Read Quechua Cuzco Bible 1988 ZAKARÍAS 3 Bible Online

ZAKARÍAS 3 - Quechua Cuzco Bible 1988 bible

ZAKARÍAS 3

¹Chaymantataq uma sacerdote Josueta qhawachiwarqan, paymi Señor Diospa angelninpa ñawpaqenpi sayashasqa, Satanastaq payta ch'atananpaq pañaneqenpi sayashasqa.

²Señor Diostaq Satanasta nirqan: —Yaw Satanás, ñoqan phiñariyki, ñoqan Jerusalenta akllakurqani, qantataq phiñariyki. Kay runaqa kanaykusqamanta aysarqamusqa qoqomisqa k'ullun, nispa.

³Josuetaq angelpa ñawpaqenpi qhellillaña p'achawan p'achasqa sayashasqa.

⁴Hinan angelqa kamachinkunata kamachirqan: —Chay qhelli p'achata ch'utiychis, nispa. Hinaspan Josueta nirqan: —Kayqa, huchaykitan qechupuyki, sumaq p'achawantaq p'achachisqayki, nispa.

⁵Chaymantataq nirqani: —Ch'uya mayt'unawan umanman churaychis, nispa. Señor Diospa angelnin sayashanankamataq chaywan umanman churaykurqanku, sumaq p'achawanpas p'achaykachirqanku.

⁶Hinan angelqa Josueta nirqan:

⁷—Tukuy-atiyniyoq Señor Diosmi nin: Ñanniykunapichus purinki, kamachikusqaykunatapas hunt'ankitaqchus chayqa, qanpas yupaychana wasiypin kamachikunki, wasi patioykunatapas waqaychallankitaqmi, qanpas qayllaykamuwayta atillankitaqmi imaynan kay kamachiykunapas qayllaykamuwan hinata.

⁸Uma sacerdote Josué, uyariway. Qankuna Josuepa ñawpaqenpi tiyashaq sacerdote-masikunapas, uyarillawaychistaq. Ñoqan Ch'ikchimusqa sutiyoq kamachiyta pusamusaq, chayrayku qankunaqa llaqtaq allin kananpaq señalkuna kankichis.

⁹¡Qhawariychis Josuepa ñawpaqenpi churasqay rumita! Kay sapallan rumiqa qanchis uyayoqmi, ñoqa kikiymi chay rumipi ch'eqospa qelqasaq, huk p'unchayllapitaqmi kay suyumanta huchata qechusaq.

¹⁰Chay p'unchaypin sapankaykichis runa-masiykichista waqyarinkichis uvas yura k'uchupipas higos sach'a k'uchupipas kuska llanthukunaykichispaq, nispan, nispa.