Read Quechua Cuzco Bible 1988 MATEO 13 Bible Online

MATEO 13 - Quechua Cuzco Bible 1988 bible

MATEO 13

¹Chay p'unchaymi Jesusqa wasimanta lloqsispa, qocha patapi tiyaykurqan.

²Hinaqtinmi askha runakuna Jesusman asuykamurqanku, chaymi payqa boteman haykuspa tiyaykurqan, llapan runakunataq qocha patapi kasharqanku.

³Hinan Jesusqa askha imaymanata rikch'anachiy simikunapi paykunaman rimaykurqan: —Muhu t'akaq runan t'akaq rirqan.

⁴T'akashaqtintaq wakin muhu ñan pataman chayarqan, hinan phalaq animalkuna chayarqamuspa pallarqapurqanku.

⁵Wakintaq chayarqan pisi hallp'ayoq rumi-rumiman, hinaspanmi usqhaylla lloqsirqamurqan, pisi hallp'a kasqanrayku.

⁶Inti lloqsimuspataq ruphapurqan, chaymi ch'akipurqan mana saphiyoq kasqanrayku.

⁷Wakin muhutaq khiska-khiskaman chayarqan, khiskakunataq wiñarqospa p'ampapurqan.

⁸Wakin muhutaq allin hallp'aman chayaspa rururqan wakin pachakta, wakin soqta chunkata, wakintaq kinsa chunkata.

⁹Pichus uyarinanpaq ninriyoqqa uyarichun, nispa.

¹⁰Hinaqtinmi yachachisqankunaqa asuykuspa Jesusta tapurqanku: —¿Imanaqtintaq runakunataqa rikch'anachiy simikunapi yachachinki? nispa.

¹¹Chaymi Jesusqa paykunata nirqan: —Imaynatachus runakunata Diospa kamachinanmi pakasqa karqan, chaytan kunan sut'ita willashaykichis, paykunamanmi ichaqa mana sut'inchasaqchu.

¹²Pipas reparay yachaqtaqa Diosmi astawanraq reparachinqa, hinan anchatapuni reparanqa. Pipas mana reparaqmantataqmi pisilla reparasqantapas Diosqa qechupunqa.

¹³Chayraykun paykunamanqa rikch'anachiy simikunapi rimani. Paykunaqa qhawashaspan mana rikunkuchu, uyarishaspan mana entiendenkuchu.

¹⁴Chaymi profeta*f** Isaiaspa rimasqan paykunapi hunt'akun. Isaiasmi nirqan: Kay runakunaqa anchataña uyarishaspapas manan entiendenkuchu, allintaña qhawashaspapas manan rikunkuchu.

¹⁵Sonqonkutan rumiyachinku, ninrinkutan roqt'uyachinku, ñawinkutan ch'illmiykunku, mana chay hina kaqtinqa rikunkumanmi, uyarinkumanmi, sonqonkupipas entiendenkumanmi, ahinapin ñoqaman kutirikamuwankuman, ñoqataqmi paykunata qhaliyachiyman, nispa.

¹⁶Qankunaqa kusisamiyoqmi kankichis ñawiykichiswan rikusqaykichisrayku, ninriykichiswan uyarisqaykichisrayku.

¹⁷Cheqaqtan niykichis, askha profetakunan*f** chanin runakunapiwan rikusqaykichista rikuyta munarqanku, manataq rikurqankuchu, uyarisqaykichistapas uyariyta munarqanku, manataq uyarirqankuchu.

¹⁸Muhu t'akaqmanta rikch'anachiy simita uyariychis:

¹⁹Diospa kamachikuq kananmanta willakuyta pillapas uyarispa mana entiendeqtinmi, saqraqa hamurqospa sonqonpi t'akasqa muhuta aparqapun. Chaymanmi rikch'akun ñan patapi t'akasqa muhuqa.

²⁰Rumi-rumipi muhu t'akasqaqa Diospa siminta usqhaylla uyarispa kusikuywan chaskikuqkunan kanku.

²¹Ichaqa sonqonkupi mana allin saphichasqa kaqtinmi mana unaytachu sayanku. Diospa siminrayku llakipas, qatiykachakuypas kaqtintaq qhepaman kutirikapunku.

²²Khiska-khiskapi muhu t'akasqaqa Diospa siminta uyariqkunan kanku, ichaqa kay kawsaypi afanakuymi qhapaqyayta munapakuykunapiwan simi uyarisqankuta qonqachispa, mana ruruchipunchu.

²³Allin hallp'api muhu t'akasqataq ichaqa Diospa siminta uyarispa entiendeqkuna kanku, allintataq rurunkupas. Chaykunan rurunku huk muhullamanta wakin pachakta, wakin soqta chunkata, wakintaq kinsa chunkata, nispa.

²⁴Jesusmi paykunaman wak rikch'anachiy simita willallarqantaq: —Diospa kamachikushasqanqa kaymanmi rikch'akun. Huk runan chakranpi allin muhuta t'akarqan.

²⁵Ichaqa runakuna puñushanankama awqan hamuspa chirisuela qora muhuta trigo chakraman t'akaykurqan, hinaspataq ripurqan.

²⁶Trigo wiñamuspa ruruyta qallariqtintaq chirisuela rikhurimullarqantaq.

²⁷Chaymi kamachinkunaqa chakrayoqman hamuspa nirqanku: Patrón, ¿manachu ch'uya muhuta chakraykipi t'akarqanki? ¿Imaynapitaq chay chirisuelari rikhurin? nispa.

²⁸Chakrayoqtaq paykunata nirqan: Pi awqaychá chaytaqa t'akaykun, nispa. Kamachikunataq nirqanku: ¿Munankichu t'iramunaykuta? nispa.

²⁹Chaymi chakrayoqqa nirqan: Ama, t'irashaspaykichisqa trigotawanmi t'irarqowaqchis.

³⁰Trigo ichhuykama hinalla wiñashachunku, ichhuy chayamuqtinña ichhuqkunata nisaq: Chirisuelataraq ñawpaqtaqa ichhurqariychis, hinaspa marq'ay-marq'ayta wataykuychis kanaykapunapaq, trigotataq taqeyman taqenkichis, nispan, nispa.

³¹Jesusqa paykunaman wak rikch'anachiy simitawanmi willarqan: —Diospa kamachikushasqanqa kaymanmi rikch'akun. Huk runan chakranpi mostaza muhuta t'akarqan.

³²Chay muhuqa llapa muhumantapas aswan huch'uyllan, wiñaspataqmi llapa yuyukunamantapas aswan hatun sach'aman tukun, phalaq animalkunataq hamuspa k'allmankunapi q'esachakun, nispa.

³³Jesusqa paykunaman wak rikch'anachiy simitawanmi willarqan: —Diospa kamachikushasqanqa qonchumanmi rikch'akun. Huk warmin qonchuta kinsa tupuy hak'upi chapun, hinan llapanta poqochin, nispa.

³⁴Tukuy chaykunatan Jesusqa runakunaman rikch'anachiy simikunapi willarqan. Rikch'anachiy simikunallawanpunin paykunamanqa yachachiq.

³⁵Chaymi profetaq*f** willakusqan hunt'akun. Profetan*f** nirqan: Rikch'anachiy simikunatan rimarisaq, kay pacha kamaymantapacha pakasqakunatan sut'inchasaq, nispa.

³⁶Runakunata kacharparispataq Jesusqa wasiman haykurqan. Yachachisqankunataq Jesusman asuykuspa nirqanku: —Chakrapi chirisuelamanta rikch'anachiy simita sut'inchawayku, nispa.

³⁷Hinan Jesusqa nirqan: —Ch'uya muhuta t'akaqqa Diospa Kachamusqan Runan.

³⁸Chakraqa kay pachan, ch'uya muhutaq Diospa kamachikushasqanpi kaq runakuna, chirisuelataq saqraq runankuna.

³⁹Chirisuela qora muhu t'akaq awqataq supay, cosechataq kay tiempo p'uchukay, ichhuqkunataq angelkuna.

⁴⁰Imaynan chirisuela qorataqa huñuspa ninaman kanaykunku, chay hinallataqmi kay tiempo p'uchukapuqtin kanqa.

⁴¹Diospa Kachamusqan Runan angelniykunata kachamusaq, hinan kamachikushasqaypi llapa huchallichiqkunata mana chanin ruwaqkunatawan huñuspa,

⁴²nina rawrashaq hornoman wikch'uykunqaku. Chaypin waqaypas kiru k'achachachaypas kanqa.

⁴³Hinaqtinmi chanin runakunaqa Dios Yayankuq kamachikushasqanpi inti hina k'ancharinqaku. Uyarinanpaq ninriyoqqa uyarichun.

⁴⁴Diospa kamachikushasqanqa kaymanmi rikch'akun. Chakrapin pakasqa illa karqan. Chayta tarispan runaqa astawan pakapaykun, kusisqa ripuspataq lliw kaqninta vendemun, hinaspan chay chakrata rantikapun.

⁴⁵Diospa kamachikushasqanqa kaymanmi rikch'akullantaq. Huk runan sumaq perlakunata rantinanpaq maskharqan.

⁴⁶Paymi sinchi chaniyoq perlata tarirqorqan, hinaspan llapan kaqninkunata vendespa chay perlata rantikurqan.

⁴⁷Diospa kamachikushasqanqa rikch'akullantaqmi challwa hap'ina llikaman. Llikata mama qochaman challwaqkuna wikch'uykuqtinkutaq, tukuy imaymana rikch'aq challwakunata hap'in.

⁴⁸Llikaman hunt'aqtinñataq qocha pataman horqomunku, hinaspan tiyaykuspa allin challwakunata canastaman akllanku, mana allinkunatataq wikch'upunku.

⁴⁹Chay hinallataqmi kay tiempo p'uchukapuqtinpas kanqa. Angelkunan hamuspanku chanin runakuna ukhumanta mana chanin runakunata t'aqanqaku, hinaspan

⁵⁰nina rawrashaq hornoman wikch'uykunqaku. Chaypin waqaypas kiru k'achachachaypas kanqa, nispa.

⁵¹Jesustaq yachachisqankunata nirqan: —¿Chaykunata entiendenkichischu? nispa. Yachachisqankunataq nirqanku: —Arí, Señor, nispanku.

⁵²Chaymi Jesusqa paykunata nirqan: —Chayraykun, kamachikuy simita yachachiq runa Diosta kamachiqninpaq chaskispaqa, wasiyoq taytamanmi rikch'akun. Paymi kaqninkuna waqaychanamanta mosoq kaqkunatapas mawk'a kaqkunatapas horqomun, nispa.

⁵³Jesusqa chay rikch'anachiy simikuna rimayta tukuspañan chaymanta ripurqan.

⁵⁴Hinaspan Nazaret llaqtanman chayaspa Diosmanta yachachina wasinkupi paykunata yachachirqan. Chaymi runakunaqa musphaspa nirqanku: —Kay runari, ¿maypitaq kaykunata yachamurqan? ¿Imaynataq milagrokunatapas ruwan?

⁵⁵Payqa carpinteroq churinmi riki. Mamanpa sutinpas Marian, wawqenkunaq sutintaq Jacobo, José, Simón, Judaspiwan.

⁵⁶Panankunapas llapankun kaypi tiyanku. ¿Imaynapitaq lliw kaykunataqa yachan? nispa.

⁵⁷Chaymi payta mana kasurparirqankuchu. Jesustaq ichaqa paykunata nirqan: —Profetaqa*f** allin respetasqan, llaqtanpi familianpi kaqkunallan mana respetanchu, nispa.

⁵⁸Chayraykun llaqtanpiqa pisi milagrokunallata ruwarqan paypi mana iñiqtinku.