Read Quechua Cuzco Bible 1988 MATEO 22 Bible Online

MATEO 22 - Quechua Cuzco Bible 1988 bible

MATEO 22

¹Jesusmi huktawan rikch'anachiy simikunapi runakunata yachachispa nirqan:

²—Diospa kamachikushasqanqa kaymanmi rikch'akun. Huk reymi churinta casarachishaspa fiestata ruwarqan.

³Chay reymi kamachinkunata kacharqan casarakuy fiestaman waqyasqakunata pusamunankupaq. Ichaqa manan hamuyta munarqankuchu.

⁴Huk kamachinkunatañataq wakmanta kacharqan: Waqyasqakunata nimuychis: Mikhunatan wakichiniña, wirayachisqa toroykunan uywaykunapiwan nak'asqaña, lliwpas wakichisqañan kashan, hamuychis casarakuy fiestaman, nispaykichis, nispa.

⁵Waqyasqakunataq mana kasukurqankuchu, hinaspan ripurqanku. Hukkaqmi chakranman ripurqan, hukkaqtaq negocionman ripurqan,

⁶wakintaq reypa kamachinkunata maqaspa wañuchirqanku.

⁷Chaymi reyqa chayta uyarispa phiñakurqan, hinaspan soldadonkunata kamachirqan, paykunataq runa wañuchiqkunata wañuchirqanku, llaqtankutapas kanaykurqanku.

⁸Hinan reyqa kamachinkunata nirqan: Casarakuy fiestaqa wakichisqañan kashan, waqyasqakunataq ichaqa mana kasuwaspanku reparachikunku mana chaypaq hina kasqankuta.

⁹Chay hinaqa, hatun callekunaman riychis, hinaspa llapan tarisqaykichista casarakuy fiestaman waqyamuychis, nispa.

¹⁰Chaymi kamachikunaqa callekunaman lloqsispanku, llapan tarisqankuta huñumurqanku, mana allin runakunatapas allin runakunatapas. Chaymi hatun mikhuna wasiman runakuna hunt'aykurqan.

¹¹Hinan reyqa runakunata qhawaq haykurqan, hinaspan chaypi rikurqan casarakuy p'achawan mana p'achasqa runata.

¹²Chaymi nirqan: Amigo, ¿imaynataq kayman haykumurqanki casarakuy p'achawan mana p'achasqa? nispa. Paytaq ichaqa ch'inlla kakurqan.

¹³Hinan reyqa serviqkunata nirqan: Chakinta makintawan wataspa apaychis, hinaspa hawa laqhayaqman wikch'umuychis, chaypin waqaypas kiru k'achachachaypas kanqa, nispa.

¹⁴Askhan waqyasqakunaqa, pisillataqmi akllasqakunaqa, nispa.

¹⁵Chaymantataq fariseokunaqa*f** rispa rimanakurqanku imaynatachus Jesusta ima rimasqallanpipas pantarqoqtin huchachanankupaq.

¹⁶Hinaspan fariseokunaqa*f** yachachisqanku runakunata Herodes t'aqamanta kaqkunatawan Jesusman kacharqanku kay hinata nimunankupaq: —Yachachikuq, yachaykun cheqakaqta rimaq kasqaykita. Qanqa runaq rimasqanta mana kasuspan Diospa munasqanman hina kawsanata yachachinki. Qanqa manan runakunaq rikch'aynintachu qhawanki.

¹⁷Imaninkitaq: Diospa kamachikuyninman hinaqa, ¿allinchu hatun rey Cesarman contribucionta pagay? Icha, ¿manachu? nispa.

¹⁸Jesustaq ichaqa mana allin yuyaykusqankuta reparaspa nirqan: —Iskay uyakunan kankichis, ¿imanaqtintaq wateqawankichis?

¹⁹Contribución pagana qolqeta rikuchiwaychis, nispa. Hinan huk qolqeta haywarqanku.

²⁰Jesustaq paykunata nirqan: —¿Piqpa uyantaq kaypi kashan? ¿Piqpa sutintaq kaypi qelqasqa kashan? nispa.

²¹Paykunataq nirqanku: —Rey Cesarpan, nispanku. Hinan Jesusqa paykunata nirqan: —Rey Cesarpa kaqtaqa payman qopuychis, Diospa kaqtapas Diosman qopuychis, nispa.

²²Chayta uyarispataq muspharqanku, hinaspan qayllanmanta ripurqanku.

²³Chay p'unchaypin “Kawsarimpuyqa manan kanchu” niq saduceokuna*f** Jesusman asuykuspa tapurqanku:

²⁴—Yachachikuq, Moisesmi nirqan: Pipas mana wawayoq wañukapunman chayqa, wawqenmi chay viudawan casarakunqa, hinaspan wañuq wawqenpaq wawata churiyapunqa, nispa.

²⁵Ñoqayku ukhupin qanchis wawqe karqanku. Ñawpaqkaqmi casarakurqan hinaspan wañukapurqan, viudataq mana wawayoq kaspa cuñadonwan casarakurqan.

²⁶Chay hinallataq iskaykaqpas, kinsakaqpas, qanchiskamapas wañurqanku.

²⁷Llapankuq qhepantataq warmipas wañukapullarqantaq.

²⁸Kawsarimpuy p'unchaypi kawsarimpuqtinkuri, ¿mayqenpa warmintaq kanqa chay qanchisnintin wawqeqri? Llapanwantaq casarakunpas chayri, nispa.

²⁹Jesustaq paykunata nirqan: —Pantankichismi Diospa Simin Qelqatapas Diospa atiynintapas mana yachaspa.

³⁰Kawsarimpuypiqa manan casarakunqakuchu, manallataq casarachisqapaschu kanqaku, aswanmi hanaq pachapi Diospa angelninkuna hina kanqaku.

³¹Wañusqakunaq kawsarimpunanmantapas, ¿manachu leerqankichis qankunaman Diospa rimaykusqanta? Diosmi nirqan:

³²Ñoqan kani Abrahampa Diosnin, Isaacpa Diosnin, Jacobpa Diosnin, nispa. ¡Diosqa manan wañusqakunaq Diosninchu, aswanpas kawsaqkunaq Diosninmi! nispa.

³³Runakunataq Jesuspa yachachikuyninta uyarispa muspharqanku.

³⁴Hinan fariseokunaqa*f** saduceokunata*f** Jesuspa upallachisqanta uyarispa huñunakurqanku.

³⁵Hukninkun karqan Diospa kamachikuyninta yachachiq, paymi Jesusta wateqaspa tapurqan:

³⁶—Yachachikuq, ¿mayqentaq Diospa kamachikuyninmantaqa aswan chaniyoq? nispa.

³⁷Jesustaq payta nirqan: —Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan.

³⁸Chaymi aswan chaniyoq ñawpaqkaq kamachikuyqa.

³⁹Iskaykaq aswan chaniyoqqa kaymi: Runamasiykitan qan kikiykita hina munakunki.

⁴⁰Chay iskaynin kamachikuykunamantan tukuy kamachikuy simipas profetakunaq*f** willasqanpas paqarin, nispa.

⁴¹Fariseokuna*f** huñunasqa kashaqtinkutaqmi Jesusqa paykunata tapurqan:

⁴²—¿Ima ninkichistaq Diospa Akllasqan Cristomanta? ¿Piqpa miraynintaq? nispa. Paykunataq nirqanku: —Rey Davidpa mirayninmi, nispa.

⁴³Chaymi Jesusqa paykunata nirqan: —¿Imaynataq rey Davidqa Santo Espirituq yuyaychasqan kaspa Diospa Akllasqan Cristota: Señor, nispa suticharqan? Davidmi nirqan:

⁴⁴Señor Diosmi Señorniyta nirqan: Pañaneqeyman tiyaykuy, awqaykikunata pasaqta atipanaykama, nispa.

⁴⁵Kikin Davidtaq Cristota “Señor”, nispa nin chayqa, ¿imaynapitaq rey Davidpa mirayninqa kanman? nispa.

⁴⁶Hinaqtinmi mana pipas imatapas payman kutichiyta atirqanchu. Manchakuspankun chay p'unchaymantapacha manaña pipas astawan Jesusta tapurqanchu.