Read Quechua Cuzco Bible 1988 SOFONÍAS 1 Bible Online

SOFONÍAS 1 - Quechua Cuzco Bible 1988 bible

SOFONÍAS 1

¹Amonpa churin rey Josías Judá suyupi kamachikushaqtinmi, Señor Diosqa Sofoniasman rimaykurqan. Sofoniasqa Kusiq churinmi karqan, Kusitaq Gedaliaspa churin karqan, Gedaliastaq Amariaspa churin karqan, Amariastaq Ezekiaspa churin karqan.

²Señor Diosmi nin: Ch'usaqyachisaqmi kay pachapi kaq tukuy imaymanata,

³wañuchisaqmi runakunatapas uywakunatapas, wañuchisaqmi phalaq animalkunatapas challwakunatapas, qolluchisaqmi millay runakunatapas, chinkachisaqmi kay pachamanta runakunatapas.

⁴Judá runakunatan muchuchisaq, Jerusalenpi llapa tiyaqkunatan ñak'arichisaq. Jerusalenmantan Baal nisqa dios yupaychayta llapanta chinkachisaq, sacerdotekunaq sutintawanpas chinkachisaqmi.

⁵Wakin runakunan wasi patakunapi k'umuykukuspa ch'askakunata, killata, intita yupaychanku. Wakin runakunan yupaychawaspanku sutiypi juranku, Milkom nisqa diospa sutinpipas jurallankutaqmi.

⁶Wakinninkutaq ñoqamanta t'aqakuwanku, manan maskhawankuchu, manataq tapukuwankupaschu, paykunatan llapallankuta wañuchisaq, nispa.

⁷Qollana Señor Diospa muchuchinan p'unchaymi sispaykamushanña, chayrayku paypa ñawpaqenpi upallakuychis. Señor Diosmi Judá runakunata sacrificananpaq wakichishanña, waqyaspanmi paykunata haywananpaq t'aqanña.

⁸Señor Diosmi nin: Sacrificasqay p'unchaypin muchuchisaq uma runakunatapas, reypa churinkunatapas, wak llaqta p'achawan llapa p'achakuqkunatapas.

⁹Chay p'unchaypiqa muchuchillasaqtaqmi wasikunaman suwakuq phawaykuqkunata, diosninkuq wasinman suwakusqankuwan q'otusqankuwan hunt'achiqkunata, nispa.

¹⁰Señor Diosmi nin: Chay p'unchaypin Jerusalenpi Challwa Punkumantapacha qaparinqaku, yapasqa mosoq llaqtamantapacha qaparkachanqaku, moqokunamantapacha raqhaqaqayta uyarinqaku.

¹¹Llaqtaq ura kinrayninpi tiyaqkuna, waqaychis, chaypi kaq llapa qhatuqkunan wañunqa, qolqewan llapa negociaqkunan wañuchisqa kanqaku.

¹²Chay p'unchaykunapin lamparata hap'ispay Jerusalén llaqtapi k'uchun-k'uchunta maskhasaq, hinaspan q'ayma vino hina runakunata llakhi tiyaq runakunata muchuchisaq, paykunan sonqonkupi ninku: Manan Señor Diosqa allintapas mana allintapas ruwanqachu, nispa.

¹³Chaymi qhapaq-kayninkuqa qechusqa kanqa, wasinkupas raqayman tukuchisqa kanqa. Wasikunatan perqanku, ichaqa manan chaykunapi tiyanqakuchu, uvas chakratan ruwanqaku, ichaqa manan vinota ukyanqakuchu, nispa.

¹⁴Señor Diospa hatun p'unchayninqa qayllaykamushanñan, sispaykamushanñan usqhamushanñan. ¡Uyariychis! Chay sinchi manchakuy p'unchayqa chayamushanñan, kallpasapa runapas khuyaytan qaparinqa.

¹⁵Chay p'unchayqa k'arak phiñakuy p'unchaymi kanqa, llaki-phutiy manchapakuy p'unchaymi kanqa, thuniy purunyachiy p'unchaymi kanqa, tutayaq laqhayaq p'unchaymi kanqa, yana phuyu llanthu p'unchaymi kanqa.

¹⁶Chay p'unchaypin putututa tocanqaku, soldadokunatan waqyanqaku: Allin waqaychasqa llaqtakuna contra hatunkaray torrekuna contra phawaykuychis, nispa.

¹⁷Señor Diosmi nin: Ñoqa contra huchallikusqankurayku runakunata llakiwan ñit'ichisaq, chaymi ñawsa hina purinqaku. Yawarninkun unu hina hich'asqa kanqa, ayankupas hatun hisp'ay hinan wikch'usqa kanqa, nispa.

¹⁸Señor Diospa k'arak phiñakusqan p'unchaypiqa manan qolqenkupas qorinkupas paykunataqa qespichinqachu, Señor Diosqa sienteq kaspanmi kay pachantinta ruphaykachinqa, payqa hukpaqkaman kay pachapi tiyaq llapa runakunata wañuchinqa.