Read Quechua Cuzco Bible 1988 MATEO 17 Bible Online

MATEO 17 - Quechua Cuzco Bible 1988 bible

MATEO 17

¹Soqta p'unchay qhepatataq Jesusqa Pedrota, Jacobota wawqen Juantawan huk alto orqoman paykunallata pusarqan.

²Hinaspan ñawpaqenkupi Jesuspa rikch'aynin huk-niraqman tukurqan, uyanpas inti hinan k'ancharirqan, p'achanpas rit'i hina yuraqmi k'ancharirqan.

³Chaypin paykunaqa rikurqanku Moisestawan Eliastawan, Jesuswan parlashaqta.

⁴Hinan Pedroqa Jesusta nirqan: —Señor, may allinmi kaypi kayninchisqa, munanki chayqa, kinsa ch'ukllata kaypi ruwasaqku: hukta qanpaq, hukta Moisespaq, huktataq Eliaspaq, nispa.

⁵Pedro rimashaqtillanraqmi huk k'anchaq phuyu paykunata pakaykurqan. Hinan phuyu ukhumanta huk kunka nimurqan: — Kaymi munasqay Churiy, paymi akllakusqay, payta uyariychis, nispa.

⁶Yachachisqankunataq chayta uyarispa sinchita mancharikuspa pampakama k'umuykukurqanku.

⁷Chaymi Jesusqa paykunaman asuykuspa llamiykurqan, hinaspan nirqan: —Sayariychis, ama mancharikuychischu, nispa.

⁸Hinan paykunaqa qhawarispa, mana pitapas rikurqankuchu, aswanpas sapan Jesusllata.

⁹Orqomanta uraykamushaspataq Jesusqa paykunata kamachirqan: —Aman pimanpas chay rikhuriyta willankichischu Diospa Kachamusqan Runa kawsarimpunaykama, nispa.

¹⁰Hinan yachachisqankunaqa payta tapurqanku: — Kamachikuy simita yachachiqkunaqa, ¿imanaqtintaq ninku: Eliasraqmi ñawpaqtaqa hamunqa, nispanku, nispa?

¹¹Jesustaq paykunata nirqan: —Arí, Eliaspunin ñawpaqtaqa hamunan, hinaspan lliw imaymanata allichanqa.

¹²Ichaqa niykichismi, Eliasqa hamurqanñan. Payta mana reqsispan Judío runakunaqa ima munasqankuta paytaqa ruwarqanku. Ahinallatataqmi Diospa Kachamusqan Runatapas ñak'arichiwanqaku, nispa.

¹³Chayraqmi Jesuspa yachachisqankunaqa entienderqanku Bautizaq Juanmanta rimashasqanta.

¹⁴Askha runakunaq kasqanmanmi chayarqanku. Hinan huk runa Jesusman asuykurqan, qonqoriykukuspataq nirqan:

¹⁵—Señor, churiyta khuyapayaykuy, ataquewan hap'ichikuspan sinchitapuni ñak'arin. Askha kutitan urmaykun ninamanpas unumanpas.

¹⁶Chaymi yachachisqaykikunaman pusamurqani, paykunataq mana qhaliyachiyta atinkuchu, nispa.

¹⁷Hinan Jesusqa nirqan: —¡Ay, mana iñiyniyoq waqllisqa runakuna! ¿Hayk'aqkamataq qankunawan kasaq? ¿Hayk'aqkamataq muchusqaykichis? Chay waynata pusamuwaychis, nispa.

¹⁸Pusamuqtinkutaq Jesusqa phiñarikuspa waynamanta supayta qarqorqan, hinan waynaqa chay ratomantapacha qhali kapurqan.

¹⁹Chaymantataq yachachisqankunaqa wakllapi Jesusman asuykuspa tapurqanku: —¿Imanaqtintaq ñoqaykuqa supayta mana qarqoyta atirqaykuchu? nispa.

²⁰Jesustaq paykunata nirqan: —Qankunaqa mana tukuy sonqochu Diospi iñisqaykichisraykun mana atirqankichischu. Cheqaqta niykichis, huk mostaza ruru hinallapas iñiyniykichis kanman chayqa, kay orqota niwaqchismi: Kaymanta haqayman suchuy, nispa, hinan suchunman. Iñiqtiykichisqa manan imapas mana atikuqqa kanmanchu.

²¹[Chay t'aqa supayqa manan lloqsinmanchu, aswanpas mañakuywan ayunayllawanmi, nispa.]

²²Galilea provinciapi Jesusqa yachachisqankunapiwan kashaspan paykunata nirqan: —Diospa Kachamusqan Runaqa runakunamanmi hap'ichisqa kasaq,

²³hinan paykunaqa wañuchiwanqaku. Ichaqa kinsakaq p'unchaypin kawsarimpusaq, nispa. Chaymi paykunaqa sinchitapuni llakikurqanku.

²⁴Jesusmi Capernaum llaqtaman chayarqan. Hinan Dios yupaychana wasimanta contribucionta cobraqkunaqa Pedroman asuykuspa nirqanku: —¿Yachachiqniykichisqa Dios yupaychana wasimanta contribucionta paganchu? nispa.

²⁵Pedrotaq nirqan: —Arí, paganmi, nispa. Wasiman chayaspa hinataq Jesusqa Pedrota tapuykurqan: — Simón, ¿ima niwaqtaq? Kay pacha reykunaqa, ¿pimantataq contribuciontapas impuestotapas cobranku? ¿Llaqta-masinkumantachu icha wak llaqtayoqmantachu? nispa.

²⁶Chaymi Pedroqa Jesusta nirqan: —Wak llaqtayoqkunamantan, nispa. Jesustaq payta nirqan: —Chay hinaqa, llaqta-masinkunaqa manan pagananchu.

²⁷Chaywanpas paykunata ama phiñachinanchispaq qochata rispayki anzuelota wikch'uykamuy, hinaspan ñawpaqkaq challwa hap'isqaykiq siminta kicharispa huk qolqeta tarinki, ñoqamantawan qanmantawan contribucionta paganapaq hina. Chayta horqospayki pagamuy, nispa.