Read Quechua Cuzco Bible 1988 ZAKARÍAS 7 Bible Online

ZAKARÍAS 7 - Quechua Cuzco Bible 1988 bible

ZAKARÍAS 7

¹Rey Darío kinsa wata kurakña kamachikushaqtinmi, Kisleu nisqa isqonkaq killaq tawakaq p'unchayninpi Zakariasman Señor Diosqa rimaykurqan.

²Chay pachan Betel llaqta runakunaqa Sarezerta Regem-melekta runankunatawan Tukuy-atiyniyoq Señor Diospa wasinman kacharqanku paymanta mañakamunankupaq,

³sacerdotekunatapas profetakunatapas tapumunankupaq: ¿Wakin watakunapi ruwamusqanchista hinachu Señor Diospa wasin thuniykusqamanta sapa wata phisqakaq killapi waqaspa ayunankichis? nispa.

⁴Hinan Tukuy-atiyniyoq Señor Diosqa niwarqan:

⁵Suyuntin runakunatapas sacerdotekunatapas tapumuy: Kay qanchis chunkantin wata phisqakaq killapipas qanchiskaq killapipas ayunaspaykichis waqaspaykichisqa, ¿ñoqallapaqchu ayunarqankichis?

⁶Mikhuspaykichispas ukyaspaykichispas, ¿manachu allinniykichispaq mikhurqankichispas ukyarqankichispas?

⁷¿Manachu qankunaqa yachankichis ñawpaq profetakunaman Señor Diospa rimasqanta, Jerusalenpas muyuriqnin llaqtakunapas runa hunt'ataq thak-nisqataq kashaqtin, Neguev ch'inneqpas Shefela nisqa moqo-moqopas runa hunt'a kashaqtin? nispayki, nispa.

⁸Señor Diosmi ñoqa Zakariasta nillawarqantaq:

⁹Ñoqa Tukuy-atiyniyoq Señor Diosmi llaqtaytaqa ñawpaqtaña nirqani: Chanintapuni kuskachaychis, khuyapayanakuychis llakipayanakuychis.

¹⁰Ama sarunchaychischu viudatapas, mana tayta-mamayoqtapas, wak llaqtayoqtapas, wakchatapas. Amataq sonqoykichispi yuyaykuychischu mana allinta ruwanakunaykichispaqqa, nispay.

¹¹Ichaqa manan kasukuyta munarqankuchu, aswanpas qheparparirqankun, uyariq roqt'un kapurqankupas.

¹²Sonqonkutapas ch'ila rumiman hinan tukuchirqanku yachachikuy simitapas kamachikuykunatapas mana uyarinankupaq, chaykunatan Espirituyqa ñawpa profetakunawan willachirqan. Chaymi ñoqa Tukuy-atiyniyoq Señor Diosqa sinchita phiñakurqani.

¹³Imaynan paykunaman waqyakuqtiy mana uyariwarqankuchu, chhaynatan ñoqapas waqyakamuwaqtinku mana uyarirqanichu.

¹⁴Aswanmi mana rikusqanku llapa hatun suyukunaman muyuq wayrawan hina paykunataqa ch'eqechirqani. Kay suyunkutaq mana pipas tiyaq kapuqtin qhepankuta purunyapurqan. ¡Chay hina sumaq suyutan purunman tukuchipurqanku! nispa.