Read Quechua Cuzco Bible 1988 MATEO 16 Bible Online

MATEO 16 - Quechua Cuzco Bible 1988 bible

MATEO 16

¹Fariseokunataq*f** saduceokunapiwan*f** wateqanankupaq Jesusman asuykuspa nirqanku: —Huk milagrota rikuchiwayku hanaq pachamanta kasqaykita yachanaykupaq, nispa.

²Chaymi Jesusqa paykunata nirqan: —Tarden antawaraqtinmi ninkichis: Allin tiempon kanqa, nispa.

³Tutamanta yana phuyu antawaraqtintaq ninkichis: Paranqan, nispa. ¡Iskay uyakunan kankichis! Qankunaqa cielota qhawaspan imaynachus tiempo kananta kusata yachankichis, ¿imaynataq mana reparankichischu kunan tiempo imaynachus kasqanta?

⁴Yaw, Diosta mana kasukuq millay runakuna, milagro ruwanaytan munashankichis, ichaqa manan ima milagrotapas rikuchisqaykichischu, aswanpas profeta*f** Jonasta sucedesqallantan milagrota hina rikuchisqaykichis, nispa. Chaykunata nispataq Jesusqa ripurqan.

⁵Jesuspa yachachisqankunan qochata chimpaspa t'anta apakuyta qonqarqanku.

⁶Hinan Jesusqa paykunata nirqan: —Cuidakuychis waqaychakuychis fariseokunaq*f** saduceokunaq*f** qonchunmanta*f**, nispa.

⁷Chaymi paykunaqa ninakurqanku: —Kaytaqa nishawanchis t'antata mana apakamuqtinchismi, nispanku.

⁸Hinan Jesusqa chay nisqankuta entiendespa nirqan: —Pisi iñiyniyoq runakuna, ¿imaraykun rimashankichis t'antata mana apamusqaykichismanta?

⁹¿Manaraqchu entiendenkichis? ¿Manallataqchu yuyarinkichispas phisqa t'antamanta phisqa waranqa runaman rakisqayta, puchuntaqa hayk'a canastatachus hoqarisqaykichista?

¹⁰¿Manallataqchu yuyankichis qanchis t'antamanta tawa waranqa runaman rakisqayta, puchuntapas hayk'a canastatachus hoqarisqaykichista?

¹¹¿Imaynataq mana entiendenkichischu? Chaytaqa manan t'antamantachu nishaykichis, aswanpas fariseokunaq*f** saduceokunaq*f** qonchunmanta*f** cuidakunaykichistan niykichis, nispa.

¹²Hinan entienderqanku, mana t'anta qonchumantachu nishasqanta, aswanpas fariseokunaq*f** saduceokunaq*f** yachachikuyninmanta cuidakunankupaq rimashasqanta.

¹³Jesusmi Felipeq kamachisqan Cesarea llaqta qaylla hallp'aman chayaspa yachachisqankunata tapurqan: —Diospa Kachamusqan Runamantari, ¿pi kasqaytataq runakunaqa ninku? nispa.

¹⁴Chaymi yachachisqankunaqa nirqanku: —Wakinmi ninku Bautizaq Juan kasqaykita. Wakintaq ninku Elías kasqaykita. Wakintaq ninku Jeremías kasqaykita. Wakinkunataq ninku profetakunamanta*f** huknin kasqaykita, nispa.

¹⁵Hinan Jesusqa paykunata nirqan: —Qankunari, ¿pi kasqaytataq niwankichis? nispa.

¹⁶Simón Pedrotaq Jesusta nirqan: —Qanqa kawsaq Diospa Churinmi kanki, Diospa akllasqan Criston kanki, nispa.

¹⁷Hinan Jesusqa payta nirqan: —Jonaspa churin Simón, kusisamiyoqmi kanki, manan runachu chaytaqa yachachirqasunki, aswanpas hanaq pachapi kaq Yayaymi.

¹⁸Ñoqapas nillaykitaqmi, qanqa Pedro kasqaykita, kay qaqa patapin iglesia nisqa iñiq t'aqayta sayarichisaq, manataqmi Wañuy-pachaq atiyninpas iglesiataqa atipanqachu.

¹⁹Qanmanmi Diospa kamachikushasqanman haykuna llavekunata qosqayki, kay pachapi tukuy watasqaykiqa hanaq pachapipas watasqallataqmi kanqa, kay pachapi tukuy paskasqaykipas hanaq pachapiqa paskasqallataqmi kanqa, nispa.

²⁰Hinaspanmi Jesusqa yachachisqankunata kamachirqan: — Aman pimanpas Diospa akllasqan Cristo kasqaytaqa willankichischu, nispa.

²¹Chaymantapachan Jesusqa yachachisqankunaman sut'inchaspa nirqan: —Jerusalén llaqtamanqa rinaypunin, chaypin kurak runakuna, sacerdote umallikuna, kamachikuy simita yachachiqkuna sinchitapuni ñak'arichiwaspa wañuchiwanqaku. Ichaqa kinsakaq p'unchaypin kawsarimpusaq, nispa.

²²Chaymi Pedroqa payta wakman pusaspa anyarqan: —Señor, amapuni Diospas munachunchu chay hina sucedenasuykitaqa, nispa.

²³Hinan Jesusqa Pedrota nirqan: —¡Satanás, ladoymanta anchhuriy! Urmachiytan munawanki. Qanqa manan Dios hinachu yuyanki, aswanpas runa hinallan yuyanki, nispa.

²⁴Hinaspan Jesusqa yachachisqankunata nirqan: —Pipas qhepayta hamuyta munaqqa, pay kikinta qonqakuchun, hinaspa ñoqarayku ñak'arispa wañunanña kaqtinpas qhepayta hamuchun.

²⁵Pipas pay kikillanta waqaychakuyta munaqqa, wiñaypaqmi chinkapunqa, pipas ñoqarayku wañuqmi ichaqa wiñaypaq kawsanqa.

²⁶Huk runachus kay pachantinpi lliw kaqkunata hap'ikapuspa wiñaypaq chinkapunqa chayqa, ¿ima allintaq paypaq kanqa? ¿Hayk'atataq runaqa qonman kawsayninta qespichinanpaq?

²⁷Diospa Kachamusqan Runaqa angelniykunapiwanmi Yayaypa hatunchasqan hamusaq, hinaspan sapankaman ruwasqanman hina pagapusaq.

²⁸Cheqaqta niykichis, Diospa Kachamusqan Runa kamachikunaypaq atiywan hamushaqtiymi kaypi kaqkunamanta wakinniykichisqa kawsashankichisraq, nispa.