Read Quechua Cuzco Bible 1988 MATEO 10 Bible Online

MATEO 10 - Quechua Cuzco Bible 1988 bible

MATEO 10

¹Jesusqa chunka iskayniyoq yachachisqankunata waqyaspan, paykunaman atiyta qorqan supaykunata runakunamanta qarqonankupaq, imaymana onqoytapas nanaytapas qhaliyachinankupaqwan.

²Chay chunka iskayniyoq yachachisqakunatan apostolta*f** suticharqan. Paykunan karqan: Ñawpaqkaqmi Pedro sutichasqa Simón, wawqen Andrespiwan, Zebedeoq churinkuna Jacobo, Juanpiwan,

³Felipe, Bartolomé, Tomás, contribución cobraq Mateo, Alfeoq churin Jacobo, Tadeo,

⁴Zelote*f** nisqa t'aqamanta Simón, Judas Iscariotepiwan, paymi Jesusta hap'ichiqqa karqan.

⁵Jesusmi chay chunka iskayniyoq yachachisqankunata kachaspa kay hinata kamachirqan: —Mana Judío runakunaq hallp'antaqa aman rinkichischu, Samaria provinciapi kaq llaqtakunamanpas aman haykunkichischu,

⁶aswanpas Israel runakunaman riychis, paykunaqa chinkasqa ovejakuna hinan kashanku.

⁷Rispataq willamuychis: Kunanqa Diosñan kamachikunqa, nispa.

⁸Onqosqakunatan qhaliyachinkichis, aycha qaranpi millay onqoyniyoqkunatan qhaliyachinkichis, wañusqakunatan kawsarichinkichis, supaykunatan runakunamanta qarqonkichis. Kay atiytaqa yanqallan chaskirqankichis, yanqallataqmi qonkichispas.

⁹Ama qoritapas, qolqetapas, cobretapas apaychischu.

¹⁰Amallataq apaychischu qoqawatapas, iskay p'achatapas, usut'atapas, tawnatapas. Llank'aqqa necesitasqanta chaskinanpunin, chay hinan qankunapas chaskinaykichispuni.

¹¹May llaqtamanpas may ayllumanpas haykuspaykichisqa, tapukuychis pichus chaypi allin runa kasqanta, hinaspa chaypi samakuychis ripunaykichiskama.

¹²Wasiman haykuspaykichisqa napaykunkichismi chaypi kaqkunata.

¹³Wasipi kaqkunachus allin kanqa chayqa, chaypi kaqkunaman saminchayniykichis chayachun, mana allin kaqtintaq ichaqa, saminchayniykichis qankunaman kutimpuchun.

¹⁴Pipas mana chaskisuqtiykichisqa, manallataq rimasqaykichistapas uyarisuqtiykichisqa chay wasimanta otaq llaqtamanta lloqsispa, usut'aykichispi hallp'atapas chhaphchirparinkichis.

¹⁵Cheqaqtan niykichis, taripay p'unchaypiqa chay llaqtan aswan muchuchisqa kanqa Sodoma llaqtamantapas Gomorra llaqtamantapas.

¹⁶Ñoqan kachaykichis atoqkunaq kasqanman ovejakunata hina. Chay hinaqa mach'aqwaykuna hina yuyaysapa kaychis, ichaqa urpikuna hina mana tupapakuq kaychis.

¹⁷Cuidakuychis, runakunan juezkunaq huñunakuyninman apasunkichis, Diosmanta yachachina wasikunapipas suq'asunkichis.

¹⁸Ñoqaraykutaqmi kamachikuqkunamanpas reykunamanpas apasqa kankichis, ahinapin ñoqamanta willankichis paykunamanpas mana Judío runakunamanpas.

¹⁹Kamachikuqkunaman apasuqtiykichisqa, aman llakipakunkichischu imaynatachus, imatataqchus kutichinaykichista, chay ratoqa Diosmi yuyaychasunkichis imaynatachus kutichinaykichistaqa.

²⁰Manan qankunachu rimankichisqa, aswanpas Yayaykichispa Espiritunmi qankunata rimachisunkichis.

²¹Wawqen wawqenta wañuchinapaq hap'iykachinqa, taytapas churinta wañuchinapaq hap'iykachinqa. Wawakunapas tayta-mamanku contra hatarispan wañuchinqaku.

²²Ñoqaraykun lliwpa cheqnisqan kankichis, ichaqa p'uchukaykama allintapuni sayaqtan Diosqa qespichinqa.

²³Huk llaqtapi qatiykachasunkichis chayqa, hukkaq llaqtamanmi ayqenkichis. Cheqaqtan niykichis, manan Israel llaqtakuna puriyta tukunkichischu Diospa Kachamusqan Runaq hamunankama.

²⁴Yachachisqaqa manan yachachiqninmantaqa aswan yachayniyoqchu, manallataq kamachipas patronninmantaqa atiyniyoqchu.

²⁵Yachachisqapaqqa allinmi kanman yachachiqnin hina kaynin, kamachipaqpas patronnin hina kaynin. Ñoqata taytaykichis hina kashaqtiy Beelzebú nispa sutichashawanku chayqa, imataraqtaq qankunataqa sutichasunkichis, nispa.

²⁶Jesusqa nillarqantaqmi: —Chay hinaqa, ama chay runakunataqa manchakuychischu. Lliw qatasqa kaqtapas pakasqa kaqtapas Diosmi rikhurichinqa.

²⁷Pakallapi qankunaman nisqayta sut'ipi niychis, ninrillapi uyarisqaykichistapas wasi patakunamanta willakuychis.

²⁸Ama cuerpoykichis wañuchiqkunataqa manchakuychischu, manan almaykichistaqa wañuchinqakuchu, aswanpas manchakuychisqa Diosta, paymi almata cuerpotawan infiernoman wikch'uykunanpaq atiyniyoqqa.

²⁹¿Manachu iskay pichitankaqa huch'uy qolqeman vendekun? Chaywanpas, manan huknillanpas wañunchu Yayaykichis mana munaqtinqa.

³⁰Qankunaqqa chukchaykichispas llapanmi yupasqa kashan.

³¹Chay hinaqa, aman manchakunkichischu, qankunaqa askha pichitankamantapas aswan chaniyoqmi kankichis.

³²Pipas runakunaq qayllanpi “reqsinin” niwaqniytaqa, ñoqapas “reqsinin” nillasaqtaqmi hanaq pachapi kaq Yayaypa qayllanpi.

³³Ichaqa pipas runakunaq qayllanpi “manan reqsinichu” niwaqniytaqa, ñoqapas “manan reqsinichu” nillasaqtaqmi hanaq pachapi kaq Yayaypa qayllanpi, nispa.

³⁴Jesusqa nillarqantaqmi: —Ama yuyaychischu kay pachaman hamusqaywan thak-kay kanantaqa. Manan thak-kaytachu apamuni, aswanpas ñoqa hawan espadawan maqanakunqaku.

³⁵Ñoqaqa hamuni churita taytanwan, ususita mamanwan, qhachunta suegranwan t'aqanachinaypaqmi.

³⁶Runaq awqankunaqa kikin familiallantaqmi kanqa.

³⁷Taytantapas mamantapas ñoqamanta astawan munakuqqa, manan ñoqapaq hinachu, churintapas ususintapas ñoqamanta astawan munakuqqa, manallataqmi ñoqapaq hinachu.

³⁸Ñoqarayku wañunankama ñak'ariyta mana munaqqa, manan ñoqapaq hinachu.

³⁹Pipas pay kikillanta waqaychakuyta munaqqa wiñaypaqmi chinkapunqa, pipas ñoqarayku wañuqmi ichaqa wiñaypaq kawsanqa.

⁴⁰Pipas qankunata chaskiqqa ñoqatan chaskiwan, ñoqata chaskiqtaq kachamuwaqniy Yayayta chaskin.

⁴¹Pipas Diospa kachamusqan profetata chaskiqqa, profetaq*f** chaskinan premiota hinallataqmi chaskinqa, pipas chanin runata chaskiqqa chanin runaq chaskinan premiota hinallataqmi chaskinqa.

⁴²Pipas yachachisqaykunamanta pisipaq qhawarisqa runaman yachachisqay kasqanrayku huk vaso chiri unullatapas haywariqqa, premiontaqa chaskinqapunin, nispa.