Read Quechua Cuzco Bible 1988 ZAKARÍAS 6 Bible Online

ZAKARÍAS 6 - Quechua Cuzco Bible 1988 bible

ZAKARÍAS 6

¹Yapamanta wichayman qhawarispataq rikurqani tawa carreta iskay bronce orqo chawpimanta lloqsimushaqta.

²Ñawpaqkaq carretatan puka-ch'umpi caballokuna aysasqa, iskaykaq carretatataq yana caballokuna,

³kinsakaq carretatataq yuraq caballokuna, tawakaq carretatañataq alqa caballokuna.

⁴Chaymi ñoqawan rimaq angelta tapurqani: —Wiraqocháy, ¿imataq chaykunari? nispay.

⁵Angeltaq niwarqan: —Chaykunaqa hanaq pacha tawantin wayran, chaykunan kay pachantinpa Señor Diosninpa ñawpaqenpi kasqankumantaña lloqsishanku.

⁶Yana caballokunaq aysasqan carretaqa wichay suyumanmi rishan, yuraq caballokunaq aysasqanpas inti haykuy suyumanmi rishan, alqa caballokunaq aysasqanpas uray suyumanmi rishan, nispa.

⁷Chay kallpasapa caballokuna lloqsimuspataq kay pachantinman phawariy-phawariyllaña sayasharqanku. Angeltaq chaykunata nirqan: —Teqsimuyuntinman phawaychis, nispa. Hinan pachantinman phawarqanku.

⁸Chaymantataq angelqa waqyawaspa niwarqan: —Suyuman riqkunaqa chay suyupin Señor Diospa phiñakusqanta thasnunku, nispa.

⁹Señor Diosmi niwarqan:

¹⁰Heldaiwan, Tobiaswan, Jedaiaswan, Sofoniaspa churin Josiaspiwanmi Babiloniaman preso apasqa kasqankumanta kutimpunkuña, chayrayku Josiaspa wasinta rispa Heldaimanta, Tobiasmanta, Jedaiasmantawan ofrendata chaskimuy.

¹¹Qolqeta qorita chaskimusqaykiwanmi coronata ruwanki, hinaspa Josadakpa churin uma sacerdote Josuepa umanman churanki.

¹²Chaymantataq payta ninki: Tukuy-atiyniyoq Señor Diosmi nin: Kayqa Ch'ikchimusqa sutiyoq qharin, payqa ch'ikchimuspan t'ikarinqa, hinaspan Señor Diospa wasinta wasichanqa.

¹³Paymi Señor Diospa wasinta wasichanqa, rey hina hatunchasqa kanqa. Kamachikuy tiyananpin kamachikunanpaq tiyaykunqa, paywanmi sacerdote tiyaykunqa, huk sonqollan llank'anqakupas, nispayki.

¹⁴Chay coronaqa Helemta, Tobiasta, Jedaiasta, Sofoniaspa churin Josiastawan yuyarinapaqmi Señor Diospa wasinpi kanqa, nispa.

¹⁵Karupi kaqkunan hamunqaku, hinaspan Señor Diospa wasinta perqaysikunqaku, chaymi yachankichis Tukuy-atiyniyoq Señor Diospa qankunaman kachamusqanta. Chayqa kanqa Apu Señor Diosniykichista uyarispa kasukuqtiykichismi.