Read Quechua Cuzco Bible 1988 MATEO 25 Bible Online

MATEO 25 - Quechua Cuzco Bible 1988 bible

MATEO 25

¹Jesusqa nillarqantaqmi: —Diospa kamachikushasqanqa kaymanmi rikch'akun: Chunka sipaskunan lamparantinkama novioman taripaq rirqanku.

²Phisqa sipasmi yuyayniyoq karqan, phisqataq mana yuyayniyoq karqan.

³Mana yuyayniyoqkunaqa lamparankutan aparqanku, manataq yapanankupaq aceiteta aparqankuchu.

⁴Yuyayniyoqkunataq lamparankuta aparqanku, apallarqankutaq aceitetapas lamparankuman yapanankupaq.

⁵Novio mana usqhamuqtintaq llapanku puñuywan aysachikuspa puñurqorqanku.

⁶Kuska tutatataq huk waqyakuy uyarikurqan: ¡Novion hamushanña, lloqsiychis taripaq! nispa.

⁷Hinan chay llapallan sipaskunaqa hatarispa lamparankuta alistakurqanku.

⁸Mana yuyayniyoq sipaskunataq yuyayniyoqkunata nirqanku: Aceiteykichista qoriwayku, lamparaykun wañupushanña, nispa.

⁹Chaymi yuyayniyoqkunaqa nirqanku: Manan, llapanchismi pisichikusunman, aswanpas vendeqkunamanta rantikamuychis, nispanku.

¹⁰Paykuna rantikuq rishanankukamataq novioqa chayamurqan. Hinan listo kashaq sipaskunaqa casarakuyman haykurqanku. Punkutaq wisq'akapurqan.

¹¹Chay qhepatataq wakin sipaskunapas hamuspa nirqanku: ¡Wiraqocháy, wiraqocháy, kicharimuwayku! nispa.

¹²Noviotaq nimurqan: Cheqaqtan niykichis, manan reqsiykichischu, nispa.

¹³Chay rikch'anachiy simita rimayta tukuspataq uyariqninkunata Jesusqa nirqan: —Makilla kashaychis, manan yachankichischu ima p'unchaytachus ima horatachus ñoqa kutimunayta, nispa.

¹⁴Jesusqa nillarqantaqmi: —Diospa kamachikushasqanqa kaymanmi rikch'akun: Huk runan karuman ripunanpaq kasharqan, hinaspan kamachinkunata waqyaspa kaqninkuna qhawaqta saqerqan.

¹⁵Hukninmanmi phisqa bolsa qolqeta qorqan, hukninmantaq iskay bolsata, hukkaqmantaq huk bolsata. Sapankamanmi qorqan llank'ay atisqankuman hina. Hinaspan karuman ripurqan.

¹⁶Phisqa bolsa qolqeta chaskiqmi chay qolqewan llank'amuspa phisqa bolsa qolqetawan ganamurqan.

¹⁷Chay hinallataq iskay bolsa qolqeta chaskiqpas iskay bolsa qolqetawan ganamurqan.

¹⁸Huk bolsa qolqeta chaskiqmi ichaqa rispa pampata t'oqospa patronninpa qolqenta pakaykurqan.

¹⁹Unaymantataq chay kamachikunaq patronninqa kutimurqan, hinaspan paykunamanta cuentata mañarqan.

²⁰Hinan phisqa bolsa qolqeta chaskiqqa phisqa bolsa qolqetawan apamuspa nirqan: Wiraqocháy, phisqa bolsa qolqetan qowarqanki, kayqa phisqa bolsa qolqetawanmi chaykunawan ganamuni, nispa.

²¹Patronnintaq nirqan: Kusa, allin hunt'aq kamachi, pisi llank'anapipas allintan hunt'arqanki, chaymi hatun llank'anaman churasqayki, kunanqa ñoqawan q'ochukuy, nispa.

²²Iskay bolsa qolqeta chaskiqpas asuykuspa nillarqantaq: Wiraqocháy, iskay bolsa qolqetan qowarqanki, kayqa chaykunawan iskay bolsa qolqetawanmi ganamuni, nispa.

²³Patronnintaq nirqan: Kusa, allin hunt'aq kamachi, pisi llank'anapipas allintan hunt'arqanki, chaymi hatun llank'anaman churasqayki, kunanqa ñoqawan q'ochukuy, nispa.

²⁴Huk bolsa qolqeta chaskiqpas asuykuspa nillarqantaq: Wiraqocháy, reqsirqaykin phiña runa kasqaykita, mana tarpusqaykimantan cosechanki, mana t'akasqaykimantan hoqarinki.

²⁵Chaymi manchakurqayki, hinaspan bolsa qolqeykita pampaman pakamurqani. Kayqa qolqeyki, hap'ikapuy, nispa.

²⁶Hinan patronninqa nirqan: Mana allin qella kamachi, yacharqankin mana tarpusqaymanta cosechasqayta, mana t'akasqaymanta hoqarisqaytapas.

²⁷Chhaynaqa qolqeyta bancoman churawaq karqan, ñoqataq hamuspay, uñantawan ñoqaq kaqtaqa chaskikapuyman karqan, nispa.

²⁸Chaymi kamachi-masinkunata nirqan: Qechuychis chay bolsa qolqeta, hinaspa chunka bolsa qolqeyoqman qoychis.

²⁹Pipas kaqniyoqmanqa qosqan kanqa, hinaspanmi aswantaraq kapunqapas, mana kaqniyoqmantataqmi ima kaqnillanpas qechusqa kanqa.

³⁰Chay mana serviq kamachitaqa hawa laqhayaqman wikch'uychis, chaypin waqaypas kiru k'achachachaypas kanqa, nispa.

³¹Jesusqa nillarqantaqmi: —Diospa Kachamusqan Runa llapa angelniykunapiwan lliphlli-kayniypi hamuspaymi ancha hatun atiywan kamachikunaypaq tiyaykusaq.

³²Hinan ñawpaqeyman llapa runa huñukamunqa. Chaymi paykunata t'aqasaq, imaynan michiqpas ovejakunata cabrakunamanta t'aqan hinata.

³³Ovejakunatan paña ladoyman t'aqasaq, cabrakunatataq lloq'e ladoyman.

³⁴Hinaspan ñoqaqa rey kaspay paña ladoypi kaqkunata nisaq: Yayaymi qankunata samincharqasunkichis, chayrayku hamuychis, hinan payqa kamachiqniykichis kaspa saminchakunata qosunkichis. Chaykunatan Diosqa kay pacha kamasqamantapacha qankunapaq wakichirqan.

³⁵Yarqawaqtinmi mikhuchiwarqankichis, ch'akiwaqtinmi ukyachiwarqankichis, wak llaqtayoq kaqtiymi qorpachawarqankichis,

³⁶mana p'achayoq kaqtiymi p'achachiwarqankichis, onqoqtiymi watukamuwarqankichis, carcelpi kaqtiymi hamuwarqankichis, nispa.

³⁷Hinaqtinmi chanin runakunaqa niwanqaku: Señorníy, ¿hayk'aqtaq yarqasqata rikushaspa mikhuchirqaykiku? ¿Ch'akisqata rikushaspapas ukyachirqaykiku?

³⁸¿Hayk'aqtaq wak llaqtayoqta rikushaspapas qorpacharqaykiku? ¿Mana p'achayoqta rikushaspapas p'achachirqaykiku?

³⁹¿Hayk'aqtaq onqosqatapas, carcelpi kashaqtapas rikushaspa watukamurqaykiku? nispanku.

⁴⁰Chaymi ñoqa Reyqa nisaq: Cheqaqtan niykichis, kay pisipaq hap'isqa wawqeykunamanta hukkaqninpaq ruwaspaykichisqa ñoqapaqmi ruwarqankichis, nispa.

⁴¹Lloq'e ladoypi kaqkunatataq nisaq: Qankunaqa ñakasqakunan kankichis, anchhuriychis qayllaymanta supaypaqwan angelninkunapaqwan wakichisqa wiñay nina rawrayman.

⁴²Yarqawaqtinmi mana mikhuchiwarqankichischu, ch'akiwaqtinmi mana ukyachiwarqankichischu,

⁴³wak llaqtayoq kaqtiymi mana qorpachawarqankichischu, mana p'achayoq kaqtiymi, mana p'achachiwarqankichischu, onqoqtiymi carcelpi kaqtiymi mana watukamuwarqankichischu, nispa.

⁴⁴Hinaqtinmi paykunapas niwanqaku: Señor, ¿hayk'aqtaq rikurqaykiku yarqasqatapas, ch'akisqatapas, wak llaqtayoqtapas, mana p'achayoqtapas, onqosqatapas, carcelpipas hinaspa mana servirqaykikuchu? nispanku.

⁴⁵Chaymi paykunata nisaq: Cheqaqtan niykichis, kay pisipaq hap'isqakunamanta hukkaqninpaq mana ruwaspaykichisqa, ñoqapaqpas manallataqmi ruwarqankichischu, nispa.

⁴⁶Chaymi paykunaqa wiñay ñak'ariyman rinqaku, chanin runakunataq wiñay kawsayman rinqaku, nispa.