Read Quechua Cuzco Bible 1988 MATEO 23 Bible Online

MATEO 23 - Quechua Cuzco Bible 1988 bible

MATEO 23

¹Chaymantataq Jesusqa huñuykusqa runakunata yachachisqankunatawan nirqan:

²—Moisespa yachachisqanta yachachinankupaq churasqan kanku kamachikuy simita yachachiqkunapas fariseokunapas*f**.

³Chay hinaqa tukuy ima nisqasuykichista allinta ruwaychis. Ichaqa ama paykuna hinachu kaychis, paykunaqa yachachishaspapas manan ruwankuchu.

⁴Paykunaqa sinchi sasakunatan kamachikunku runakunaman llasallataña q'epichiq hina. Paykunataqmi ichaqa manapuni yanapaykullankupaschu.

⁵Tukuy imatapas runakunaq rikunallanpaqmi ruwanku. Diospa Simin Qelqayoq qara cajachankutan hatunta ruwaspa churakunku, p'achankuq ch'ullpanpin hatun chhaqchata ruwakunku.

⁶Hatun mikhuykunapin allinkaq tiyanakunata munanku, Diosmanta yachachina wasikunapipas kurak runakunaq tiyanankunatan munanku,

⁷plazakunapipas runakunaq napaykunanta munanku, “Yachachiqkuna” ninankutawan munanku.

⁸Qankuna ichaqa ama munaychischu “Yachachiq” ninataqa, yachachiqniykichisqa ñoqallan kani, qankunaqa llapaykichismi wawqellantin kankichis.

⁹Amataq pitapas kay pachapiqa “Yayay” niychischu, Yayaykichisqa ch'ullallan, hanaq pachapi kaqllan.

¹⁰Amallataq “Kamachikuq” nisqapas kaychischu, kamachiqniykichisqa ñoqa Cristollan kani.

¹¹Pipas qankuna ukhupi qollana kaqqa, kamachiykichis ruwaq kachun.

¹²Pipas hatunchakuqqa huch'uyyachisqan kanqa, pipas huch'uyyaykukuqtaq hatunchasqa kanqa.

¹³¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Diosta kamachiqninkupaq chaskiyta munaqkunatan hark'ankichis, chaskishaqkunatapas hark'allankichistaqmi, qankunapas manapunin Diosta chaskiyta munankichischu kamachiqniykichis kananpaq.

¹⁴[¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Wakcha viudakunaq kaqnintan qechunkichis, Diosmanta unayta mañakuspa chay ruwasqaykichista pakayta munankichis, chayraykun aswan huchachasqa kankichis.]

¹⁵¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Hinantintan purimunkichis t'aqaykichisman huk runata t'ikrachinaykichispaq, t'ikrakuqtinñataqmi chay runataqa infiernoman rinanpaqpuni tukuchinkichis.

¹⁶¡Ay qankunamanta, pusaykachaq ñawsakuna! Qankunan ninkichis: Pipas Dios yupaychana wasiq sutinta hoqarispa juran chayqa, manan imananpaschu. Pipas Dios yupaychana wasipi qoriq sutinta hoqarispa juraqmi ichaqa hunt'ananpuni, nispa.

¹⁷¡Qankunaqa mana yuyayniyoq ñawsakunan kankichis! ¿Mayqentaq aswan chaniyoqqa? ¿Qorichu? Icha, ¿qorita sapaqchaq Dios yupaychana wasichu?

¹⁸Nillankichistaqmi: Pipas altarpa sutinta hoqarispa juran chayqa, manan imananpaschu. Pipas altar patapi kaq ofrendaq sutinta hoqarispa juraqmi ichaqa hunt'ananpuni, nispa.

¹⁹¡Qankunaqa mana yuyayniyoq ñawsakunan kankichis! ¿Mayqentaq aswan chaniyoqqa? ¿Ofrendachu? Icha, ¿ofrendata Diospaq sapaqchaq altarchu?

²⁰Pipas altarpa sutinta hoqarispa juran chayqa, altar patapi kaq ofrendaq sutinpiwanmi juran.

²¹Pipas Dios yupaychana wasiq sutinta hoqarispa juran chayqa, chaypi tiyaq Diospa sutinpiwanmi juran.

²²Pipas hanaq pacha sutita hoqarispa juran chayqa, Diospa kamachikuy tiyananpa sutinpin juran, chay tiyanapi tiyaq Diospa sutinpiwanmi juran.

²³¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Qankunan diezmota qonkichis mentamanta, anismanta, cominomantawan, Diospa kamachikuy siminmanta aswan chaniyoq kaqtataq qonqapunkichis. Chaykunan kaykuna: chanin-kay, khuyapayakuy, hunt'aq-kaypiwan. Chaykunatan ruwanaykichispuni karqan, diezmo qoytapas mana qonqaspa.

²⁴¡Pusaykachaq ñawsakunan kankichis! ¡Ch'uspichatan ukyanaykichispi suysunkichis, camellotataq oqoykunkichis!

²⁵¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Vasotapas platotapas hawallantan maqchinkichis, chaykunaq ukhuntaq ichaqa suwakusqaykichiswan hillukuspa tarisqaykichiswan hunt'a kashan.

²⁶¡Yaw, ñawsa fariseo,*f** ñawpaqtaqa maqchiy vasotapas, platotapas ukhuntaraq, chay hinapi hawanpas maqchisqa kananpaq!

²⁷¡Ay qankunamanta iskay uya fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Yuraqwan hawan pintasqa aya t'oqomanmi rikch'akunkichis, hawallanmanmi sumaq rikch'akun, ukhuntaq ichaqa aya tullukunawan qhellikunapiwan hunt'a kashan.

²⁸Chay hinallataq qankunapas hawaykichismantaqa runakunaman chanin rikhurinkichis, sonqoykichispitaq ichaqa iskay uya huchasapa kankichis.

²⁹¡Ay qankunamanta fariseokuna,*f** kamachikuy simita yachachiqkuna! ¡Qankunaqa iskay uyakunan kankichis! Profetakunaq*f** p'ampakusqanpin yuyarina saywakunata sayarichinkichis, chanin runakunaq p'ampakusqantapas sumaqchankichis.

³⁰Ninkichistaq: Machulanchiskunaq tiemponpi kasunman karqan chayqa, manan profetakunata*f** wañuchiq-masinkuchu kasunman karqan, nispa.

³¹Chay hinaqa, qankuna kikiykichismi willakunkichis profetakunata*f** wañuchiqkunaq wawan kasqaykichista.

³²¡Qankunapas machulaykichiskunaq ruway qallarisqantayá tukupaychis!

³³¡Mach'aqway hinan kankichis! ¡Arí, mach'aqway hinapunin! Infiernopaqña huchachasqa kasqaykichismantaqa manañan ayqeyta atiwaqchischu.

³⁴Chayrayku qankunaman kachamuni profetakunata,*f** yachayniyoqkunata, kamachikuy simita yachachiqkunata ima, wakintan wañuchinkichis chakatankichis, wakintataq Diosmanta yachachina wasikunapi hasut'inkichis, llaqtan-llaqtantataq qatiykachankichis.

³⁵Chanin Abelmantapacha Berekiaspa churin Zakariaskaman askha chanin runakuna wañuchisqa karqanku. Qankunaqa Zakariastan wañuchirqankichis Dios yupaychana wasi patio altar qayllapi. Llapa chaykunaq wañuchisqa kasqankumantan qankunaqa muchuchisqa kankichis.

³⁶Cheqaqtan niykichis, tukuy chaykunamantan qankunataqa muchuchisunkichis, nispa.

³⁷¡Jerusalén, Jerusalén! Qanmi kanki profetakunata*f** wañuchiq, qanman Diospa kachamusqankunatapas rumiwan ch'aqeq! ¡Askha kutitan wawaykikunata huñuykuyta munarqani imaynan wallpapas chiwchinkunata raphran ukhupi oqllaykun hinata, manataq munarqankichu!

³⁸Chay hinaqa, wasiykichismi purunyapunqa.

³⁹Niykichismi, manan rikuwankichisñachu ¡“Saminchasqa kachun Señor Diospa sutinpi hamuqqa!” nispa ninaykichis tiempo chayamunankama, nispa.