Read Quechua Cuzco Bible 1988 MATEO 24 Bible Online

MATEO 24 - Quechua Cuzco Bible 1988 bible

MATEO 24

¹Dios yupaychana wasimanta lloqsispataq Jesusqa ripusharqan, hinan yachachisqankunaqa payman asuykuspanku, Dios yupaychana wasikunata payman qhawachirqanku.

²Jesustaq paykunata nirqan: —¿Rikushankichischu lliw kaykunata? Cheqaqta niykichis, manan kaypiqa rumi patapi huk rumillapas qhepanqachu, llapanmi thunisqa kanqa, nispa.

³Olivos orqopi Jesús tiyaykuqtintaq yachachisqankunaqa sapaqllapi payman asuykuspa tapurqanku: —Niwayku, ¿hayk'aqtaq chaykunaqa kanqa? Kutimunaykiña kashaqtinqa kay tiempopas p'uchukapunanpaqña kashaqtinqa, ¿imakunatan rikusaqku? nispa.

⁴Jesustaq paykunata nirqan: —Cuidakuychis, paqtataq pipas pantachisunkichisman.

⁵Askhan sutiywan sutichakuspa hamunqaku: Ñoqan Diospa Akllasqan Cristoqa kani, nispa. Hinaspan askhata pantachinqaku.

⁶Awqa-tinkuykunamanta, ch'aqwaykunamantawan rimaytan uyarinkichis, ichaqa aman mancharikunkichischu, lliw chaykunaqa hinapunin kanan, chaywanpas manaraqmi p'uchukaychu.

⁷Llaqtakunan huk llaqtakuna contra maqanakunqa, hatun suyupas hatun suyu contra sayarinqa, kallanqataqmi askha cheqaskunapi yarqaypas pacha chhaphchiykunapas.

⁸Tukuy chaykunaqa nanay qallariyllaraqmi.

⁹Chay p'unchaykunapin ñak'arichinasuykichispaq kamachikuqkunaman hap'iykachisunkichis, hinaspan wañuchisunkichis. Ñoqaraykun lliw llaqtakuna cheqnikusunkichis.

¹⁰Chay p'unchaykunaqa askhan ñoqapi manaña iñipunqakuchu, cheqninakuspataq paykuna pura kamachikuqkunaman hap'iykachinakunqaku.

¹¹Askha llulla profetakunan*f** rikhurimunqaku, hinaspan askha runata pantachinqaku.

¹²Mana allin ruwaqkuna sinchita askhayaqtinmi manaña askha runa munanakapunqakuchu.

¹³Ichaqa pipas p'uchukaykama qaqa sayaqmi qespichisqa kanqa.

¹⁴Diospa kamachikushasqanmanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p'uchukayqa chayamunqa.

¹⁵Profeta*f** Danielmi qelqarqan Diospa millakusqan qhellichaq runamanta, Dios yupaychana wasipi chay qhellichaqta rikuqtiykichisqa, Judea hap'iypi kaqkuna orqokunaman ayqechunku. (Kayta leeqqa entiendechun)

¹⁶

¹⁷Wasi patapi kaqpas ama uraykuchunchu wasinmanta imatapas horqomunanpaq.

¹⁸Campopi kaqpas ama wasinman kutichunchu p'achankunata apananpaq.

¹⁹¡Ay chay p'unchaykunapi wiksallikuqkunamanta! ¡Ay ñuñuq wawayoq warmikunamantapas!

²⁰Diosmanta mañakuychis chaykuna ama paray tiempopipas samana p'unchaypipas kananpaq.

²¹Chay p'unchaykunaqa manchay ñak'ariymi kanqa, chay hinaqa manan hayk'aqpas kay pacha qallariymantapacha kunankama karqanchu, manataqmi kanqapaschu.

²²Chay p'unchaykunatachus Diosqa mana pisiyachinmanchu karqan chayqa, manan pipas qespichisqachu kanman. Ichaqa, akllakusqankunaraykun chay p'unchaykunata pisiyachinqa.

²³Pipas nisunkichisman: “¡Qhawariychis, kaypin Diospa Akllasqan Cristoqa kashan!” otaq ¡Qhawariychis, haqaypin Cristoqa kashan! nispa chayqa, aman creenkichischu.

²⁴Llulla cristokunan llulla profetakunan*f** rikhurimunqaku, hinaspan musphay señalkunatapas milagrokunatapas ruwanqaku, chay hinapi atispaqa Diospa akllakusqankunatapas pantachinankupaq.

²⁵Chaykunataqa ñawpaqmantañan willashaykichis.

²⁶Chayrayku: “Qhawariychis, ch'inneqpin kashan” nisunkichis chayqa, aman lloqsinkichischu. Otaq “Qhawariychis, chay wasi ukhupin kashan” nisunkichis chaypas, aman creenkichischu.

²⁷Imaynan lliphllikiyqa inti lloqsimuymanta lliphllikispa inti haykuykama k'ancharin, chay hinallatataqmi Diospa Kachamusqan Runapas hamusaq.

²⁸Maypichus wañusqa kashanqa, chaymanmi kunturkunapas huñukunqaku, nispa.

²⁹Jesusqa nillarqantaqmi: —Chay ñak'ariy p'unchaykuna pasaqtin hinan inti tutayanqa, killapas mana k'anchanqachu, qoyllurkunapas cielomanta t'akakamunqa, hanaq pachapi ch'askakunapas chhaphchirisqan kanqa.

³⁰Hinaqtinmi Diospa Kachamusqan Runata hanaq pachamanta hamushaqta rikuwanqaku, chaymi kay pachapi llapa runakuna khuyayta waqaykunqaku, Diospa Kachamusqan Runatan rikuwanqaku hatun atiywan lliphlli-kaywan phuyupi hamushaqta.

³¹Ñoqan angelniykunata kachamusaq trompetata sinchita tocaqtin teqsimuyuntinmanta akllakusqaykunata huñumunankupaq.

³²Higos sach'amanta kay yachachikuyta yachaychis: K'allman q'omeryamuqtin, raphinkunapas ch'ikchirimuqtinmi yachankichis poqoy tiempo qayllamushasqanta.

³³Chay hinallataq qankunapas tukuy chaykunata rikuspaykichisqa, yachaychis ñoqaqa qayllallapiña kashasqayta.

³⁴Cheqaqtan niykichis, manan kay mirayqa tukukunqachu lliw chaykuna hunt'akunankama.

³⁵Hanaq pachapas kay pachapas tukukunqan, simiykunan ichaqa kashallanqapuni.

³⁶Chay p'unchayta chay horatawanmi ichaqa mana pipas yachanchu, manallataq hanaq pachapi kaq angelkunapas, aswanpas Yayallan yachan.

³⁷Imaynan Noepa p'unchayninkunapi karqan, chay hinallataqmi Diospa Kachamusqan Runa hamuqtiypas kanqa.

³⁸Runakunata unu manaraq millp'ushaqtinmi, mikhusharqanku, ukyasharqanku, casarakusharqanku, casarakunapaq rimaykusqa kasharqanku, Noepa tuyuq wasiman haykusqan p'unchaykama,

³⁹manataq imatapas repararqankuchu unu millp'uy chayamuspa llapanta millp'unankama. Chay hinallataqmi Diospa Kachamusqan Runa hamuqtiypas kanqa.

⁴⁰Campopin iskay runa kashanqaku, hukninmi apasqa kanqa, huknintaq saqesqa.

⁴¹Iskay warmin maranpi kutashanqaku, hukninmi apasqa kanqa, huknintaq saqesqa.

⁴²Makilla kashaychis, manan yachankichischu ima horatachus ñoqa Señorniykichispa kutimunayta.

⁴³Kayta yachaychis, wasiyoq runa ima hora tutatachus suwa hamunanta yachanman chayqa, rikch'anmanmi manataq wasinta suwachinmanchu.

⁴⁴Diospa Kachamusqan Runaqa hamusaq mana yachasqaykichis horatan, chayrayku qankunapas makilla kashaychis, nispa.

⁴⁵Jesusqa nillarqantaqmi: —Allin yuyayniyoq hunt'aq kamachi hina kaychis. Paytan patronninqa wasinpi kaqkunata kamachinanpaq churan, tiempollanpi kamachinkunaman mikhunatapas qonanpaqwan.

⁴⁶Chay mayordomoqa kusisamiyoqmi patronin kutimuspa chay hina ruwashaqta payta tariqtinqa.

⁴⁷Cheqaqtan niykichis, paytan patronninqa churanqa tukuy kaqninkunata qhawananpaq.

⁴⁸Ichaqa chay mayordomo millay kanman chayqa, sonqonpin ninman: Manaraqmi patronniyqa kutimunqachu, nispa.

⁴⁹Hinaspa kamachi-masinkunata maqayta qallarinman, machaqkunawantaq mikhunmanpas ukyanmanpas chayqa,

⁵⁰chay mayordomoq patronninqa kutimunqa mana suyasqan p'unchaypin, mana yachasqan horapin.

⁵¹Hinaspan sinchita payta muchuchinqa, iskay uyakunatawantaq churanqa, chaypin waqaypas kiru k'achachachaypas kanqa, nispa.