Read Quechua Cuzco Bible 1988 MATEO 2 Bible Online

MATEO 2 - Quechua Cuzco Bible 1988 bible

MATEO 2

¹Rey Herodes kamachikushaqtinmi Judea provinciapi kaq Belén llaqtapi Jesusqa nacerqan. Chay qhepatataq inti lloqsimuy lado suyumanta Jerusalén llaqtaman chayamurqanku ch'aska qhawaypi yachaysapa runakuna.

²Hinaspan tapukurqanku: —¿Maypitaq kashan Judío runakunaq reynin naceqri? Ch'askantan inti lloqsimuy ladopi rikumuyku, chaymi payta yupaychaykuq hamushayku, nispanku.

³Chayta uyarispanmi rey Herodesqa hawapi-ukhupi sonqoyoq karqan, kaqllataq Jerusalén llaqtapi llapan runakunapas.

⁴Chaymi llapan sacerdote umallikunata, kamachikuy simita yachachiqkunatawan huñuspa, paykunata tapurqan maypichus Diospa Akllasqan Cristo nacenan karqan chayta.

⁵Paykunataq reyta nirqanku: —Judeapi kaq Belén llaqtapin. Kay hinatan profetaqa*f** qelqarqan:

⁶Qanqa, Judá Suyupi Belén llaqta, Judapi kamachikuqkuna purapiqa hatunmi kanki, qanmantan huk uma qollana lloqsimunqa, paytaqmi Israel llaqtayta michinqa, nispa, nispanku.

⁷Hinaqtinmi rey Herodesqa ch'aska qhawaypi yachaysapa runakunata sapaqllaman waqyarqan, hinaspan paykunata allin-allintapuni tapurqan hayk'aqchus ch'askaq rikhurisqanta.

⁸Chaymantataq paykunata Belén llaqtaman kachaspa nirqan: —Riychis, hinaspa wawamanta allin-allintapuni tapukamunkichis, tarimuspaykichistaq willawankichis, ñoqapas rispay yupaychaykamunaypaq, nispa.

⁹Paykunataq reyta uyariykuspanku pasapurqanku, inti lloqsimuy ladopi rikusqanku ch'askata rikuspataq sinchi kusisqa q'ochukurqanku. Chay ch'askaqa ñawpaqenkutan rirqan, wawaq kasqanman chayaspataq altonpi sayaykurqan.

¹¹Wasiman haykuspataq wawata rikurqanku maman Mariatawan, hinaspan qonqoriykukuspa wawata yupaychaykurqanku. Alforjankuta kicharispataq regalokunata wawaman qorqanku: qorita, inciensota, mirratawan*f**.

¹²Chaymantataq Herodesman ama kutinankupaq mosqoypi willasqa kaspanku wak ñanninta llaqtankuman kutipurqanku.

¹³Ch'aska qhawaypi yachaysapakuna ripuqtintaq, Señor Diospa angelninqa mosqoypi Joseman rikhurispa nirqan: —Sayariy, wawata mamantawan pusarikuspa Egipto suyuman ayqey, hinaspa chaypi tiyamuy ñoqaq huktawan qanman willanaykama, rey Herodesmi wawata wañuchinanpaq maskhanqaña, nispa.

¹⁴Hinan chay tutapacha Joseqa rikch'arispa wawata mamantinta pusarikuspa Egipto suyuman ripurqan.

¹⁵Chaypin tiyamurqan rey Herodespa wañunankama, Señor Diospa nisqan hunt'akunanpaq. Señor Diosmi profetanwan nirqan: —Egipto suyumantan Churiyta waqyamuni, nispa.

¹⁶Hinan Herodesqa k'arakta phiñakurqan, ch'aska qhawaypi yachaysapakunaq q'otusqanta reparaspa. Chaymi Belén llaqtapi lliw muyuriqpiwan manaraq iskay watayoq llapan qhari wawakunata wañurachinanpaq kacharqan, ch'aska qhawaypi yachaysapakunaq willasqan tiempoman hina.

¹⁷Ahinapin profeta*f** Jeremiaspa nisqan hunt'akurqan, paymi nirqan:

¹⁸Ramá llaqtapin huk kunka uyarikurqan, manchay yupakuy, waqay, hik'ipakuypiwan. Raquelmi wawankunamanta waqashan, sonqochasqa kaytan mana munanchu wawankunaq manaña kapusqanrayku, nispa.

¹⁹Rey Herodes wañuqtintaq Señor Diospa angelninqa Egiptopi Joseman mosqoypi rikhurispa

²⁰nirqan: —Israel llaqtaman ripuy wawata mamantawan pusarikuspa, wawata wañuchiyta munaqkunaqa wañupunkuñan, nispa.

²¹Chaymi Joseqa sayarispa wawata mamantawan pusarikuspa Israel suyuman kutimpurqan.

²²Herodespa churin Arkelao taytanpa rantinpi Judea provinciapi kamachikushasqanta yachaspataq, chayman riyta manchakurqan. Mosqoypi Diospa willasqan kaspataq Galilea provinciaman ripurqan.

²³Hinaspan chayman chayaspa Nazaret llaqtapi tiyarqan, profetakunaq: Nazir*f** runan kanqa, nisqanku hunt'akunanpaq.