Read Quechua Cuzco Bible 1988 MATEO 21 Bible Online

MATEO 21 - Quechua Cuzco Bible 1988 bible

MATEO 21

¹Jerusalén llaqtaman qayllaykushaspankutaq, Olivos orqo chakipi Betfagé llaqtachaman chayaspanku, Jesusqa iskay yachachisqankunata kachaspa nirqan:

²—Haqay chimpa llaqtachaman riychis, haykuspaykichis hinan huk china asno watasqata tarimunkichis maltantinta. Paskaspataq aysamuwankichis.

³Pipas ima nispapas nisunkichisman chaytaqa ninkichis: Señorninchismi kaykunata necesitan, chaymantataq kutichimpusunkichis, nispaykichis, nispa.

⁴Tukuy chaykunaqa karqan profetaq*f** nisqan hunt'akunanpaqmi. Paymi nirqan: —Diosmi nin:

⁵Sión llaqtata niychis: Reyniykin hamushasunki, payqa huch'uyyaykukuqmi, asnopi sillaykusqan hamushan, cargana china asnoq orqo maltanpin hamushan, nispa, nispa.

⁶Hinan yachachisqankunaqa rispa, Jesuspa kamachikusqanman hina ruwarqanku.

⁷China asnotan maltantinta aysamurqanku, hinan p'achankuwan caronaykuqtinku Jesusqa sillaykukurqan.

⁸Askha runataq p'achankuta ñanpi mast'arqanku, wakintaq raphisapa k'allmakunata wit'uspa ñanpi mast'arqanku.

⁹Hinaspanmi ñawpaqenta qhepanta riqkunaqa qaparirqanku: —¡Yupaychasqa kachun Rey Davidpa mirayninqa! ¡Saminchasqa kachun Señor Diospa sutinpi hamuqqa! ¡Hanaq pachapi kaqkuna Diosta yupaychachunku! nispanku.

¹⁰Jerusalén llaqtaman Jesús haykuqtintaq llaqtallantin ch'aqwarispa tapunakurqanku: —¿Pitaq kayri? nispanku.

¹¹Jesuswan riq runakunataq nirqanku: —Payqa Galilea provinciapi Nazaret llaqtamanta profeta*f** Jesusmi, nispa.

¹²Jesusmi Dios yupaychana wasiman haykuspa chay ukhupi llapa vendeqkunata rantiqkunatawan qarqomurqan, qolqe cambiaqkunaq mesankunatapas, urpi vendeqkunaq tiyanankunatapas t'ikrarqarirqan.

¹³Hinaspan paykunata nirqan: —Diospa Simin Qelqan nin: Wasiyqa Diosmanta mañakuna wasi nisqan kanqa, nispa. Qankunataq ichaqa suwakunaq tiyanan qaqa wasiman hina tukuchipusqankichis, nispa.

¹⁴Dios yupaychana wasipi kashaqtinmi ñawsakuna wist'ukuna Jesusman asuykurqanku, hinan paykunata qhaliyachirqan.

¹⁵Sacerdote umallikuna kamachikuy simita yachachiqkunapiwan ichaqa milagrokunata Jesuspa ruwasqanta rikuspa, wawakunaq Dios yupaychana wasipi qaparispa: — ¡Yupaychasqa kachun Rey Davidpa miraynin! nisqatawan uyarispa phiñakurqanku,

¹⁶hinaspan Jesusta nirqanku: —¿Uyarishankichu imatachus kaykunaq nisqanta? nispa. Jesustaq paykunata nirqan: —Arí, uyarishanin, ¿manachu Diospa Simin Qelqata leerqankichis? Chaypin nin: Qanqa huch'uy wawakunatan ñuñuq wawakunatan yachachirqanki allintapuni yupaychanasuykikupaq, nispan, nispa.

¹⁷Hinaspan Jesusqa paykunata saqerparispan Jerusalén llaqtamanta Betania llaqtachaman rirqan, chaypin samakurqan.

¹⁸Tutamanta Jerusalenman kutimushaspataq Jesusqa yarqachikurqan.

¹⁹Ñan patapi higos sach'ata rikuspataq chayman asuykurqan pallananpaq, manataq ima rurutapas chaypi tarirqanchu, aswanpas raphikunallatan tarirqan. Hinan chay higos sach'ata nirqan: —Amaña hayk'aqpas ruruyñachu, nispa. Chaymi higos sach'aqa ch'akirqapurqan.

²⁰Yachachisqankunataq chayta rikuspa musphaspa nirqanku: —¿Imaynataq higos sach'aqa kaq rato ch'akirqapun? nispanku.

²¹Jesustaq paykunata nirqan: —Cheqaqta niykichis, iñiwaqchischus, manataq iskayrayawaqchischu chayqa, manan kay higos sach'awan ruwasqallatachu ruwawaqchis, aswan kay orqotapas niwaqchis: —Anchhuriy, qochaman wikch'uykukuy, nispa chayqa wikch'uykukunmanmi.

²²Tukuy imatapas iñiywan Diosmanta mañakunkichis chayqa, chaskinkichismi, nispa.

²³Dios yupaychana wasiman haykuspa Jesús yachachishaqtintaq, sacerdote umallikuna llaqtapi kurak runakunapiwan payman asuykurqanku: —¿Ima atiywantaq kaykunata ruwashanki? ¿Pitaq kay atiyta qorqasunki? nispa.

²⁴Jesustaq paykunata nirqan: —Ñoqapas hukta tapuykusqaykichis, kutichiwankichistaq, hinan ima atiywanchus kay ruwasqayta willasqaykichis.

²⁵¿Pitaq bautizananpaq Juanta kachamurqan? ¿Dioschu? Icha, ¿runakunachu? nispa. Chaymi paykunaqa ninakurqanku: —Diosmi, nisunchis chayqa, ninqan: —¿Imaraykutaq payta mana creerqankichischu? nispa.

²⁶Runakunan, nisun chayqa, llaqtachá imanawasunmanraq, Bautizaq Juantaqa llapa runan cheqaq profetapaq*f** hap'inku, nispanku.

²⁷Chaymi Jesusta nirqanku: —Manan yachaykuchu, nispa. Jesuspas paykunata nillarqantaq: —Ñoqapas manan niykichismanchu ima atiywanchus kayta ruwashasqayta, nispa.

²⁸Jesusmi nirqan: —¿Ima niwaqchistaq kaymanta? Huk runan iskay churiyoq karqan, hinan taytaqa kurakkaqman asuykuspa nirqan: Churíy, kunan p'unchay uvas chakranchispi llank'arqamuy, nispa.

²⁹Hinan payqa: Manan riymanchu, nirqan. Qhepataña yuyaykukuspataq rirqan.

³⁰Taytaqa sullk'akaqman asuykuspan chay hinallatataq nirqan. Hinan payqa: Risaqmi taytáy, nirqan, ichaqa manan rirqanchu.

³¹¿Mayqenkaqtaq taytanpa munayninta ruwarqan? nispa. Paykunataq: —Kurakkaqmi, nirqanku. Chaymi Jesusqa paykunata nirqan: —Cheqaqtan niykichis, contribución cobraqkunapas rabona warmikunapas qankunamanta ñawpaqtaraqmi Diosta kamachiqninku kananpaq chaskinku.

³²Bautizaq Juanqa chanin kawsayta yachachinasuykichispaqmi hamurqan, manataq payta creerqankichischu. Aswanpas contribución cobraqkunan rabona warmikunan Juantaqa creerqanku, qankunataq chayta rikushaspapas manapuni Juanta creespa huchaykichismanta Diosman kutirikurqankichischu, nispa.

³³Jesusmi nillarqantaq: —Wak rikch'anachiy simitawan uyariychis: Huk runan chakranpi uvasta plantarqan, hinaspan muyuriqta perqarqan, chaypitaq uvas sarunata t'oqorqan, qhawanapaq torretapas perqarqan. Hinaspataq llank'aqkunaman wakiypi qospa karuta ripurqan.

³⁴Cosecha tiempo chayamuqtintaq chakrayoqqa kamachinkunata llank'aqkunaman kacharqan, rurusqanta chaskimunankupaq.

³⁵Llank'aqkunataq ichaqa kamachinkunata hap'ispa hukninta maqarqanku, huknintataq wañuchirqanku, huknintañataq ch'aqerqanku.

³⁶Chaymi chakrayoqqa wak kamachikunatañataq kacharqan, ñawpaqkunamanta aswan askhata. Chay llank'aqkunataq wakinkunata hinallapuni ruwarqanku.

³⁷Qhepatañataq churinta paykunaman kacharqan: Churiytaqa respetanqakupunin, nispa.

³⁸Llank'aqkunataq ichaqa churita rikuspa rimanakurqanku: Kayqa chakrayoqpa churinmi, hamuychis wañurqachisun, chakrataq ñoqanchispaq kapunqa, nispa.

³⁹Chaymi hap'ispa payta uvas chakramanta qarqomurqanku, hinaspan wañuchirqanku, nispa.

⁴⁰Jesusmi tapurqan: —Uvas chakrayoq hamuspaqa, ¿imananqataq chay llank'aqkunata? nispa.

⁴¹Hinan uyariqninkunaqa nirqanku: —Chay millay runakunataqa mana khuyapayaspan wañuchinqa, hinaspan uvas chakranta wak llank'aqkunaman wakiypi qonqa, payman tupaq cosechata tiempollanpi qopunankupaq, nispa.

⁴²Jesustaq paykunata nirqan: —¿Manachu Diospa Simin Qelqata leerqankichis? Chaypin kay hinata nin: Wasi perqaqkunaq wikch'usqan rumin, esquina hap'iq churasqa kapun. Señor Diospa ruwasqanmi kayqa, ñoqanchispaqtaqmi ancha musphana, nispa, nispan.

⁴³Chayraykun niykichis: Diosqa manan kamachiqniykichischu kanqa, aswanpas Diosqa paypaq hina kawsaqkunallatan kamachinqa.

⁴⁴[Pipas kay rumiman urmaqqa k'irisqan kanqa, pimanpas rumi urmaykuspataqmi ñut'unqa, nispa.]

⁴⁵Sacerdote umallikunataq fariseokunapiwan*f** chay rikch'anachiy siminkunata uyarispa, entienderqanku paykunamanta rimashasqanta.

⁴⁶Chaymi payta hap'irqoyta munarqanku, ichaqa runakunatan manchakurqanku, Jesusta cheqaq profetapaq*f** hap'isqankurayku.