Read Quechua Cuzco Bible 1988 MATEO 19 Bible Online

MATEO 19 - Quechua Cuzco Bible 1988 bible

MATEO 19

¹Chaykunata nispanmi Jesusqa Galilea provinciamanta Jordán mayuq inti lloqsiy chimpanpi Judeaq hap'iyninman rirqan.

²Hinan paypa qhepanta askha runakuna rirqan, chaypitaq onqosqakunata qhaliyachirqan.

³Wakin fariseokunataq*f** Jesusman asuykurqanku, wateqayta yuyaspataq tapurqanku: —¿Diospa kamachikuyninman hinaqa atikunchu ima hawallapas qosaq warminmanta t'aqakuynin? nispa.

⁴Chaymi Jesusqa paykunata nirqan: —¿Manachu Diospa Simin Qelqata leerqankichis? Diosqa qallariypi kamarqan qharita warmitawanmi.

⁵Diospa Simin Qelqan nin: Chayraykun, qhariqa taytantapas mamantapas saqepunqa, hinaspan warminman hukllachaykakapunqa, huk cuerpollataq kapunqaku, nispa.

⁶Chay hinaqa manan iskayñachu kanku aswanpas huk cuerpollañan. Chayrayku, runaqa Diospa hukllachasqantaqa mana t'aqananchu, nispa.

⁷Fariseokunan*f** Jesusta tapullarqankutaq: —¿Imaraykutaq Moisesqa kamachikurqan t'aqanakuy qelqata haywaspa warminmanta t'aqakunanta? nispa.

⁸Chaymi Jesusqa paykunata nirqan: —Moisesqa rumi sonqo kaqtiykichismi saqerqasunkichis warmiykichista wikch'upunaykichista. Ichaqa manan hinachu qallariypiqa karqan.

⁹Chayraykun ñoqaqa niykichis: Pipas warminmanta ima hawallapas t'aqakunman wak qhariwan mana wasanchashaqtin, hinaspa wak warmiwan casarakapunman chayqa, wasanchay huchatan ruwan, nispa.

¹⁰Hinan yachachisqankunaqa Jesusta nirqanku: —Warminwan qhariq chay hina kawsaynin kanan kaqtinqa, mana casarakuyllañan allin, nispa.

¹¹Chaymi Jesusqa paykunata nirqan: —Manan llapa runachu kay yachachikuytaqa umapi hap'inku, aswanpas pikunamanchus Diosqa yachachin chaykunallan entiendenku.

¹²Kanmi nacesqanmantapacha qharitapas warmitapas mana munaqkuna, kantaqmi runakunaq kapasqanpas, wakintaqmi mana casarakunkuchu Diosta servinankurayku. Pipas kay yachachikuyta umapi hap'iyta atiqqa hap'ichun, nispa.

¹³Jesusmanmi wawakunata pusamurqanku, paykunata llamiykunanpaq Diosmanta mañapunanpaqwan. Hinan yachachisqankunaqa pusamuqkunata phiñarirqanku.

¹⁴Jesustaq nirqan: —Wawakunaqa hinalla ñoqaman hamuchunku, ama paykunataqa hark'aychischu, Diosqa kay wawakuna hina kaq runakunallatan kamachinqa, nispa.

¹⁵Wawakuna pataman makinta churaykuspaña chaymanta ripurqan.

¹⁶Huk runan Jesusman asuykuspa nirqan: —Yachachikuq, ¿ima allintataq ruwasaq wiñay kawsayniyoq kanaypaq? nispa.

¹⁷Chaymi Jesusqa nirqan: —¿Imanaqtintaq allinkaqmanta tapuwanki? Diosllan allinqa. Wiñay kawsayniyoqchus kayta munanki chayqa, Diospa kamachikuyninkunata hunt'ay, nispa.

¹⁸Chay runataq nirqan: —Chaykunari, ¿mayqen kamachikuykunataq? nispa. Hinan Jesusqa nirqan: —Aman pitapas wañuchinkichu, aman wasanchankichu, aman suwakunkichu, aman llullakuspa tumpankichu.

¹⁹Taytaykita mamaykita yupaychanki, hinallataq runa-masiykitapas qan kikiykita hina munakunki, nispa.

²⁰Chaymi chay waynaqa nirqan: —Lliwtan chaykunataqa hunt'aniña. ¿Imaraqtaq ruwanay? nispa.

²¹Jesustaq nirqan: —Wiñay kawsayta qonapaq hina kayta munanki chayqa, rispa kaqniykita vendemuy, wakchakunamantaq qomuy, kutimuspaykitaq qhepayta hamuy. Hinan hanaq pachapi qhapaq-kayniyki kanqa, nispa.

²²Waynataq chayta uyarispa llakisqa ripurqan sinchi qhapaq kasqanrayku.

²³Hinan Jesusqa yachachisqankunata nirqan: —Cheqatan niykichis, may sasapunin qhapaq runapaqqa Diosta kamachiqnin kananpaq chaskiyqa kanqa.

²⁴Nillaykichistaq camello nisqa animalraqmi yawriq ninrin suchuytaqa atinman Diosta kamachiqninpaq qhapaqpa chaskinanmantaqa.

²⁵Yachachisqankunataq chayta uyarispa sinchita musphaspa nirqanku: —Chay hinari, ¿pillañataq qespichisqaqa kanman? nispanku.

²⁶Hinan Jesusqa paykunata qhawarispa nirqan: —Runakunaqa manan qespikuyta atinmanchu, Diosmi ichaqa tukuy imatapas atin, nispa.

²⁷Chaymi Pedroqa Jesusta nirqan: —Ñoqaykuqa imaymanaykuta saqemuspaykun qanwan purishayku. ¿Imataq ñoqaykupaq kanqa? nispa.

²⁸Jesustaq paykunata nirqan: —Cheqaqtan niykichis, tukuy imapas mosoqyachisqa kaqtinmi Diospa Kachamusqan Runa kamachikuy tiyananpi tiyaykuqtiy, qankunapas ñoqawan purisqaykichisrayku chunka iskayniyoq tiyanakunapi tiyaykullankichistaq, Israelpa chunka iskayniyoq ayllunta juzgaspa kamachinaykichispaq.

²⁹Pipas wasintapas, wawqenkunatapas, panankunatapas, taytantapas, mamantapas, wawankunatapas, chakrankunatapas ñoqarayku saqemuqmanqa Diosmi pachak kutitawanraq qopunqa, hinallataq wiñay kawsaytapas qonqa.

³⁰Ichaqa kunan p'unchay askha hatunpaq qhawasqakunan pisipaq qhawasqa kanqaku, kunan p'unchay pisipaq qhawasqakunataq hatunpaq qhawasqa kanqaku.