Read Quechua Cuzco Bible 1988 ZAKARÍAS 10 Bible Online

ZAKARÍAS 10 - Quechua Cuzco Bible 1988 bible

ZAKARÍAS 10

¹Señor Diosmanta qhepa mita parata mañakuychis, illapata lliphllikichimuq Señor Diosmi allinta parachimunqa, llapapaqtaqmi campopi q'achuta wiñachinqa.

²Wasi idolokunaq willakusqanqa llullan, watuqkunaq rikusqanpas llullan, llulla mosqokusqankutan watunku, sonqochaykuq siminkupas yanqan, chaymi llaqtaqa oveja t'aqa hina pantapun, mana michiqniyoq kaspataq muchushan.

³Chaymi Señor Diosqa nin: Michiqkunapaqmi k'arakta phiñakuni, llaqtay kamachiqkunatan muchuchisaq. Judá runakunaqa ñoqaqmi, ñoqa Tukuy-atiyniyoq Señor Diosmi paykunata oveja t'aqata hina qhawasaq, paykunatan awqa-tinkuypaq kallpasapa caballoman hina tukuchisaq.

⁴Paykunamantan esquina hap'iq rumi sayarimunqa, paykunamantan karpa takarpupas kanqa, paykunamantan awqa-tinkuy wach'ina p'eqtapas kanqa, paykunallamantataqmi tukuy kamachikuqkunapas sayarimunqa.

⁵Awqa-tinkuypi calle t'urukunata saruq soldadokuna hinan kanqaku, ñoqa Señor Diosmi paykunawan kashasaq, chaymi paykunaqa caballoyoq soldadokunatapas maqanakuspa atipanqaku.

⁶Ñoqan Judá runakunata kallpachasaq, Josepa miraynintapas qespichisaq. Paykunataqa llakipayaspaymi maychus tiyanankuman kutichimusaq, manapas wikch'uymanchu karqan hinan kapunqaku, ñoqaqa Apu Señor Diosninkun kani, mañakamuwasqankutan uyarisaq.

⁷Kallpasapa hinan Efraín runakunaqa kanqa, sonqonkupas vinowan hinan kusikunqa, churinkupas chayta rikuspankun kusikunqa. ¡Sonqonkun Señor Diospa ruwasqanwan kusikunqa!

⁸Ñoqan paykunata huñuykamunaypaq señaschasaq, ñoqan paykunataqa horqokampusaqpuni, chaymi ñawpa p'unchaykunapi hina anchatapuni askhayanqaku.

⁹Llaqtakuna ukhumanña paykunata ch'eqechirqani chaypas, karu suyukunamanta yuyarimuwanqaku, paykunapas churinkupas kawsashallanqakupunin, kaymantaqmi kutimpunqakupas.

¹⁰Ñoqan Egipto suyumanta paykunata kutichimusaq, Asiria suyumantapas pusakampusaqmi, Galaadmanpas Libanomanpas paykunataqa apakampusaqmi, manataqmi paykunapaq tiyana aypanqachu.

¹¹Llaki-phutiy qochatan chimpanqaku, chay qochaq phoqchiqesqankunatan ch'inyachisaq, Nilo mayutan ukhukama ch'akichisaq. Asiria suyuq uma hoqarisqantapas k'umuykachisaqmi, Egipto suyuq kamachikusqantapas chinkachisaqmi.

¹²Ñoqan llaqtay runakunata kallpachasaq, chaymi sutiypi purinqaku. Chaytan ñoqa Señor Diosqa nini, nispa.