Read Quechua Cuzco Bible 1988 HABAKUK 2 Bible Online

HABAKUK 2 - Quechua Cuzco Bible 1988 bible

HABAKUK 2

¹Qhawana patapin maki qhawashasaq, perqa patapin sayaykusaq, imatachus Señor Diospa niwanantan suyashasaq, quejakusqayman imatachus nimuwanantan suyashasaq.

²Hinan Señor Diosqa nimuwarqan: Rikuchisqayki chayta qelqay, p'alta k'arpapi sut'ita qelqay, chayta phawaylla leenapaq.

³Manaraqmi tiempo chayamunchu kay rikhuriypa hunt'akunanpaq, ichaqa hunt'akunqapunin, chay p'unchayqa sispaykamushanñan, tardanqaña chaypas, suyallay, tiemponpipunin chayamunqa.

⁴Chayrayku kay willakuyta qelqay: Mana chaninta ruwaqkunaqa pisi kallpayanqakun, chanin runakunan ichaqa Diospaq hunt'aq kaspanku kawsanqaku, niqta.

⁵Qhapaq-kayqa runatan pantachin, imaymanata munapakuq runaqa k'ankaykachanmi, sonqonqa manan tiyanchu, Wañuy-pacha hinan hanllarin, wañuy hinan mana saksanchu, chaymi llapa hatun suyukunapi munaychakun, llapa llaqtakunata kamachiman tukuchin.

⁶Chay llapallan suyukunan payta takipayanqaku, pay contran k'askachita takinqaku: ¡Imaynaraqmi kanki! Qanqa hukkunamanta suwakuspaykin qhapaqyashanki. ¿Hayk'aqkamataq prenda hap'isqayki qhapaq-kaykunata huñushallanki?

⁷Qonqayllan manuqniykikunaqa sayarimunqaku, paykunaqa rikch'arimuspan mancharichisunkiku, hinaspan imaymanaykita qechusunkiku.

⁸Askhallaña suyukunamantan llat'anarqanki, runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi wakin suyukunapas llat'anasunkiku.

⁹¡Imaynaraqmi kanki! Aylluykitan suwakusqaykikunawan qhapaqyachirqanki, wasiykitapas mana piqpa chayananpin wasicharqanki mana piqpa imanananta yuyaspayki.

¹⁰Qanqa askha llaqta runakunatan waqllichirqanki, chhaynatan wasiykita p'enqayman churarqanki, qan kikillaykitataqmi waqllichikurqankipas.

¹¹Perqa rumikunapas qan contran qaparinqa, chakasqa kurkukunapas yachapayanqan.

¹²¡Imaynaraqmi kanki! Runata wañuchispan llaqtata perqarqanki, mana chaninkunata ruwaspan llaqtata teqsicharqanki.

¹³Ahinaqa, chay runakunaq llank'asqanqa ninapaq llant'a hinan, hatun suyu runakunaqa yanqan sayk'unku. ¿Manachu chayqa Tukuy-atiyniyoq Señor Diospa kamachikusqan?

¹⁴Imaynan mama qochaqa unu hunt'a kashan, chay hinan kay pachaqa Señor Diospa qhapaq-atiyninta reqsiq runakunawan hunt'a kanqa.

¹⁵¡Imaynaraqmi kanki! Runa-masiykitan machachirqanki, phiñasqan ukyachirqanki, hinaspan q'ala ukhunta qhawapayarqanki.

¹⁶Qanqa manan hatunchasqachu kanki, aswanpas p'enqapin rikukunki. Qanpas kunanqa ukyallaytaq, hinaspa q'ala ukhuykita rikuchikuy. Señor Diosmi paña makinwan phiñakuy hunt'a qeruta haywamusunki, hinan hatun-kayniykiqa p'enqaman tukupunqa.

¹⁷Líbano orqokunapin sach'akunata kumparqanki, qantapas kumpasunkikun. Salqa animalkunatapas wañuchirqankin, qantapas wak animalkunan mancharichisunki. Runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi chay muchuchiyqa taripamusunki.

¹⁸¿Imapaq allintaq llaqllasqa idoloqa? Runallan chaytaqa llaqllarqan. ¿Imapaq allintaq unuyachispa hich'asqa diospas? Llullakuyta yachachiqllan chayqa. Manan idolokunaqa rimayta atinchu chaypas ídolo ruwaqqa chaykunamanmi hap'ipakun.

¹⁹¡Imaynaraqmi kanki! Qanmi k'ullu idolota: ¡Rikch'ariy! ninki, mana rimariq rumitapas: ¡Sayariy! ninki. ¿Chaykunaqa imallatapas runata yuyaychanmanchu? Chaykunaqa qoriwan qolqewan k'uyusqan kashan, ichaqa manan kawsankuchu.

²⁰Señor Diosmi ichaqa ch'uya wasinpi kashan, paypa qayllanpiqa kay pachallantin upallachun.