Read Quechua Cuzco Bible 1988 MATEO 20 Bible Online

MATEO 20 - Quechua Cuzco Bible 1988 bible

MATEO 20

¹Diospa kamachikushasqanqa kaymanmi rikch'akun. Uvas chakrayoqmi tutallamanta lloqsispa uvas chakranpi llank'amunankupaq runakunata mink'amurqan.

²Chay llank'aqkunawanmi rimanakurqan iman jornal paganata pagapunanpaq, hinaspan uvas chakranman paykunata kacharqan.

³Las nueveta hinaña lloqsispataq chakrayoqqa hukkunatapas plazapi yanqa sayashaqta rikurqan.

⁴Hinaspan paykunata nirqan: —Qankunapas uvas chakraypi llank'ampuwaychis, iman paganatan pagapusqaykichis, nispa. Hinan paykunaqa llank'aq rirqanku.

⁵Lloqsillarqantaqmi chawpi p'unchayta hinapas las tresta hinapas, hinaspan chay hinatakama mink'amurqan.

⁶Las cincota hinaña lloqsispataq chakrayoqqa hukkunatapas yanqa sayashaqta rikurqan. Hinaspan paykunatapas nillarqantaq: —¿Imaraykun p'unchay-ch'isiyaq kaypi qasishankichis? nispa.

⁷Paykunataq nirqanku: —Manan pipas mink'akuwankuchu, nispa. Chaymi chakrayoqqa nirqan: —Qankunapas uvas chakraypi llank'ampullawaychistaq, iman paganatan pagapusqaykichis, nispa.

⁸Inti haykuyña kaqtintaq uvas chakrayoqqa mayordomonta nirqan: —Llank'aqkunata waqyaspa pagapuy, qhepa haykuqkunamanta qallarispan ñawpaq haykuqkunapi tukupunki, nispa.

⁹Las cincota hinaña haykuqkunataq sapankanku huk jornaltakama chaskirqanku.

¹⁰Hinan ñawpaqta haykuqkunaqa aswan askha chaskiyta yuyarqanku, ichaqa paykunapas huk jornaltakamallapunin chaskirqanku.

¹¹Chaymi huk jornaltakama chaskispa chakrayoq contra rimaspa nirqanku:

¹²—Kay qhepa haykuqkunaqa huk horallatan llank'anku, chaychu ñoqaykuman hinallataq paganki, ñoqaykuqa ch'isiyaqnintinmi sayk'uytapas ruphaytapas muchurqayku, nispa.

¹³Hinan chakrayoqqa hukkaqninkuta nirqan: —Amigo, manan ñoqaqa mana chanintachu ruwayki, ¿manachu huk jornalta paganaypaq rimanakurqanchis?

¹⁴Pagoykita aparikuspa ripuy, kay qhepa kaqmanpas qanman hinallataqmi pagayta munani.

¹⁵Qolqeywanqa ñoqan yachani ima ruwaytapas. Icha, ¿envidiakunkichu allin runa kaqtiy? nispa.

¹⁶Chay qhepatan Jesusqa nirqan: —Ñawpaqkaqkunan qhepa kanqaku, qhepakaqkunataq ñawpaq kanqaku, nispa.

¹⁷Jesusmi Jerusalén llaqtaman rishaspa chunka iskayniyoq yachachisqankunata ñanpi wakneqman pusaspa nirqan:

¹⁸—Jerusalén llaqtamanmi rishanchis, Diospa Kachamusqan Runaqa sacerdote umallikunaman kamachikuy simita yachachiqkunamanwan hap'ichisqan kasaq, hinan wañunaypaq huchachawanqaku.

¹⁹Mana Judío runakunamanmi entregawanqaku, hinan paykunaqa asipayawanqaku, suq'awanqaku, chakatawanqaku ima. Kinsakaq p'unchaypitaqmi kawsarimpusaq, nispa.

²⁰Zebedeoq warminmi churinkunantin Jesusman asuykurqan, hinaspan qonqoriykukuspa valekurqan.

²¹Jesustaq nirqan: —¿Imatan munanki? nispa. Hinan warmiqa nirqan: —Kamachikushaspayki, kay iskaynin churiyta hukninta paña ladoykipi, huknintataq lloq'e ladoykipi tiyaykachiy, nispa.

²²Chaymi Jesusqa nirqan: —Manan yachankichischu imatachus mañakusqaykichista. ¿Ñoqa hina ñak'ariyta atiwaqchischu? nispa. Paykunataq nirqanku: —Arí, atisaqkun, nispa.

²³Hinan Jesusqa nirqan: —Arí, ñoqa hinapas ñak'arinkichismi, paña ladoypi lloq'e ladoypiwan tiyaykunaykichismi ichaqa mana ñoqaq tiyaykachinaychu, aswanpas Yayaypa akllasqankunapaqmi chay tiyanakunaqa, nispa.

²⁴Chayta uyarispataq chunkantin yachachisqankunaqa chay iskay wawqepaq phiñakurqanku.

²⁵Chaymi Jesusqa paykunata waqyaspa nirqan: — Yachankichismi wak suyukunapi kamachikuqkunaqa paykuna ukhupi munaychakusqankuta, paykuna ukhupi uma kaqkunapas atiyniyoq kasqankuta.

²⁶Qankuna ukhupin ichaqa mana chay hinachu kanqa, aswanqa, pipas qankuna ukhupi uma kayta munaqqa, serviqniykichismi kanqa,

²⁷mayqenniykichispas uma kayta munaqqa, kamachiykichismi kanqa.

²⁸Diospa Kachamusqan Runapas manan servichikunaypaqchu hamurqani, aswanpas servinaypaqmi, hinaspa askha runa kacharichisqa kananrayku wañunaypaq, nispa.

²⁹Jericó llaqtamanta yachachisqankunawan Jesusqa lloqsishaqtintaq, askha runa Jesuspa qhepanta risharqanku.

³⁰Iskay ñawsakunan ñan patapi tiyasharqanku, Jesuspa chayninta rishasqanta uyarispataq kunkayoqta waqyakurqanku: — ¡Señor, Rey Davidpa miraynin, khuyapayaykuwayku! nispa.

³¹Runakunataq chay ñawsakunata phiñarikurqanku upallanankupaq, ñawsakunataq ichaqa aswanta waqyakurqanku: — ¡Señor, Rey Davidpa miraynin, khuyapayaykuwayku! nispa.

³²Hinan Jesusqa sayaykurqan, hinaspa paykunata waqyaspa nirqan: —¿Imatan qankunapaq ruwanayta munankichis? nispa.

³³Paykunataq nirqanku: —Señorniyku, qhawarichiwanaykikutan munayku, nispanku.

³⁴Chaymi Jesusqa paykunata khuyapayaspa ñawinkuta llamiykurqan, hinan qhawarirqankupacha, Jesuspa qhepantataq ripurqanku.