Read Quechua Cuzco Bible 1988 MATEO 12 Bible Online

MATEO 12 - Quechua Cuzco Bible 1988 bible

MATEO 12

¹Huk kutinmi Jesusqa yachachisqankunapiwan samana p'unchaypi chakra-chakranta risharqan. Hinan yachachisqankunaqa yarqay hap'iqtin trigo umata k'aptaspa mikhurqanku.

²Fariseokunataq*f** chayta rikuspa Jesusta nirqanku: —Qhawariy, yachachisqaykikunaqa samana p'unchaypi Diospa kamachikuyninta p'akispan ruwashanku, nispa.

³Hinan Jesusqa paykunata nirqan: —¿Manachu leerqankichis Davidpa ruwasqanta? Paymi yarqachikuspa runankunapiwan Dios yupaychana wasiman haykuspa Diospa ñawpaqenpi churana t'antakunata mikhurqan, runankunamanpas qoykullarqantaq. Chay t'antakunataqa sacerdotekunallan mikhuqku.

⁴

⁵¿Manallataqchu Diospa kamachikuy siminpi leerqankichis? Chaypin willakun samana p'unchaykunapi sacerdotekunaqa Dios yupaychana wasipi llank'ashaspa mana huchallikusqankuta.

⁶Niykichismi, Dios yupaychana wasimantapas aswan chaniyoq kaqqa kaypin kashan.

⁷Diospa Simin Qelqan nin: Khuyapayakuq kanaykichistan munani, manan sacrificio haywawanaykichistachu munani, nispa. Chayta yachaspaykichisqa manachari huchachawaqchischu karqan mana huchallikuqkunataqa.

⁸Chaymi ñoqaqa Diospa Kachamusqan Runa kaspa samana p'unchaypi imatachus ruwanankupaq kamachikunaypaq atiyniyoq kani, nispa.

⁹Jesusmi chaymanta rispa Diosmanta yachachina wasinkuman haykurqan.

¹⁰Chaypin kasharqan hukkaq makin ch'akisqa runa. Hinan wakin runakunaqa Jesusta huchachayta munaspa tapurqanku: —¿Diospa kamachikuyninqa samana p'unchaypi qhaliyachinatachu kamachikun? nispa.

¹¹Jesustaq paykunata nirqan: —¿Mayqenniykichistaq huk ovejaykichis samana p'unchaypi t'oqoman urmaykuqtin mana horqowaqchischu?

¹²¡Runaqa aswan chaniyoqraqmi ovejamantaqa! Chay hinaqa, atikunmi samana p'unchaypi allinkaqta ruwayqa, nispa.

¹³Chaymantataq ch'akisqa makiyoq runata nirqan: —Makiykita haywarimuy, nispa. Runataq haywarimurqan, chaymi hukkaq makin hina qhaliyarqapurqan.

¹⁴Fariseokunataq*f** lloqsispa rimanakurqanku Jesusta wañuchinapaq.

¹⁵Jesusqa chayta yachaspan chaymanta ripurqan, hinan askha runakuna qhepanta rirqanku. Jesusmi llapa onqosqakunata qhaliyachirqan.

¹⁶Paykunatan allin-allinta kamachirqan ama paymanta rimarinankupaq.

¹⁷Ahinapin profeta*f** Isaiaspa nisqan hunt'akurqan. Isaiasmi nirqan:

¹⁸Kayqa kamachiymi, ñoqan payta akllakurqani, paytan munakuni, paymi kusichiwan. Paymanmi Espirituywan hunt'aykusaq, hatun suyukunamanmi chanin-kayta willanqa.

¹⁹Manan churanakunqachu, manan qaparkachanqachu, manan pipas callekunapi kunkanta uyarinqachu.

²⁰Manan q'echusqa soqostaqa p'akinqachu, manan q'osñishaq mechatapas wañuchinqachu, llapa runa chaninkaqtapuni ruwanankama.

²¹Hatun suyukunan paypi suyakunqaku, nispa.

²²Jesusmanmi pusamurqanku supaypa ñak'arichisqan ñawsa upa runata, paytan qhaliyachirqan, hinan chay ñawsa upaqa qhawarispa rimarirqan.

²³Llapan runataq musphaspa ninakurqanku: —¿Paychu icha Rey Davidpa mirayninqa kanpas? nispa.

²⁴Fariseokunataq*f** chayta uyarispa nirqanku: —Kay runaqa supaykunata kamachiq Beelzebupa hunt'aykusqanmi kashan, chaymi supaykunata qarqon, nispa.

²⁵Jesusmi yuyaykushasqankuta yachaspa nirqan: —Mayqen suyupipas runakuna cheqninakunqa chayqa, chay suyuqa tukukapunqan. Mayqen llaqtapas, mayqen familiapas t'aqanasqa kaspaqa manan takyanqachu.

²⁶Satanastaqchus payllatataq qarqokunqa chayqa, pay kikinmi t'aqanasqa kanqa, kamachikuyninpas tukukapunqan.

²⁷Qankunan ninkichis Beelzebupa atiyninwan supaykunata qarqosqayta. Chay hinari, ¿t'aqaykichis runakunaqa piqpa atiyninwantaq supaykunata qarqonku? Chayraykun paykunaqa pantasqaykichista rikuchisunkichis.

²⁸Ñoqaqa Diospa Espiritunwanmi supaykunata qarqoni, chaymi sut'inchan Diosqa kaypiña kamachinasuykichispaq kashasqanta.

²⁹Pipas kallpasapa runaq kaqninkunata suwakunanpaq wasinman haykuqqa ñawpaqtaraqmi chay runata mayt'unan. Chaymantaraqmi wasintaqa suwanman.

³⁰Pipas mana ñoqawan kaqqa ñoqa contran, pipas mana ñoqawan huñuqqa ch'eqechinmi, nispa.

³¹Chayraykun niykichis, Diosmi llapa huchatapas pay contra rimasqatapas pampachanqa, Santo Espíritu contra mana allinta rimaspa pisichaq runan ichaqa, mana pampachasqachu kanqa.

³²Pipas Diospa Kachamusqan Runaq contranpi ima simitapas rimaqqa pampachasqan kanqa, pipas Santo Espíritu contra rimaqmi ichaqa mana pampachasqachu kanqa, kunan p'unchaykunapas qhepa p'unchaykunamanpas.

³³Reqsiychis, allin sach'aqa allintan rurun, mana allin sach'ataq mana allinta rurun, sach'aqa rurusqanpin reqsichikun.

³⁴¡Mach'aqway hinan kankichis! ¿Imaynatan atiwaqchis allinkuna rimayta mana allin kashaspa? Imachus sonqopi hunt'a kashan chaytan simiqa riman.

³⁵Allin runaqa, sonqonpi allinkaqkunatan riman, sonqonpi allinkaqkuna kasqanrayku, mana allin runataq mana allinkaqkunata riman, sonqonpi mana allinkaqkuna kasqanrayku.

³⁶Ñoqan niykichis, taripay p'unchaymi tukuy mana valeq simi rimasqaykichismanta Diosman cuentata qonkichis.

³⁷Rimasqaykiman hinan Diosqa juzgasunki mana huchachasqa kanaykipaqpas huchachasqa kanaykipaqpas, nispa.

³⁸Chaymantataq kamachikuy simita wakin yachachiqkunapas fariseokunapas*f** Jesusta nirqanku: —Yachachikuq, milagro ruwashaqtan rikuyta munaykiku, nispa.

³⁹Chaymi Jesusqa nirqan: —Yaw, Diosta mana kasukuq millay runakuna, milagro ruwanaytan munashankichis, ichaqa manan milagrota rikuchisqaykichischu, aswanpas profeta Jonasta sucedesqallantan milagrota hina rikuchisqaykichis.

⁴⁰Imaynan Jonasqa kinsa p'unchayta kinsa tutatawan hatun challwaq wiksanpi karqan, chay hinallataqmi Diospa Kachamusqan Runapas kinsa p'unchayta kinsa tutatawan hallp'aq sonqonpi kasaq.

⁴¹Nínive llaqta runakunan taripay p'unchaypi kawsarimuspa qankunata huchachasunkichis, Jonaspa willasqanwan huchankuta saqespa Diosman kutirikusqankurayku. Qhawariychis, Jonasmantapas aswan allin willakuqmi kaypi kashan.

⁴²Chay hinallataqmi Sabá suyu reinapas taripay p'unchaypi kawsarimuspa qankunata huchachasunkichis, sinchi karumanta rey Salomonpa yachayninta uyariq hamusqanrayku. Qhawariychis, rey Salomonmantapas aswan yachayniyoqmi kaypi kashan, nispa.

⁴³Supayqa runamanta lloqsispanmi ch'aki purunkunapi purin samakuyta maskhaspa, manataq tarinchu.

⁴⁴Hinaspan nin: Lloqsimusqay wasiymanmi kutipusaq, nispa. Chayaspataq chay runaq sonqontaqa tarin ch'usaq, pichasqa, allinchasqa wasita hina.

⁴⁵Chaymi kutispa pusarqamun paymanta aswan mana allin wak qanchis supaykunatawanraq, haykuspataq chaypi tiyanku. Hinan chay runaqa ñawpaq kawsayninmantapas aswan millayraq qhepamanqa kapun. Chay hinallataqmi kay tiempo millay runakunawanpas kanqa, nispa.

⁴⁶Jesusqa runakunaman rimaykushaqtinmi, maman wawqenkunapiwan chayamuspa hawapi kasharqanku, paywan rimayta munaspanku.[1]

⁴⁷Chaymi huk runa Jesusman willarqan: —Mamaykin wawqeykikunapiwan hawapi kashanku qanwan parlaykuyta munaspa, nispa.

⁴⁸Jesustaq willaqnin runata nirqan: —¿Pitaq mamayri, pikunataq wawqeykunapas? nispa.

⁴⁹Yachachisqankunaman makinta haywarispataq nirqan: Kaykunan mamaypas wawqeykunapas.

⁵⁰Pipas hanaq pachapi kaq Yayaypa munayninta ruwaqmi wawqeypas panaypas mamaypas, nispa.