Read Quechua Cuzco Bible 1988 MATEO 26 Bible Online

MATEO 26 - Quechua Cuzco Bible 1988 bible

MATEO 26

¹Jesusqa tukuy chaykunata rimayta tukuspan yachachisqankunata nirqan:

²—Yachankichismi iskay p'unchaymanta Diospa Alqaspa Pasarparisqan Yuyarina Fiesta kananta. Chaypin Diospa Kachamusqan Runata kamachikuqkunaman hap'ichiwaspanku chakatawanqaku, nispa.

³Chaypachan sacerdote umallikuna, Judío kurak runakunapiwan huñukurqanku uma sacerdote Caifaspa wasi pationpi,

⁴hinaspan rimanakurqanku q'otullawan Jesusta hap'ispa wañuchinankupaq.

⁵Ichaqa nirqanku: —Ama fiesta p'unchaypiqa hap'isunchu, runakuna ama ch'aqwananpaq, nispanku.

⁶Betania llaqtachapi aycha qaranpi millay onqoyniyoq nisqa Simonpa wasinpi Jesús kashaspa,

⁷mikhunanpaq tiyashaqtinmi huk warmi hamurqan yuraq rumi p'uyñuchapi ancha chaniyoq q'apaq hawina apantin. Hinaspan Jesuspa umanman hich'aykurqan.

⁸Yachachisqankunataq chayta rikuspa phiñakurqanku: — ¿Imapaqmi kaytaqa usuchin?

⁹Kaytaqa askha qolqeman vendespan wakchakunata yanapasunman karqan, nispa.

¹⁰Jesustaq chayta yachaspa paykunata nirqan: — ¿Imanaqtinmi kay warmi contra rimankichis? Payqa ñoqapaqmi allinta ruwashan.

¹¹Wakchakunaqa qankunawanpunin kashanqa, ñoqan ichaqa mana tukuy tiempochu qankunawan kashasaq.

¹²Kay q'apaq hawinata cuerpoyman hich'aykuwaspaqa p'ampasqa kanaypaqmi wakichipushawan.

¹³Cheqaqtan niykichis, maypipas Diosmanta allin willakuykuna kay pachantinpi willasqa kasqanpin kay warmiq ruwasqanpas willasqallataq kanqa payta yuyarinapaq, nispa.

¹⁴Hinaqtinmi chunka iskayniyoq yachachisqankunamanta huknin Judas Iscariote sutiyoqqa sacerdote umallikunaman rirqan.

¹⁵Hinaspan paykunata nirqan: —¿Imatataq qowankichisman Jesusta qankunaman hap'ichiqtiy? nispa. Hinan paykunaqa kinsa chunka qolqeta Judas Iscarioteman qorqanku.

¹⁶Chaymantapachataq imaynatachus Jesusta hap'ichinanpaq yuyaykurqan.

¹⁷Mana qonchuyoq t'anta mikhunanku fiesta qallariy p'unchaypitaq yachachisqankunaqa Jesusman asuykuspa tapurqanku: —Diospa Alqaspa Pasarparisqan Yuyarina mikhunata mikhunanchispaqqa, ¿maypin wakichimunaykuta munanki? nispa.

¹⁸Jesustaq nirqan: —Llaqtata riychis nisqay runaqta, hinaspa nimuychis: Yachachikuqmi nin: Wañuchiwananku tiempon qayllaykamunña, wasiykipin yachachisqaykunawan Diospa Alqaspa Pasarparisqan Yuyarina mikhunata mikhusaq, nispa.

¹⁹Hinan yachachisqankunaqa Jesuspa kamachisqanta hina ruwarqanku, hinaspan chay mikhunata wakichirqanku.

²⁰Tutayaykuqtintaq Jesusqa chunka iskayniyoq yachachisqankunawan mikhuq tiyaykurqan.

²¹Paykuna mikhushaqtinkutaq Jesusqa nirqan: —Cheqaqtan niykichis, hukniykichismi ñoqata hap'ichiwanqa, nispa.

²²Hinan paykunaqa sapankanku sinchi llakisqa tapuyta qallarirqanku: —Señor, ¿ñoqachu kani? nispa.

²³Hinaqtinmi Jesusqa nirqan: —Pichus ñoqawan kuska puruñaman makinta challpuqmi ñoqata hap'ichiwanqa.

²⁴Diospa Kachamusqan Runaqa wañusaq Diospa Simin Qelqapi ñoqamanta nisqanman hinan. Ichaqa, ¡ay ñoqata hap'ichiwaqniy runamanta! Allinmi kanman karqan chay runapaqqa mana naceynin, nispa.

²⁵Chaymi payta hap'ichiq Judasqa tapuykurqan: — Yachachikuq, ¿icha ñoqachu kani? nispa. Jesustaq nirqan: —Arí, qanmi kanki, nispa.

²⁶Paykuna mikhushaqtintaq Jesusqa t'antata hap'iykuspa Diosman graciasta qospa phasmirqan, hinaspan yachachisqankunaman qorqan: —Hap'iychis, mikhuychis, kayqa cuerpoymi, nispa.

²⁷Vinoyoq vasotapas hap'illarqantaq, hinaspan Diosman graciasta qospa paykunaman qorqan: —Llapaykichis kay vasomanta ukyaychis,

²⁸kayqa Diospa rimanakuyninta cheqaqchaq yawarniymi, askha runaq huchankuna pampachasqa kananpaqmi yawarniyta hich'asaq, nispa.

²⁹Niykichismi, kunanmantaqa manañan kay uvas vinotaqa ukyasaqchu, aswanpas Yayallayña kamachikuq kashasqan p'unchayñan mosoq vinotaqa qankunawan ukyasaq, nispa.

³⁰Himnota takispankuñataq Olivos orqoman rirqanku.

³¹Chaypin Jesusqa yachachisqankunata nirqan: — Llapallaykichismi kunan tuta ñoqata saqerpariwankichis. Diospa Simin Qelqan nin: Diosmi michiqta k'irinqa, ovejakunataq ch'eqeripunqaku, nispa.

³²Kawsarimpusqay qhepatan ichaqa, ñawpaqeykichista Galilea provinciaman risaq, nispa.

³³Chaymi Pedroqa payta nirqan: —Llapaña saqerparisunki chaypas, manan ñoqaqa hayk'aqpas saqesqaykichu, nispa.

³⁴Hinan Jesusqa Pedrota nirqan: —Cheqaqtan niyki, kunan tutan manaraq gallo waqashaqtin, kinsa kutita “manan Jesustaqa reqsinichu” ninki, nispa.

³⁵Pedrotaq payta nirqan: —Qanwan kuska wañunay kanman chaypas, manapunin “manan Jesustaqa reqsinichu” nisaqchu, nispa. Chay hinallatataqmi llapan yachachisqankunapas nirqanku.

³⁶Jesusmi Getsemaní huertaman chayaspan yachachisqankunata nirqan: —Kaypi tiyashaychis Diosmanta haqaypi mañakamunaykama, nispa.

³⁷Hinaspan Jesusqa Pedrota, Zebedeoq iskaynin churintawan pusaspa anchatapuni llakikuspa

³⁸paykunata nirqan: —Llakikuymantan sonqoy phatarqoq hinallaña kashan. Kayllapi kashaychis, rikch'aysiwaychis, nispa.

³⁹Asllata ñawpaqman rispataq, pampakama k'umuykukuspa Diosmanta mañakurqan: —Yayáy, atikuqtinqa kay ñak'arinata ñoqamanta anchhurichiy, ichaqa ama ñoqaq munasqaychu kachun, aswanpas qanpa munasqayki kachun, nispa.

⁴⁰Yachachisqankunaman kutispataq puñushaqta paykunata tarirqan, hinaspan Pedrota nirqan: —¿Manachu huk horallatapas rikch'aysiwayta atirqankichis?

⁴¹Rikch'ashaychis, Diosmanta mañakuychis, ama wateqasqa kanaykichispaq. Sonqoqa munallanpunin, aycha cuerpon ichaqa pisi kallpa, nispa.

⁴²Iskay kutipi rispataq Jesusqa huktawan Diosmanta mañakurqan: —Yayáy, ñak'arinaypuni kaqtinqa, munayniyki ruwasqa kachun, nispa.

⁴³Kutimuspataq yachachisqankunata puñushaqllatataq tarirqan, paykunataqa misk'i puñuymi aysasharqan.

⁴⁴Paykunata saqespataq kinsa kutita rispa Diosmanta mañakurqan chay kikin simikunallawantaq.

⁴⁵Hinaspan yachachisqankunaman kutispa nirqan: — ¿Puñushankichisraqchu? ¿Samashankichisraqchu? Horan chayamunña. Diospa Kachamusqan Runan huchasapakunaman hap'ichisqa kasaq.

⁴⁶Hatariychis, haku, hap'ichiwaqniymi chayamunña, nispa.

⁴⁷Jesús rimashallaqtinraqmi Judasqa hamurqan, paymi chunka iskayniyoq yachachisqankunamanta huknin karqan. Judaswanmi espadakunantin k'aspikunantin askha runakuna hamurqanku, chaykunatan sacerdote umallikuna Judío kurak runakunapiwan kachamurqanku.

⁴⁸Hap'ichiqnin Judastaq paykunata yachaykachispa nimusqa: Pitachus ñoqa much'aykusaq, chaytan hap'inkichis, nispa.

⁴⁹Jesusman asuykurqospataq: —Yachachiqníy, ¿imaynallan kashanki? nispa, Jesusta much'aykurqan.

⁵⁰Chaymi Jesusqa Judasta nirqan: —Amigo, ¿imamanmi hamushanki? nispa. Hinaqtinmi Jesustaqa presota hap'irqanku.

⁵¹Chayllamanmi Jesuspa huknin yachachisqanqa espadanta horqokurqan, hinaspan uma sacerdoteq kamachinta waqtaspa ninrinta qhorurqorqan.

⁵²Chaymi Jesusqa nirqan: —Espadaykita waqaychay churananman, espadawan maqanakuqkunaqa espadawan wañuchisqallataqmi kanqaku.

⁵³Munaspayqa Yayaymantan mañakuyman, hinan payqa kunanpacha waranqa-waranqa angelkunata kachamuwanman. ¿Manachu chayta yachanki?

⁵⁴Chay hinata ruwaqtiyqa, ¿imaynatataq chay hinapuni kanan kaq Diospa Simin Qelqaqa hunt'akunman? nispa.

⁵⁵Chay raton Jesusqa runakunata nirqan: —¿Suwaman hinachu hamurqankichis espadakunantin k'aspikunantin hap'iwanaykichispaq? Sapa p'unchaymi qankunawan kasharqani Dios yupaychana wasipi yachachispay, manataqmi hap'iwarqankichischu.

⁵⁶Aswanpas kaykunaqa profetakunaq*f** qelqasqankuna hunt'akunanpaqmi suceden, nispa. Chay raton llapan yachachisqankunaqa sapallanta Jesusta saqerparispa ayqerqanku.

⁵⁷Hap'iqninkunataq Jesustaqa uma sacerdote Caifasman aparqanku, chaypin kamachikuy simita yachachiqkuna kurak runakunapiwan huñunasqa kasharqanku.

⁵⁸Pedrotaq ichaqa Jesuspa karu qhepanta rirqan uma sacerdoteq pationkama. Ukhuman haykuspataq Dios yupaychana wasi guardiakunawan tiyasharqan imaynapichus chaykuna tukukunanta yachananpaq.

⁵⁹Sacerdote umallikunan uma runakunaq huñunakuyninpi kaqkunapiwan Jesús contra llulla testigota maskharqanku payta wañuchinankupaq.

⁶⁰Ichaqa manan ch'ullallatapas tarirqankuchu, askhaña llulla testigokuna hamushaqtinpas. Qhepatan ichaqa iskay llulla testigokuna hamuspa

⁶¹nirqanku: —Kay runaqa nirqanmi: Dios yupaychana wasitan thuniyman, kinsa p'unchaypitaq sayarichiyman, nispan, nispa.

⁶²Chaymi uma sacerdoteqa sayarispa Jesusta nirqan: — ¿Manachu imatapas kutichikunki? Chay rimasqankuqa, ¿hinapunichu? nispa.

⁶³Jesustaq ichaqa ch'inlla kakurqan. Uma sacerdotetaq payta nirqan: —Kawsaq Diospa sutinpin kamachiyki, sut'inta rimariy: ¿Qanchu Diospa Churin Cristoqa kanki? nispa.

⁶⁴Jesustaq payta nirqan: —Arí, nisqayki hinan. Chaywanpas niykichismi, pisi tiempomantan Diospa Kachamusqan Runata rikuwankichis atiyniyoq Diospa paña ladonpi tiyashaqta, hanaq pacha phuyupi hamushaqtawan, nispa.

⁶⁵Hinaqtinmi uma sacerdoteqa phiñakuymanta p'achanta llik'ikuspa nirqan: —Kay runaqa Dios contran riman. ¿Imapaqñataq testigokunata astawan munasunchis? ¡Uyarishankichismi Dios contra rimasqanta!

⁶⁶¿Ima ninkichistaq? nispa. Paykunataq nirqanku: —¡Huchallikunmi, wañuchun! nispanku.

⁶⁷Hinaspanmi uyanpi thoqaykurqanku, ch'aqlarqanku, hukkunataq saqmaspa nirqanku:

⁶⁸—Yaw Cristo, willawayku pichus ch'aqlashasunki chayta, nispanku.

⁶⁹Chaykamataq Pedroqa hawa patiopi tiyasharqan. Chayllamanmi huk warmi kamachi payman asuykuspa nirqan: — Qanpas Galilea provinciamanta Jesuswanmi kasharqanki riki, nispa.

⁷⁰Pedrotaq lliwpa ñawpaqenpi mananchakurqan: —Manan yachanichu, imatachá rimakushankipas, nispa.

⁷¹Pedro punkuman lloqsishaqtintaq huk warmi kamachipas payta rikurqan, hinaspan chaypi kaqkunata nirqan: —Kay runaqa Nazaret llaqtamanta Jesuswanmi kasharqan, nispa.

⁷²Pedrotaq juraspa huktawan mananchakurqan: —¡Manan chay runataqa reqsinichu! nispa.

⁷³Chhikan qhepatataq chaypi kaqkunaqa asuykuspa Pedrota nirqanku: —Qanpas paykuna t'aqamantapunin kanki, rimayniykipas sut'in rikch'akushan, nispa.

⁷⁴Hinan Pedroqa pay kikinta ñakakusparaq jurarqan: — Manapunin chay runataqa reqsinichu, nispa. Chayllamanmi galloqa waqarqan.

⁷⁵Chaymi Pedroqa Jesuspa payman: —Manaraq gallo waqashaqtinmi kinsa kutita “manan Jesustaqa reqsinichu, ninki” nisqanta yuyarirqan. Hinaspan Pedroqa hawaman lloqsispa khuyayta waqaykurqan.