Read Quechua Cuzco Bible 1988 HAGEO 2 Bible Online

HAGEO 2 - Quechua Cuzco Bible 1988 bible

HAGEO 2

¹Qanchiskaq killaq iskay chunka hukniyoq p'unchayninpin Señor Diosqa profeta Hageota nillarqantaq:

²Judá suyupi kamachikuq Zorobabelman, hinallataq Josuemanpas, Babilonia suyumanta llapa kutimuqmanpas nimuy:

³¿Mayqenniykichispas kashankichisraqchu kay yupaychana wasiq ñawpaq sumaq-kayninta rikuq? Kunanri, ¿imayna kashaqtataq rikushankichis? Kay wasitaqa mana imata hinan rikushankichis riki.

⁴Chaypas Tukuy-atiyniyoq Señor Diosmi nin: Zorobabel, ¡kallpachakuy! Uma sacerdote Josué, ¡kallpachakuy! ¡Kallpachakullaychistaq, suyuntin runakunapas! ¡Llank'aychis! Ñoqaqa qankunawanmi kashani.

⁵Egipto suyumanta hamuqtiykichis qankunawan rimanakusqayman hinan Espirituyqa qankunawan kashanqa. Ama manchapakuychischu.

⁶Kay pisi tiempollamantan chhaphchichisaq hanaq pachatapas, kay pachatapas, mama qochatapas, ch'aki hallp'a patatapas.

⁷Llapan hatun suyukunatapas chhaphchichillasaqtaqmi, hinan qhapaq-kayninkuta kayman apamunqaku. Yupaychana wasiytataq anchata qhapaqchasaq.

⁸Ñoqaqmi qolqepas, ñoqaqmi qoripas.

⁹Kay qhepakaq wasiq sumaq-kayninqa aswanraqmi kanqa ñawpaqkaqmantaqa. Kayneqpitaq sumaqta tiyachisqaykichis. Ñoqa Tukuy-atiyniyoq Señor Diosmi chayta nini, nispayki, nispa.

¹⁰Rey Darío wata kurakña kamachikushaqtinmi isqonkaq killaq iskay chunka tawayoq p'unchayninpi Tukuy-atiyniyoq Señor Diosqa profeta Hageoman rimaykurqan:

¹¹Sacerdotekunata kamachikuy simimanta tapukuy:

¹²Pipas Diospaq t'aqasqa aychata p'achanpi unkhunman, chaypa ch'ullpantaq tupaykunman t'antatapas, chayrutapas, vinotapas, aceitetapas, ima mikhunatapas chayqa, ¿chayraykuchu chay mikhunaqa ch'uyayachisqa kapunqa? nispayki, nispa. Chayta Hageo tapuykuqtinmi, sacerdotekunaqa: —Manan, nirqanku.

¹³Hinan Hageoqa nirqan: —Pipas huk ayata tupaykusqanrayku qhelli kashaspa chaykunata llamiykunman chayqa, ¿manachu chaykunapas qhelli kapunqa? nispa. Sacerdotekunataq: —Qhellipunin kanqa, nirqanku.

¹⁴Chaymi Hageoqa nirqan: —Señor Diosmi nin: Chay hina qhellin qayllaypi kay suyu runakunapas, tukuy ruwasqankupas, tukuy ima haywawasqankupas.

¹⁵Kunanqa, kay p'unchaykama imakunachus pasasqanta sonqoykichispi yuyaykuychis. Ñoqa Señor Diospa wasiyta manaraq wakmanta sayarichishaqtiykichis,

¹⁶¿iman sucederqasunkichis? Pipas iskay chunka arroba huñusqa trigota tariyta yuyaspanmi, chunka arroballataña tarirqan. Pipas phisqa chunka p'uyñuman vino wisiyta yuyaspa uvas sarunaman chayaspanmi, iskay chunka p'uyñullapaqña tarirqan.

¹⁷Ruphashaq wayrawanmi polvillowanmi chikchiwanmi llapa llank'asqaykichista chaqorqani, chaypas manan kutirikamuwarqankichischu.

¹⁸Kay isqonkaq killaq iskay chunka tawayoq p'unchayninpin wasiyta teqsichashankichis. Chay hinaqa, kunanmanta qhepaman imakunachus kananta sonqoykichispi yuyaykuychis.

¹⁹Taqepi muhupas manañan kapunchu, manataq uvas yurapas, higos sach'apas, granada sach'apas, olivo sach'apas rurunraqchu, chaypas kay p'unchaymantapachan saminchasqaykichis, nispan, nispa.

²⁰Chay killaq iskay chunka tawayoq p'unchaynillanpitaqmi, Señor Diosqa iskaykaq kutipi Hageota nirqan:

²¹Judá suyupi kamachikuq Zorobabelman nimuy: Tukuy-atiyniyoq Señor Diosmi nin: Ñoqan hanaq pachatapas kay pachatapas chhapchirisaq.

²²Kay pacha suyukunaq kamachikuy tiyanankutapas thunisaqmi, hatun suyukunaq atiynintapas qolluchisaqmi. Kumparqarisaqmi awqa-tinkuy carretakunatapas, carreta purichiqkunatapas. Hinan caballokunapas chaykunapi sillakuqkunapas urmaykunqaku, sapanka sillakuqmi runamasinpa espadanwan sat'isqa wañunqa.

²³Chay p'unchaypin kamachiy Zorobabelta hap'isqayki, hinaspan selloyoq anilloywan kamachikuqta hina churasqayki, ñoqa qanta akllakusqayrayku, ñoqa Tukuy-atiyniyoq Señor Diosmi chayta nini, nispayki, nispa.