Read Quechua Cuzco Bible 1988 MATEO 3 Bible Online

MATEO 3 - Quechua Cuzco Bible 1988 bible

MATEO 3

¹Chay p'unchaykunapin Bautizaq Juanqa hamuspa Judea ch'inneqpi kay hinata willarqan:

²—Huchaykichista saqepuspa Diosman kutirikuychis, kunanqa Diosñan kamachikunqa, nispa.

³Chay Juanmantan profeta*f** Isaiasqa nirqan: Ch'inneqpin huk kunka waqyakun: Señor Diospa ñanninta allichaychis, purinankunata cheqanyachiychis, nispan, nispa.

⁴Juanqa camello nisqa animalpa millmanmanta awasqa p'achawanmi p'achakurqan, qara chumpiwantaq chumpikurqan, mikhuqtaq langosta kuruta, wanqoyru misk'itawan.

⁵Runakunataq payman hamurqanku Jerusalén llaqtamanta, Judeamanta, Jordán mayuq qayllankunamantawan,

⁶hinaspan huchankuta willakuspa Jordán mayupi Juanwan bautizachikurqanku.

⁷Juanqa askha fariseokunata*f**, saduceokunatawan*f** bautizasqanman hamuqta rikuspan paykunata nirqan: —Yaw runakuna, mach'aqway hinan kankichis. ¿Pitaq willarqasunkuchis Diospa kachamunan ñak'ariymanta ayqenaykichista?

⁸Diosman kutirikuspaykichis kawsayniykichis t'ikrasqa kasqanta rikuchikuychis,

⁹amataq sonqoykichispi yuyaychischu: Abrahampa mirayninmi kayku, nispaykichisqa. Niykichismi, Diosqa atinmi kay rumikunamantapas Abrahampaq wawakunata sayarichiyta.

¹⁰Sach'a wit'uqqa wit'unan patapiñan kashan, chaymi tukuy mana allin ruruq sach'aqa wit'usqa kaspa ninaman wikch'uykusqa kanqa.

¹¹Ñoqaqa unuwanmi bautizaykichis Diosman kutirikusqaykichisrayku, qhepayta hamuqmi ichaqa ñoqamanta aswan atiyniyoq, manataqmi ñoqaqa usut'ankunallatapas apanaypaq hinachu kani, paymi bautizasunkichis Santo Espirituwanpas ninawanpas.

¹²Wayrachinantan hap'ishanña, erasqantataq allinta ch'uyanchanqa, hinaspan taqenman trigota waqaychanqa, pajantataq mana hayk'aq wañuq ninapi kananqa, nispa.

¹³Chaymantataq Jesusqa Galileamanta Jordán mayuman chayarqan, chaypi Juanpa bautizasqan kananpaq.

¹⁴Juantaq ichaqa mana bautizayta munaspa nirqan: —Ñoqa qanpa bautizasqayki kanay kashaqtinchu, ¿qanri ñoqaman hamuwanki? nispa.

¹⁵Chaymi Jesusqa nirqan: —Ama hark'awaychu, Diospa kamachikusqankunataqa llapantapunin hunt'ananchis, nispa. Hinan Juanqa payta bautizarqan.

¹⁶Jesusqa bautizachikuspaña unumanta lloqsimushaqtinmi hanaq pacha kicharikamurqan, hinan Jesusqa rikurqan pay pataman Diospa Espiritun urpi hina uraykamushaqta.

¹⁷Hanaq pachamantataq huk kunka nimurqan: —Kaymi munasqay Churiy, paymi anchata kusichiwan, nispa.