaqa manchakuy millay runakunan kanku, manan ima kamachisqa simitapas kasunkuchu, aswanpas anchaykachaspan munayllankuta ruwanku.

⁸Caballonkuqa leopardokunamantapas aswan phawaqmi, tuta hap'iq lobokunamantapas aswan k'uchin, caballopi soldadokunapas wayra hinan phawanku, karu llaqtakunamantan phawamunku, mikhunaman phawaykuq anka hinan p'aktiykukunku.

⁹Llapallankun maqashaspalla atipanankupaq chayanku, ch'inneqmanta ruphashaq wayra hinan askhallaña chayarparinku, aqota hinan presokunata huñurqonku.

¹⁰Reykunatan pisicharparinku, kamachikuqkunatapas asipayankun, pukarakunata qhawarispapas asikunkun, hallp'a seqanakunatan montorqonku, hinaspan pukarakunata hap'inku.

¹¹Chaymantataq sinchi wayra hina pasapunku, kallpallankutaq diosninkuqa kasqanta iñispanku, chay hina huchallikuq runakunan kanku, nispa.

¹²Señor Diosnilláy, qanqa wiñay-wiñaymantan kanki. Diosnilláy, qanqa Ch'uya Diosmi kanki, chaymi mana wañusaqkuchu. Señor Diosnilláy, juzganankupaqmi Babilonia runakunataqa churarqanki. Pakaykukunay Qaqalláy, muchuchinankupaqmi paykunata churarqanki.

¹³Sinchi ch'uyan kanki, chaymi millaykaqtaqa mana hinallatachu qhawanki, manan mana chaninkaqtapas rikuyta atinkichu. Chayri, ¿imanaqtintaq runa qaraykuqkunataqa ch'inlla qhawanki? ¿Imanaqtintaq mana ima ninkipaschu, paymanta aswan chanin runata mana chanin runa wañuchiqtin?

¹⁴Qanqa qocha challwakunata hinallan runakunata rikunki, mana piniyoq suchuq animalkunata hinallan runakunata qhawanki.

¹⁵Babilonia runakunaqa llapallantan anzuelowan hina aysanku, llikawan challwaq hinan hap'inku, huñuykusqata rikuspataq kusikunku q'ochukunku.

¹⁶Hinaspan llikankuta yupaychaspa sacrificiota haywanku, inciensowanpas llikankuta q'apachinku, ahinapin askha kaqniyoq kanku, sumaq mikhunatan mikhunkupas.

¹⁷¿Chay hinatachu runakunataqa hap'ishallanqaku? ¿Chay hinatachu hatun suyukunataqa mana khuyapayaykuspa thunishallanqaku?