Read Quechua Cuzco Bible 1988 HAGEO 1 Bible Online

HAGEO 1 - Quechua Cuzco Bible 1988 bible

HAGEO 1

¹Rey Darío wata kurakña kamachikushaqtinmi, Salatielpa churin Zorobabelqa Judá suyupi kamachikuq karqan, Josadakpa churin Josuetaq uma sacerdote karqan. Chay watapi soqtakaq killaq qallariynin p'unchaypin Tukuy-atiyniyoq Señor Diosqa profeta Hageowan Zorobabelman Josuemanpas rimaykachirqan: Kay llaqta runakunan nin: Manaraqmi tiempo chayamunchu Señor Diospa wasinta wakmanta sayarichinapaq, nispanku, nispa.

³Chaymantataqmi Tukuy-atiyniyoq Señor Diosqa profeta Hageowan rimaykachirqan:

⁴¿Ima allinmi qankunapaq sumaqchasqa wasikunapi tiyayniykichis, yupaychawanaykichis wasitaq kay hina raqay-raqay kashaqtin?

⁵Manapunin, aswanpas imaynatachus kawsashasqaykichista allinta qhawarikuychis.

⁶Askhatan tarpurqankichis, ichaqa pisillatan cosecharqankichis. Askhatan mikhunkichis, ichaqa manan saksankichischu. Ukyankichismi, ichaqa ch'akichikunkichisraqmi. P'achakunkichismi, ichaqa manan q'oñirinkichischu. Llank'apakuqpas t'oqo ch'uspaman hinan pagonta kachaykun.

⁷Chhaynaqa, imaynatachus kawsasqaykichista allinta qhawarikuychis.

⁸Orqokunata wichaspa kurkukunata apamuychis, hinaspa yupaychana wasita wakmanta sayarichiychis. Ñoqan chaywan kusikusaq, hinaspan hatunchasqa kasaq.

⁹Askha cosecha hoqariytan yuyaykurqankichis, ichaqa pisillatan hoqarirqankichis. Wasiman taqesqaykichistapas phukurparispan ch'usaqyachirqani. ¿Imanaqtin? Wasiyqa raqay-raqayraqmi kashan, qankunataqmi wasillaykichista ruwakushankichis.

¹⁰Chaymi sulla mana kapurqanchu, chakrapas manan ruruchirqanchu.

¹¹Ñoqan ch'akiriyta chayachimurqani chakrakunamanpas, orqokunamanpas, trigomanpas, uvas chakramanpas, olivo sach'akunamanpas, llapa hallp'a rurumanpas, runakunamanpas, uywakunamanpas, llapa llank'akusqaykichismanpas. Ñoqa Tukuy-atiyniyoq Señor Diosmi chayta nini, nispa.

¹²Hinaqtinmi Zorobabelpas, uma sacerdote Josuepas, Babilonia suyumanta llapa kutimpuqpas Apu Señor Diosninkuq siminta uyarispa, kachasqan profeta Hageoq siminta kasukurqanku. Hinaspan llapallanku Señor Diosta manchakurqanku.

¹³Hinamantan Señor Diospa willaqnin Hageoqa paykunaman willarqan: Señor Diosmi nin: Ñoqaqa qankunawanmi kashani, nispan, nispa.

¹⁴Ahinatan Señor Diosqa Salatielpa churin Judá suyupi kamachikuq Zorobabelpa sonqonta kuyurichirqan, hinallataq Josadakpa churin uma sacerdote Josuepa sonqontapas, Babilonia suyumanta llapa kutimuqpa sonqontapas kuyurichirqan. Chaymi rey Darío wata kurakña kamachikushaqtin, soqtakaq killaq iskay chunka tawayoq p'unchayninpi hamuspa, Tukuy-atiyniyoq Señor Diosninkuq wasinta wakmanta sayarichiyta qallarirqanku.