Read Quechua Cuzco Bible 1988 ZAKARÍAS 1 Bible Online

ZAKARÍAS 1 - Quechua Cuzco Bible 1988 bible

ZAKARÍAS 1

¹Wata kurakña rey Darío kamachikushaqtinmi pusaqkaq killapi Iddoq churin Berekiaspa churin profeta Zakariasman Señor Diosqa rimaykurqan:

²Ñoqa Señor Diosmi machulaykichispaq k'araktapuni phiñakurqani.

³Chayrayku llaqtayta nimuy: Tukuy-atiyniyoq Señor Diosmi nin: Kutirikamuwaychis, ñoqapas kutirimusqaykichismi.

⁴Ama machulaykichiskuna hinachu kaychis, paykunamanmi ñawpa profetakunaqa kunkayoqta nirqanku: Tukuy-atiyniyoq Señor Diosmi nin: ¡Millay kawsasqaykichismanta millay ruwasqaykichismanta kutirikamuwaychis! nispanku. Ichaqa manan uyariwarqankuchu, manan kasuwarqankuchu.

⁵Kunanri, ¿maytaq chay machulaykichiskuna? ¿Wiñaytachu profetakunari kawsanqa?

⁶Kamachiy profetakunawanmi machulaykichisman willachirqani simiykunata kamachikuyniykunata. Chaykunan paykuna contra hunt'akurqan, chaymi paykunaqa kutirikamuwaspa nirqanku: Imaynan Tukuy-atiyniyoq Señor Diosqa yuyaykurqan purisqanchisman hina, ruwasqanchisman hina ruwayta, ahinatan ñoqanchista muchuchiwarqanchis, nispanku, nispa.

⁷Wata kurakña rey Darío kamachikushaqtinmi, Sebat nisqa chunka hukniyoq killaq iskay chunka tawayoq p'unchayninpi ñoqa profeta Zakariasman Señor Diosqa rimaykuwarqan.

⁸Tutan rikhuriyta rikurqani: Huk runan puka-ch'umpi caballopi sillaykusqa kashasqa, paymi wayq'o k'aktupi arrayán ukhupi sayashasqa, qhepanpitaq kashasqa puka-ch'umpi caballokuna, ch'umpi caballokuna, yuraq caballokuna.

⁹Chaymi tapurqani: —Wiraqocháy, ¿imakunataq kaykunari? nispa. Hinan ñoqawan rimaq angelqa niwarqan: —Ñoqan rikuchisqayki imakunachus chaykunaqa kasqanta, nispa.

¹⁰Arrayán ukhupi kashaq runataq nirqan: —Chaykunaqa teqsimuyuntin pachata purimunankupaq Señor Diospa kamachisqankunan, nispa.

¹¹Hinan paykunaqa arrayán ukhupi kashaq Señor Diospa angelninta nirqanku: —Teqsimuyuntin pachatan purimuyku, llapa pachantinmi samakushan, qasishan, nispa.

¹²Chaymi Señor Diospa angelninqa nirqan: —Tukuy-atiyniyoq Señor Diosnilláy, ¿hayk'aqkamataq mana khuyallikunkichu Jerusalentapas Judá llaqtakunatapas? Chaykunapaqmi qanchis chunka wataña phiñasqa kashanki, nispa.

¹³Hinaqtinmi Señor Diosqa ñoqawan rimaq angelman kusirichikuq sumaq simikunata kutichirqan.

¹⁴Chaymantataq ñoqawan rimaq angelqa kayta willanaypaq kamachiwarqan: —Tukuy-atiyniyoq Señor Diosmi nin: Sientenipunin Jerusalenmantapas Sión orqomantapas.

¹⁵K'araktapunin phiñakuni chay llakhi tiyashaq hatun suyukunapaq, ñoqa asllata phiñakushaqtiymi paykunaqa llaqtayta sinchita ñak'arichirqanku.

¹⁶Chaymi ñoqa Tukuy-atiyniyoq Señor Diosqa Jerusalenta wakmanta khuyapayasaq, chaypin wasiyqa wakmanta perqasqa kanqa. Chay hinaqa perqanapaqmi waskhawan tupunqaku, nispan, nispa.

¹⁷Chay angelqa nillawarqantaqmi: —Willamullaytaq: Tukuy-atiyniyoq Señor Diosmi nin: Anchatapunin llaqtaykunataqa wakmanta t'ikarichisaq, Siontaqa wakmantan sonqochasaq, Jerusalentaqa wakmantan akllakusaq, nispa, nispayki.

¹⁸Chaymantataq qhawarispay rikurqani tawa waqra kashaqta.

¹⁹Chaymi ñoqawan rimaq angelta tapurqani: —¿Imataq chay waqrakunari? nispa. Paytaq niwarqan: —Chaykunaqa Judapi, Israelpi, Jerusalenpi tiyaqkunata ch'eqechiq atiyniyoq suyukunan, nispa.

²⁰Chaymantataq Señor Diosqa tawa herrerota rikuchiwarqan.

²¹Ñoqataq tapurqani: —¿Imamantaq kaykunari hamunku? nispa. Hinan payqa niwarqan: —Waqrakunaqa Judá suyuta ch'eqechispan k'uytupachirqanku, kay herrerokunataq ichaqa hamunku chay Judá suyuta ch'eqechiq hatun suyukunata khatatatachispa atipanankupaq, nispa.