Read Quechua Cuzco Bible 1988 MATEO 18 Bible Online

MATEO 18 - Quechua Cuzco Bible 1988 bible

MATEO 18

¹Chay p'unchaykunan yachachisqankunaqa Jesusman asuykuspa tapurqanku: —¿Pitaq Diospa kamachikushasqanpiqa qollanaqa kashan? nispanku.

²Chaymi Jesusqa huk wawata waqyaspa chawpinkupi sayaykachirqan,

³hinaspan nirqan: —Cheqaqta niykichis, manachus k'umuykukuspa huk wawa hina kankichis chayqa, manan Diosta kamachiqniykichis kananpaq chaskiyta atinkichischu.

⁴Ahinaqa, pipas kay wawa hina huch'uyyaykukuqmi Diospa kamachikushasqanpiqa qollana kashan.

⁵Pipas kay wawata hina sutiypi chaskiqqa ñoqatan chaskiwan, nispa.

⁶Jesusqa nillarqantaqmi: —¡Ay, pipas ñoqapi iñiq kay huch'uykunamanta hukninta huchaman urmachiqqa! Paypaqqa aswan allinmi kanman karqan molino rumita kunkanman warkuykuspa mama qochaman wikch'uykunanku.

⁷¡Ay, runamasinta huchallichiqkunamanta! Kay pachapi huchallichiqkunaqa kanqapunin, ichaqa, ¡imaynaraqmi kanqa huchaman urmachiq runaqa!

⁸Chayrayku, makiykiña chakiykiña huchaman urmachisunki chaypas kuchurqospa wikch'uy, aswan allinmi kanqa ch'ulla makiyoqpas ch'ulla chakiyoqpas wiñay kawsayman haykunaykiqa, iskay makiyoq kashaspa iskay chakiyoq kashaspapas wiñay ninaman wikch'uykusqa kanaykimantaqa.

⁹Ñawiykiña huchaman urmachisunki chaypas, horqokuy, hinaspa wikch'uy, aswan allinmi kanqa ch'ulla ñawillayoq wiñay kawsayman haykunaykiqa, iskay ñawiyoq kashaspa infierno ninaman wikch'uykusqa kanaykimantaqa, nispa.

¹⁰Nillarqantaq: —Aman kay huch'uykunamanta mayqentapas pisichankichischu. Ñoqan niykichis, hanaq pachapiqa Yayaypa qayllanpipunin kashanku wawakuna cuidaq angelkunaqa.

¹¹[Diospa Kachamusqan Runaqa hamurqani chinkasqa kaqta qespichiqmi.]

¹²¿Ima niwaqchistaq? Pachak ovejayoq runaq huk ovejan chinkaqtinqa, ¿manachu isqon chunka isqonniyoq ovejata orqoman saqeykuspa chay chinkaq oveja maskhaq puririnman?

¹³Cheqaqtan niykichis, mana chinkasqa isqon chunka isqonniyoq ovejanmantaqa chay chinkasqa ovejanta tarispanmi astawanraq kusikunqa.

¹⁴Chay hinallataqmi hanaq pachapi kaq Yayaykichispas mana munanchu kay huch'uykunamanta huknillanpas chinkanantaqa, nispa.

¹⁵Jesusqa nillarqantaqmi: —Wawqeyki qan contra huchallikuqtinqa rispa sapallaykipi paypa pantasqanta reqsichimuy. Pay kasusunki chayqa, wawqeykiwanmi allipunakapunki.

¹⁶Mana kasusuqtiykin ichaqa, huktapas iskaytapas testigota pusarikuspa rinki, ahinapin iskay otaq kinsa testigoq qayllanpi tukuy rimasqa sut'inchakunqa.

¹⁷Paykunatapas mana kasuqtinmi ichaqa iglesia nisqa iñiq t'aqaman chayta willanki, iñiq t'aqatapas manapuni kasuqtinmi mana iñiyniyoq runapaq hina contribución cobraqpaq hina hap'inki.

¹⁸Cheqaqtan niykichis, kay pachapi lliw watasqaykichisqa, hanaq pachapipas watasqallataqmi kanqa, kay pachapi lliw paskasqaykichistaq, hanaq pachapipas paskasqallataq kanqa.

¹⁹Nillaykichistaq, qankunachus kay pachapi iskayllapas huk sonqolla rimanakuwaqchis imatapas Diosmanta mañakunaykichispaq chayqa, hanaq pachapi kaq Yayaymi qosunkichis.

²⁰Maypichus iskaypas kinsapas sutiypi huñukunku chayqa, chaypin chawpinkupi kashani, nispa.

²¹Hinaqtinmi Pedroqa payman asuykuspa nirqan: —Señor, ¿hayk'a kutitan ñoqa contra huchallikuqtin wawqeyta pampachasaq? ¿Qanchis kutikamachu? nispa.

²²Chaymi Jesusqa nirqan: —Manan qanchis kutikamalla niykichu, aswanpas qanchis chunka kuti qanchiskaman.

²³Diospa kamachikushasqanqa kaymanmi rikch'akun. Huk reymi llank'aqninkunawan cuentata ruwayta munarqan.

²⁴Cuenta ruwayta qallarishaqtintaq payman pusamurqanku waranqa-waranqa qolqe manukuq runata.

²⁵Chay runaq pagapunanpaq qolqen mana kaqtintaq patronninqa kamachikurqan payta, warminta, wawankunata, tukuy kaqninkunatawan vendespa manukusqanta pagapunanpaq.

²⁶Hinan chay kamachiqa qonqoriykukuspa patronta valekurqan: —Wiraqocháy, suyariykullaway, llapantapas pagapullasqaykin, nispa.

²⁷Hinan chay kamachiq patronninqa payta khuyapayaspa qolqe manukusqanta pampachapurqan, hinaspan kacharipurqan.

²⁸Chay kacharipusqa kamachitaq ripushaspa pachak qolqe manukuqnin kamachimasinwan tuparqan, hinaspan payta kunkanmanta hap'ispa sipisharqanña: —Pagapuway manukuwasqaykita, nispa.

²⁹Chaymi kamachimasinqa ñawpaqenpi qonqoriykukuspa valekurqan: —Suyariykullaway, pagapullasqaykin, nispa.

³⁰Paytaq ichaqa mana munarqanchu, aswanmi payta apaspa carcelman wisq'achirqan manunta pagapunankama.

³¹Kamachi-masinkunataq chayta rikuspa sinchita llakikurqanku, chaymi rispa patronninkuman lliwta willamurqanku.

³²Hinan patronninqa chay kamachita waqyachimuspa nirqan: —¡Millay kamachi! Ñoqaqa chay tukuy manuytan pampachapurqayki valekuwasqaykirayku.

³³Qanpas kamachi-masiykitaqa khuyapayaykunaykin karqan, imaynan ñoqaqas qanta khuyapayarqayki hinata, nispa.

³⁴Hinaspan phiñakuspa patronninqa muchuchiq alcaideman hap'ichirqan lliw manukusqanta pagapunankama.

³⁵Jesusmi nirqan: —Chay hinallatataqmi hanaq pacha Yayaypas qankunata ruwasunkichis, manachus wawqeykichista qankuna contra huchallikuqtin tukuy sonqo pampachankichis chayqa, nispa.