Read Quechua Cuzco Bible 1988 MATEO 4 Bible Online

MATEO 4 - Quechua Cuzco Bible 1988 bible

MATEO 4

¹Chaymantataq Diospa Espiritunqa ch'inneqman Jesusta pusarikurqan, payta saqra wateqananpaq.

²Tawa chunka p'unchayta, tawa chunka tutatawan ayunaspañataq yarqachikurqan.

³Satanastaq Jesusman asuykuspa nirqan: —Diospa Churinchus kanki chayqa, kay rumikunata niy t'antaman tukunanpaq, nispa.

⁴Jesustaq ichaqa nirqan: —Diospa Simin Qelqan nin: Manan t'antallawanchu runaqa kawsanqa, aswanpas Diospa llapa siminwanmi, nispan, nispa.

⁵Hinan saqraqa Jerusalén llaqtaman Jesusta pusarqan, hinaspan Dios yupaychana wasi pataman sayaykachispa

⁶payta nirqan: —Diospa Churinchus kanki chayqa, kay ukhuman saltaykuy, Diospa Simin Qelqan nin: Qanraykun angelninkunata kachamunqa, chaymi qanta makinkupi hap'isunkiku ama rumipi chakiykita takakunaykipaq, nispan, nispa.

⁷Jesustaq nirqan: —Diospa Simin Qelqaqa nillantaqmi: Aman Señor Diosniykita wateqankichu, nispan, nispa.

⁸Saqrataq wakmanta Jesusta pusarqan huk hatun orqo pataman, hinaspan kay pacha lliw hatun suyukunata lliw qhapaq-kayninkutawan qhawarichispa

⁹payta nirqan: —Qonqoriykukuspachus yupaychawanki chayqa, lliw kaykunatan qopusqayki, nispa.

¹⁰Hinaqtinmi Jesusqa nirqan: —Anchhuriy, Satanás, Diospa Simin Qelqan nin: Señor Diosniykitan yupaychanki, pay sapallantataqmi servinkipas, nispan, nispa.

¹¹Hinan saqraqa paymanta t'aqarikapurqan. Angelkunataq chayamuspa Jesusta servirqanku.

¹²Jesusmi Juanpa preso kasqanta uyarispa Galilea provinciaman kutipurqan.

¹³Nazaret llaqtamantan Zabulón ayllu hallp'a qorpapi qocha pata Capernaum llaqtaman tiyaq rirqan.

¹⁴Chay hinapi profeta*f** Isaiaspa nisqanta hunt'arqan. Paymi nirqan:

¹⁵Zabulón hallp'a, Neftalí hallp'a, mama qochaman riq ñan Jordán mayu inti lloqsimuy lado hallp'a, mana Judío runakunaq tiyanan Galilea hallp'a.

¹⁶Tutayaqpi purishaq llaqtan huk hatun k'anchayta rikurqan, manchay tutayaq pachapi tiyaq runakunatan huk k'anchay k'anchaykurqan, nispa.

¹⁷Chaymantapachan Jesusqa willayta qallarirqan: —Huchaykichista saqepuspa Diosman kutirikuychis, kunanqa Diosñan kamachikunqa, nispa.

¹⁸Galilea qocha patanta purishaspataq Jesusqa rikurqan iskay wawqeta, Pedro sutiyoq Simonta, wawqen Andrestawan. Paykunaqa challwaqkunan karqanku, chaymi challwa hap'inanku llikata qochaman wikch'uykusharqanku.

¹⁹Hinan paykunata nirqan: —Qhepayta hamuychis, runakunata Diosman pusamuytan yachachisqaykichis, nispa.

²⁰Chaymi paykunaqa llikankuta saqerparispa Jesuspa qhepanta ripurqanku.

²¹Chaymanta rishaspataq wak iskay wawqetawan rikurqan, Zebedeoq churinkunata Jacobota wawqen Juantawan. Paykunaqa taytankupiwanmi botepi llikankuta t'irisharqanku. Hinan paykunata waqyarqan.

²²Chaymi paykunaqa botenkuta taytankutawan saqerparispa Jesuspa qhepanta ripurqanku.

²³Jesustaq Galileantinta purirqan Diosmanta yachachina wasikunapi yachachispa, Diospa kamachikunanmanta allin willakuykunata willaspa, llapa onqoyniyoq, nanayniyoq runakunata qhaliyachispa.

²⁴Chaymi Siria provinciantinpi Jesusmanta uyarikurqan, hinan payman apamurqanku nanayniyoqkunatapas, imaymana niraq onqoypi ñak'ariqkunatapas, supaypa ñak'arichisqankunatapas t'uku onqoyniyoqkunatapas, such'ukunatapas, Jesustaq paykunataqa qhaliyachirqankama.

²⁵Askha runataq Jesuspa qhepanta purirqanku: Galileamanta, Decápolis nisqa chunkantin llaqtamanta, Jerusalenmanta, Judeamanta, Jordán mayu inti lloqsimuy ladomantawan.