Read Quechua Cuzco Bible 1988 MATEO 11 Bible Online

MATEO 11 - Quechua Cuzco Bible 1988 bible

MATEO 11

¹Jesusmi chunka iskayniyoq yachachisqankunata yachachispaña chaymanta ripurqan Galilea provincia llaqtakunapi yachachispa Diosmanta allin willakuykunata willamunanpaq.

²Juanqa carcelpi kashaspanmi Diospa Kachamusqan Cristoq ruwasqankunata uyarirqan, hinaspan iskay yachachisqankunata payman kacharqan:

³—Dios-si huk runata kachamunan karqan, ¿chaychu qanqa kanki? Icha, ¿huktataqchu suyakusaqku? nispa tapumunankupaq.

⁴Hinan Jesusqa paykunata nirqan: —Riychis, uyarishasqaykichista rikushasqaykichistawan Juanman willamuychis.

⁵Ñawsakunan qhawarin, wist'ukunan purin, aycha qaranpi millay onqoyniyoqkunan alliyan, roqt'ukunan uyarin, wañusqakunan kawsarin, wakchakunamantaq Diosmanta allin willakuykuna willakun.

⁶Kusisamiyoqmi ñoqamanta mana p'enqakuqqa, nispa.

⁷Paykuna ripuqtintaq, Jesusqa runakunaman Juanmanta nirqan: —¿Ima qhawaqtaq ch'inneqta rirqankichis? ¿Wayraq maywiykachasqan soqosta qhawaqchu rirqankichis?

⁸Chayri, ¿ima qhawaqtaq rirqankichis? ¿Sumaq p'achawan p'achaykusqa runata qhawaqchu? Sumaq p'achawan p'achasqakunaqa reykunaq wasinpin kashanku riki.

⁹Chayri, ¿ima qhawaqtaq rirqankichis? ¿Profetata*f** qhawaqchu? Arí, profeta qhawaqmi. Niykichismi, payqa profetamantapas aswan kurakmi.

¹⁰Juanmantaqa kay hinatan Diospa Simin Qelqaqa nin: Willaqniytan ñawpaqeykita kachani, paymi ñanta hamunaykipaq allichanqa, nispa.

¹¹Cheqaqtan niykichis: Bautizaq Juan hinaqa manan pipas karqanchu, chaywanpas Diospa kamachikushasqanpiqa aswan huch'uykaqmi Juanmanta aswan kurak.

¹²Bautizaq Juanpa tiemponmantapacha kunankaman Diospa kamachikushasqanmanqa awqakuna phawaykunku, kallpayoqkunataq chayta hap'irqoyta munanku.

¹³Llapa profetakunapas*f** Moisespa qelqasqan kamachikuypas Juanpa hamunankamallan Diospa kamachikunanmanta willakurqanku.

¹⁴Creeytachus munankichis chayqa, paymi hamunan karqan chay Eliasqa.

¹⁵Uyarinanpaq ninriyoqqa uyarichun.

¹⁶¿Pimantaq kay tiempo runakunata rikch'achisaq? Plazakunapi tiyaykuspa waqyanakuq erqekunamanmi rikch'achisaq.

¹⁷Paykunan waqyanakunku: —Qenatan tocapuykiku, manataq tusunkichischu, llakikuy harawitan takipuykiku, manataq waqankichischu, nispa.

¹⁸Bautizaq Juanmi hamurqan, payqa pisillatan mikhurqan, manataqmi vinotapas ukyarqanchu, ninkutaq: Supaypa hunt'aykusqanmi, nispa.

¹⁹Diospa Kachamusqan Runa hamuspa mikhuqtiymi ukyaqtiymi ninkichis: Kayqa rakrapun, machaqmi, contribución cobraqkunaqpas, huchasapakunaqpas amigonmi, nispa. Chaywanpas Diospa yachayninqa ruwasqankunawanmi reqsichikun, nispa.

²⁰Wakin llaqtakunapin Jesusqa askha milagrokunata ruwarqan, ichaqa runakunan Diosman mana kutirikurqankuchu, chaymi Jesusqa paykunata anyaspa nirqan:

²¹—¡Imaynaraqmi kanki, Corazín llaqta! ¡Imaynaraqmi kanki, Betsaida llaqta! Tiro llaqtapipas Sidón llaqtapipas qankunapi hina milagrokuna ruwakunman karqan chayqa, unayñachá huchata saqepuspa Diosman kutirikunkuman karqan, hinaspan llakikuymanta usphawan hach'ikuspa llaki p'achawan churakunkuman karqan.

²²Chayraykun niykichis, taripay p'unchaypiqa qankunan aswan muchuchisqa kankichis Tiro llaqtapi Sidón llaqtapi tiyaqkunamantapas.

²³Yaw Capernaum llaqta, ¿yuyankichu hanaq pachaman hoqarisqa kayta? Manan. Wañuy-pachaman wikch'uykusqan kanki. Qanpi ruwasqay milagrokuna Sodoma llaqtapi ruwakunman karqan chayqa, kunankaman kashanman karqan.

²⁴Chayraykun niykichis taripay p'unchaypiqa qankunan aswan muchuchisqa kankichis Sodoma llaqtapi tiyaqkunamantaqa, nispa.

²⁵Chaypachan Jesusqa Diosmanta mañakuspa nirqan: —Yayáy, hanaq pachapipas kay pachapipas munaychakuqmi kanki. Kay yachaykunatan yachayniyoqkunamanta yuyayniyoqkunamantawan pakaykurqanki, hinaspan wawakuna hina kaqkunaman sut'incharqanki. Chaymi graciasta qoyki.

²⁶Arí, Yayáy, chay hinatapunin munarqanki, nispa.

²⁷Hinaspan Jesusqa yachachisqankunaman nirqan: —Tukuy imaymanatan Yayayqa qowan. Manan pipas ñoqa Churintaqa reqsiwanchu, aswanpas Yayallan, manataq pipas Yayataqa reqsinchu, aswanpas ñoqa Churillan, pimanchus ñoqa Churiqa reqsichiyta munani chayllapiwanmi Yayataqa reqsin.

²⁸Ñoqaman hamuychis llapa sayk'usqakuna q'episapakuna, ñoqan samachisqaykichis.

²⁹Yogoyqa ch'usallan, q'eqiypas manan llasachu. Chayrayku yugoyman k'umuykukuychis, hinaspa ñoqamanta yachaqakuychis llamp'ulla, huch'uyyaykukuq sonqoyoq kasqayta, chaymi qankunaqa samakuyta tarinkichis, nispa.