Read Quechua Cuzco Bible 1988 ZAKARÍAS 11 Bible Online

ZAKARÍAS 11 - Quechua Cuzco Bible 1988 bible

ZAKARÍAS 11

¹Yaw Líbano, punkuykikunata kichariy, cedro sach'aykikunata nina ruphaykunanpaq.

²Yaw ciprés sach'a, waqaykuy, cedro sach'a kumpakapusqanrayku, ancha hatun sach'akuna kumpakapusqanrayku. Yaw Basanpi encina sach'akuna waqaykuychis, k'iski sach'a-sach'a chaqosqa kapusqanrayku.

³Michiqkunan qaparispa waqaykunku, munay q'achukuna chaqosqa kasqanrayku. ¡Leonkunaq qaparisqanta uyariychis, Jordán mayupi mat'i sach'a-sach'an chaqosqa kapushan!

⁴Apu Señor Diosniymi niwarqan: Nak'anapaq kaq ovejakunata michiy.

⁵Chaykunatan rantiqninkunaqa nak'an, manataqmi huchallikuqpaq qhawasqachu kanku. Vendeqninkupas ninkun: Yupaychasqa Señor Diosqa kachun, qhapaqyaykapunin, nispa. Michiqninkupas manan chaykunataqa llakipayanchu.

⁶Ñoqapas manañan chay suyupi tiyaqkunata llakipayasaqchu, aswanpas ñoqan runakunata sapankata runa-masinman reyninmanpas hap'iykachisaq. Chaykunan suyuta sarunchanqaku, manataqmi mayqenninkutapas makinkumanta kacharichisaqchu, nispa.

⁷Hinan nak'anapaq t'aqasqa ovejakunata michirqani oveja rantiqkunapaq. Iskay tawnatataq hap'irqani, huknintan “Sumaq Sonqo Kayta” suticharqani, huknintataq “Hukllachayta” suticharqani. Hinaspan ovejakunata michirqani.

⁸Huk killallapin kinsa michiqkunata qarqorqani. Ovejakunan sinchita umayta nanachiwarqanku, ñoqatapas cheqnikuwarqanku.

⁹Chaymi nirqani: Manañan michisqaykichisñachu. Mayqenpas wañunanpaq kaqqa wañuchun, mayqentapas nak'anqaku chayqa nak'achunku, qhepaqkunapas mikhunakuchunku, nispa.

¹⁰Hinaspan “Sumaq Sonqo Kay” nisqa tawnata hap'ispa p'akirqani, tukuy llaqtakunawan Señor Diospa rimanakusqan p'akisqa kasqan rikhurinanpaq.

¹¹Chay p'unchaypin rimanakusqaqa yanqayachipusqa karqan, chhaynapin qhawarimuwaqniy oveja rantiqkunaqa yacharqanku Señor Diospa simin kasqanta.

¹²Hinamantataq paykunata nirqani: Allinpaqchus hap'inkichis chayqa, pagoyta qopuwaychis, mana chaytaq, saqepuychis, nispay. Hinaqtinmi kinsa chunka qolqeta pagawarqanku.

¹³Chayqa ancha askha qolqetapas qowankuman hinan paykunapaqqa. Chaymi Señor Diosqa niwarqan: Manka ruwaqman wikch'uykuy, nispa. Chaymi chay kinsa chunka qolqeta hap'ispay, Señor Diospa wasinpi kaq manka ruwaqman wikch'uykurqani.

¹⁴Hinamantataq hukkaq “Hukllachay” nisqa tawnata p'akirqani, Judá suyuwan Israel suyuwan wawqe pura kasqankuta t'aqarparinapaq.

¹⁵Huktawanmi Señor Diosqa niwarqan: Huk mana yuyayniyoq michiq hina michiy.

¹⁶Kayqa, ñoqan huk michiqta kay suyupi churasaq. Payqa manan chinkasqata watukunqachu, manan pantapuqtapas maskhanqachu, manan k'irisqatapas hampinqachu, manan qhali ovejatapas mikhuchinqachu, aswanmi wira ovejakunaq aychanta mikhunqa, manan phapatullantapas puchuchinqachu.

¹⁷¡Ay uywa t'aqta saqerpariq michiq! ¡Ay mana valeq michiq! ¡Espada k'irichun makintapas paña ñawintapas! ¡Llapallan makinqa ch'akichun, paña ñawinpas ñawsayaykapuchun! nispa.