Read Quechua Cuzco Bible 1988 MATEO 27 Bible Online

MATEO 27 - Quechua Cuzco Bible 1988 bible

MATEO 27

¹P'unchayamuqtintaq llapan sacerdote umallikuna Judío kurak runakunapiwan Jesús contra rimanakurqanku wañuchinankupaq,

²hinaspan watasqata apaspa kamachikuq Pilatoman saqemurqanku.

³Hap'ichiqnin Judastaq, Jesusqa wañuchinapaq huchachasqaña kasqanta yachaspa, ñakapakuspa apapurqan chay kinsa chunka qolqeta sacerdote umallikunaman kurak runakunamanwan.

⁴Paykunatan nirqan: —Huchallikunin mana huchayoq runata qankunaman hap'ichispay, nispa. Paykunataq ichaqa nirqanku: —¿Imataq ñoqaykumanri qokuwanku? ¡Qanchá chaytaqa yachakunki! nispanku.

⁵Hinan Judasqa qolqeta Dios yupaychana wasiman wikch'uykuspa lloqsipurqan. Rispataq seq'okamurqan.

⁶Sacerdote umallikunataq chay qolqeta hoqarispa nirqanku: —Manan chaninchu Dios yupaychana wasipi qolqe waqaychanaman churayqa, runa wañuchinapaq pagasqa qolqe kasqanrayku, nispa.

⁷Hinan rimanakuspaña chay qolqewan manka ruwaqpa hallp'anta rantirqanku, mana Judío runakuna wañuqtin chaypi p'ampanapaq.

⁸Chayraykun chay hallp'aqa kunan p'unchaykama Yawar Pampa nisqa.

⁹Ahinapin profeta*f** Jeremiaspa nisqan hunt'akurqan. Paymi nirqan: Israel wakin runakunan preciota churarqanku payta kinsa chunka qolqeman vendenapaq,

¹⁰hinaspan chay qolqewan manka ruwaqpa hallp'anta rantirqanku Señor Diospa kamachiwasqanman hina, nispa.

¹¹Jesustan kamachikuq Pilatoman aparqanku, hinan kamachikuqqa payta tapurqan: —¿Qanchu kanki Judío runakunaq Reynin? nispa. Jesustaq nirqan: —Arí, nisqayki hinan, nispa.

¹²Sacerdote umallikuna kurak runakunapiwan huchachaqtinmi Jesusqa mana imatapas kutichikurqanchu.

¹³Chaymi Pilatoqa Jesusta nirqan: —¿Manachu uyarinki qan contra lliw imaymana rimasqankuta? nispa.

¹⁴Jesustaq ichaqa mana huk simillatapas Pilatoman kutichirqanchu, hinan Pilatoqa sinchita muspharqan.

¹⁵Diospa Alqaspa Pasarparisqan Yuyarina Fiestapin kamachikuq Pilatoqa sapa wata huk presota kacharillaqpuni pitachus runakunaq mañakusqankuta.

¹⁶Chay p'unchaykunapin huk ancha reqsisqa Barrabás sutiyoq runa preso kasharqan.

¹⁷Llapa runakuna huñunasqa kashaqtinkun, Pilatoqa tapurqan: —¿Mayqentan munankichis kacharinayta? ¿Barrabastachu? Icha, ¿Cristo nisqa Jesustachu? nispa.

¹⁸Pilatoqa yacharqanmi envidiakuspa Jesusta hap'ichisqankuta.

¹⁹Juzganapi Pilato tiyashaqtinmi warminqa payman willachimurqan: —Chay chanin runataqa ama imanaypaschu, paymantan ch'isi tuta sinchi mancharikuyta mosqokuni, nispa.

²⁰Sacerdote umallikunan Judío kurak runakunapiwan runakunata tanqarqanku: Barrabasta kachariy, Jesustataq wañuchiy, nispa mañakunankupaq.

²¹Hinaqtinmi kamachikuq Pilatoqa runakunata tapurqan: — ¿Mayqentataq iskayninmanta kacharinayta munankichis? nispa. Paykunataq nirqanku: —¡Barrabasta kachariy! nispa.

²²Chaymi Pilatoqa tapurqan: —¿Imanasaqtaq Cristo nisqa Jesusta? nispa. Hinan llapanku payta nirqanku: —¡Paytaqa chakatay! nisqanku.

²³Chaymi Pilatoqa nirqan: —¿Ima mana allintataq ruwarqan? nispa. Paykunataq ichaqa sinchita qaparirqanku: —¡Paytaqa chakatay! nispanku.

²⁴Pilatoqa manan ima ruwaytapas atirqanchu. Sinchi ch'aqway qallarinanta reparaspataq unuta apachikamuspa runakuna qhawashaqtin makinta mayllikuspan nirqan: —Kay chanin runata wañuchisqaykichismantaqa mana huchayoqmi kasaq, qankunan huchayoqqa kankichis, nispa.

²⁵Chaymi llapan runakunaqa nirqanku: —Wañusqanmantaqa ñoqaykun mirayniykupiwan huchachasqa kasaqku, nispanku.

²⁶Chaymi Pilatoqa Barrabasta paykunapaq kacharirqan, Jesustataq suq'achispaña chakataspa wañuchinankupaq entregarqan.

²⁷Hinan Pilatoq soldadonkunaqa kamachikuna wasi patioman Jesusta apaykurqanku, hinaspan llapan soldadokunata Jesuspa qayllanman huñuykurqanku.

²⁸Hinaspan p'achanta ch'utispa sani-puka p'achawan churarqanku.

²⁹Khiskamanta simp'asqa coronawanmi umanman churarqanku, paña makinmantaq huk soqosta hap'ichirqanku, chaymantataq Jesuspa ñawpaqenpi qonqorikuspa asipayarqanku: —¡Kawsachun Judío runakunaq Reynin! nispanku.

³⁰Payman thoqaykuspankun Jesuspa hap'isqan soqosllawantaq umanpi waqtasharqanku.

³¹Payta asipayasqankumantaña sani-puka p'achata ch'utirqanku, hinaspan p'achanwan p'achaykachirqanku, hinamantataq chakatamunankupaq aparqanku.

³²Llaqtamanta lloqsishaspankutaq soldadokunaqa Cirene llaqtayoq Simón sutiyoq runawan tuparqanku, paytan kamachirqanku Jesuspa cruzninta apananpaq.

³³Jesustaqa Gólgota nisqa patamanmi aparqanku. (Golgotaqa “Calavera pata” ninantan nin).

³⁴Chaymi Jesusman hayaqeyoq vino chhaqrusqata qorqanku. Malliykuspataq mana ukyayta munarqanchu.

³⁵Jesusta chakataspañataq p'achanta rakinakunankupaq sortearqanku.

³⁶Hinaspan chaypi tiyaykuspa Jesusta cuidarqanku.

³⁷Cruzpa umanpitaq huchachasqa kayninta qelqarqanku: Judío runakunaq Reynin Jesús, nisqata.

³⁸Jesustaqa iskay suwakunatawanmi chakatarqanku, hukninta pañanpi, huknintataq lloq'enpi.

³⁹Chayninta puriqkunataq umankuta maywirikuspa Jesusta k'amirqanku:

⁴⁰—¡Yaw! Dios yupaychana wasita thunispa kinsa p'unchaypi sayarichiyta munaq, qan kikiykitayá qespikuy. Diospa Churinchus kanki chayqa, cruzmanta uraykamuy, nispa.

⁴¹Chay hinallataqmi sacerdote umallikunapas kamachikuy simita yachachiqkunapas fariseokunapiwan*f** kurak runakunapiwan asipayaspa nirqanku:

⁴²—Hukkunatan qespichirqan, pay kikintataq mana qespichikuyta atinchu. Israelpa Reynin kaspaqa, ¡cruzmanta kunan uraykamuchun, paypi iñinanchispaq!

⁴³Diosmanmi hap'ipakun, “Diospa Churinmi kani” ninmi, chhaynaqa, librachunyá, nispanku.

⁴⁴Chay hinallatataq Jesusta k'amirqanku paywan kuska chakatasqa suwakunapas.

⁴⁵Chawpi p'unchaymanta las tres horaskaman kay pachantinpi laqhayaykurqan.

⁴⁶Las tres horasta hinan Jesusqa kunkayoqta waqyakurqan: — ¡Elí! ¡Elí! ¿Lama sabactani? nispa. Chayta nispaqa: ¡Diosníy, Diosníy! ¿Imanaqtintaq saqerpariwanki? ninantan nin.

⁴⁷Chaymi wakin chaypi kaqkuna chayta uyarispa: —Payqa profeta*f** Eliastan waqyakushan, nirqanku.

⁴⁸Hukninkutaq phawarispa esponjata soqosman wataykuspa vinagreman challpuykurqan, hinaspan ch'onqananpaq haywarqan.

⁴⁹Wakintaq nirqanku: —Suyaychis, rikusunchis Elías hamunqachus payta kacharichiq chayta, nispa.

⁵⁰Jesustaq ichaqa, huktawan kunkayoqta waqyakuspa wañukapurqan.

⁵¹Hinaqtinmi Dios yupaychana wasipi cortinaqa iskayman llik'ikurqan, wichaymanta urayman. Hallp'apas khatatatarqan, qaqakunapas ch'eqtakurqan.

⁵²Aya p'ampanakunapas kicharikuqtinmi Diospi iñiq wañukapuqkunapas kawsarimpurqanku,

⁵³hinaspan aya p'ampanakunamanta lloqsimuspa, Jesuspa kawsarimpusqan qhepata Jerusalén llaqtaman haykurqanku, chaypitaq askha runakunaman rikhurirqanku.

⁵⁴Roma soldado capitantaq soldadonkunapiwan Jesusta cuidasharqanku. Pacha chhaphchiyta imakunachus sucedesqantawan rikuspa sinchitapuni mancharikurqan, hinaspan nirqanku: —Cheqaqtapunin kay runaqa Diospa Churin kasqa, nispanku.

⁵⁵Chaypitaqmi askha warmikuna kasharqanku karullamanta qhawaspa. Chay warmikunan Galilea provinciamantapacha Jesuspa qhepanta hamurqanku payta servispanku.

⁵⁶Chay warmikunawantaq kasharqanku Magdalá llaqtayoq María, Jacoboq Josepa maman María, Zebedeoq warminpas.

⁵⁷Ch'isiña kaqtintaq Arimatea llaqtayoq qhapaq runa José sutiyoq hamurqan, paypas Jesuspi iñiqllataqmi karqan.

⁵⁸Josemi Pilatoman rispa Jesuspa cuerponta mañakurqan. Hinaqtinmi Pilatoqa payman cuerponta qonapaq kamachikurqan.

⁵⁹Chaymi Joseqa Jesuspa cuerponta apaspa sumaq lino telawan p'istuykurqan,

⁶⁰hinaspan qaqapi chayllaraq t'oqochikusqan aya p'ampanaman wantuykurqan. Hatun rumiwan aya p'ampana punkuta wisq'aykuspataq ripurqan.

⁶¹Chaypin Magdalá llaqtayoq María, huknin Mariapiwan aya p'ampanaq ñawpaqenpi tiyasharqanku.

⁶²Qhepantin p'unchaytaq, samana p'unchaypi, sacerdote umallikuna fariseokunapiwan*f** Pilatoman rispanku

⁶³nirqanku: —Wiraqochayku, chay pantachiqqa kawsashaspanraqmi nirqan: Kinsa p'unchaymantan kawsarimpusaq, nispa.

⁶⁴Kamachiypuni kinsa p'unchaykama aya p'ampanata qhawamunankupaq, yachachisqankuna tuta hamuspa ama suwarqonankupaq, hinaspataq runakunata ninkuman: Wañusqanmantan kawsarimpun, nispa. Chay hinapin qhepakaq llulla yachachikuyqa ñawpaqmantapas aswan mana allinraq kanman, nispa.

⁶⁵Chaymi Pilatoqa paykunata nirqan: —Guardiakunata pusaspa makillapuni paykunawan cuidachimuychis, nispa.

⁶⁶Sacerdote umallikunataq fariseokunapiwan*f** rispa aya p'ampana wisq'aq rumiwan wisq'aykuspa tuyruykurqanku, hinaspan chaypi soldadokunata cuidananpaq saqeykurqanku.