Read Quechua Cuzco Bible 1988 MATEO 28 Bible Online

MATEO 28 - Quechua Cuzco Bible 1988 bible

MATEO 28

¹Samana p'unchay tukukapuqtintaq, semana qallariy p'unchay illarimuyta Magdalá llaqtayoq María hukkaq Mariapiwan aya p'ampanata qhawamuq rirqanku.

²Hinan qonqaylla manchay pacha chhaphchiy karqan. Señor Diospa angelninmi hanaq pachamanta uraykamurqan, hinaspan asuykuspa rumita tanqaqarqan, chay patapitaq tiyasharqan.

³Angelpa rikch'ayninmi lliphllikiq hina karqan, p'achanpas rit'i hina yuraq karqan.

⁴Hinan payta manchakuspa, cuidaq soldadokunaqa khatatatarqanku, hinaspan wañusqa hina kumpakurqanku.

⁵Warmikunatataq angelqa nirqan: —Ama qankunaqa mancharikuychischu. Chakatasqanku Jesustan maskhashankichis riki.

⁶Payqa manan kaypiñachu, nisqanman hinan kawsarimpun. Qhawaykuychis Señor Jesusta churasqanku cheqasta.

⁷Chhaynaqa usqhayta rispa yachachisqankunaman willamuychis: Jesusmi wañusqanmanta kawsarimpun. Ñawpaqeykichistan Galilea provinciaman rinqa, chaypin paywan tupankichis, nispa. Chaytan willaykichis, nispa.

⁸Chaymi warmikunaqa manchakuspankupas ancha kusisqa aya p'ampanamanta phawaylla rirqanku yachachisqankunaman willamuq. Yachachisqankunaman willamuq rishaqtinkutaq,

⁹Jesusqa paykunaman rikhurispa napaykurqan. Chaymi paykunaqa asuykuspa, Jesusta chakinmanta oqllaykuspa yupaycharqanku.

¹⁰Hinaqtinmi Jesusqa paykunata nirqan: —Ama mancharikuychischu, riychis, wawqeykunaman willamuychis Galileaman rinankupaq, chaypin rikumuwanqaku, nispa.

¹¹Warmikuna rishanankukamataq wakin soldadokunaqa llaqtata rirqanku, hinaspan sacerdote umallikunaman willamurqanku tukuy imakunachus sucedesqanta.

¹²Hinan sacerdote umallikunaqa Judío kurak runakunapiwan rimanakurqanku, hinaspan soldadokunaman askha qolqeta lluk'iykuspa

¹³yachachirqanku: Puñushanaykukaman yachachisqankuna tuta hamuspa Jesuspa cuerponta suwarqowasqaku, nispa ninankupaq.

¹⁴Nillarqankutaq: —Kamachikuq Pilato chayta yacharqoqtinqa ñoqayku qankunamanta rimarisaqku mana imapas sucedenasuykichispaq.

¹⁵Chaymi soldadokunaqa qolqeta chaskikuspa yachachisqa kasqankuman hina ruwarqanku. Ahinatan Judío runakunaqa chay hinallatapuni kunan p'unchaykama rimashanku.

¹⁶Chaymi Jesuspa chunka hukniyoq yachachisqankunaqa Galilea provinciaman rirqanku, Jesuspa paykunata rinankupaq kamachisqan orqoman.

¹⁷Hinan chaypi Jesusta rikuspa yupaycharqanku, wakintaq ichaqa iskayrayarqanku.

¹⁸Chaymi Jesusqa paykunaman asuykuspa nirqan: —Diosmi qowarqan tukuy atiyta hanaq pachapipas kay pachapipas.

¹⁹Chayrayku riychis, hinaspa llapa suyu runakunata yachachimuychis, ñoqapi iñispa serviwanankupaq, hinaspa Yayaq, Churiq, Santo Espirituq sutinpi paykunata bautizamuychis.

²⁰Qankunaman lliw kamachisqaykunata paykunaman yachachimuychis kasukunankupaq. Ñoqaqa qankunawanmi sapa p'unchay kashasaq kay tiempoq p'uchukanankama, nispa.