Read Quechua Cuzco Bible 1988 HABAKUK 3 Bible Online

HABAKUK 3 - Quechua Cuzco Bible 1988 bible

HABAKUK 3

¹Profeta Habakukpa mañakusqan, harawita hina takinapaq.

²Señor Diosnilláy, mentasqa kasqaykitan uyarirqani, Señor Diosnilláy, ruwasqaykikunamantan utirayani. Ñawpa ruwasqaykikunata kunanpas ruwallaytaq, kay p'unchaykunapi chaykunata rikuchiwayku. K'arakta phiñakuspaykipas khuyapayaykuwayku.

³Diosmi Temán suyumanta hamun, Ch'uya Diosmi Parán orqomanta hamun. Qhapaq-atiyninmi hanaq pachantinman mast'arikun, teqsimuyuntinpin payqa yupaychasqa kashan.

⁴Lliphipiyninpas inti k'anchay hinan, makinmantan illapakuna wach'imun, atiyniyoq kaspanmi payqa chaykunawan p'achakun.

⁵Ñawpaqentan wañuy onqoy phawan, qhepantan rupha onqoy purin.

⁶Pay sayaykuqtinmi kay pacha khatatatan, pay qhawariqtinmi hatun suyukuna chukchun, ñawpa orqokunan thunikun, ñawpa moqokunan urmaykun, maypachamantapas chay hinatan payqa ruwan.

⁷Kushán runakunaq karpankunapin hatun llakita rikurqani, Madián runakunaq tiyananpin llaki phutiyta rikurqani.

⁸Señor Diosnilláy, ¿mayukunapaqchu phiñakurqanki? ¿Mama qochapaqchu k'arakta phiñakurqanki? ¿Chaychu, caballoykikunapi sillakurqanki, atipanaykipaq carretakunapipas phawamurqanki?

⁹P'eqtaykitan wach'inaykipaq wakichirqanki, llapa wach'inaykikunan wakichisqaña kashan. Mayukunawanmi kay pachata k'awachirqanki,

¹⁰rikuspasuykin orqokuna khatatatarqan, lloqlla unun phawarqan, mama qocha sonqon qaparirqan, chaykamataqmi phoqchiqesqankuna sayarirqan,

¹¹Wach'isqaykikuna k'anchariqtinmi, k'anchashaq lanzayki lliphipiriqtinmi, intipas killapas sayarqan.

¹²Phiñasqan teqsimuyuntinta charqaspa purirqanki, k'arak phiñasqan hatun suyukunata sarurqanki.

¹³Runaykikunata qespichinaykipaqmi lloqsimurqanki, akllasqayki reyta qespichinaykipaqmi hamurqanki. Millay runakunaq umallintan t'usturqanki, p'achakusqantan llapanta ch'utirqanki.

¹⁴Soldadonkunan ch'eqechiwanankupaq sinchi wayra hina phawaykamuwarqanku, Paykunaqa pakaykukuq wakcha runatan oqoykunankupaq qhawapayasharqanku, qanmi ichaqa umallinkuta wach'ispa ch'antirqanki.

¹⁵Mama qochatan caballoykikunawan t'usturqanki, askha unu ukhupin hatun phosoqokunata sayarichirqanki.

¹⁶Chaykunata uyariqtiymi sonqoy phatatatarqan, simiy khatatatarqan, tullu nanay hap'iwarqan, chakiy yuyu kapurqan. Ichaqa Diosmi sinchi llakiywan muchuchinqa hamuq awqa soldadokunata, chaymi ñoqaqa chay p'unchayta mana llakisqalla suyakusaq.

¹⁷Higos sach'aña mana ruruqtinpas, uvas yurakunaña mana ruruqtinpas, olivo sach'aña mana ruruqtinpas, chakrakunapiña cosecha mana kaqtinpas, oveja t'aqaña wañurqarichisqa kaqtinpas, uywa kanchakunapiña wakakuna mana kaqtinpas,

¹⁸ñoqaqa Señor Dioswanmi kusikusaq, Qespichiqniy Dioswanmi q'ochukusaq.

¹⁹Qollana Señor Diosmi kallpachawan, paymi allintapuni thaskichiwan, paymi orqo patakunanta allintapuni purichiwan.