Read Quechua Cuzco Bible 1988 MATEO 5 Bible Online

MATEO 5 - Quechua Cuzco Bible 1988 bible

MATEO 5

¹Runakunata rikuspanmi Jesusqa orqoman wicharqan. Chaypi tiyaykuqtintaq yachachisqankunaqa payman asuykurqanku.

²Paykunata yachachispataq nirqan:

³—Kusisamiyoqmi huch'uyyaykukuspa “Diostan necesitani” niqkunaqa, Diospuni kamachiqninkuqa kashasqanrayku.

⁴Kusisamiyoqmi llakisqa sonqoyoqkunaqa, paykunataqa Diosmi sonqochanqa.

⁵Kusisamiyoqmi llamp'u sonqoyoqkunaqa, paykunaqa kay pachatan herenciapaq chaskinqaku.

⁶Kusisamiyoqmi chaninkaqta ruwaytapuni munaqkunaqa, paykunaq yuyaykusqanqa hunt'akunqapunin.

⁷Kusisamiyoqmi khuyapayakuqkunaqa, paykunatapas Diosmi khuyapayallanqataq.

⁸Kusisamiyoqmi ch'uya sonqoyoqkunaqa, paykunan Diosta rikunqaku.

⁹Kusisamiyoqmi thak-kaypi kawsanapaq allipunachiqkunaqa, paykunatan Diosqa “wawaykunan” ninqa.

¹⁰Kusisamiyoqmi chaninkaqta ruwasqamanta qatiykachasqakunaqa, Diospuni kamachiqninkuqa kashasqanrayku.

¹¹Kusisamiyoqmi kankichis, ñoqarayku k'amisuqtiykichispas qatiykachasuqtiykichispas, hinallataq tukuy mana allinkunata llullakuspa qankunamanta rimaqtinkupas.

¹²Kusikuychis q'ochukuychis, hanaq pachapi premioykichisqa hatunmi, chay hinatapunin qankunamanta ñawpaq profetakunatapas*f** qatiykacharqanku, nispa.

¹³Jesusqa nillarqantaqmi: —Qankunan kay pachapi runakunapaq kachi kankichis, kachitaqchus q'aymayapunman chayri, ¿imawantaq kachiman tukunman? Manan imapaqpas allinñachu, aswanpas hawaman wikch'unallapaqñan, hinaspa runakunaq sarusqan kananpaq.

¹⁴Qankunan runakunapaq k'anchay kankichis, orqo patapi llaqtataqa manan imapas pakanmanchu.

¹⁵Lamparata hap'ichispaqa manan raki ukhumanchu churanku, aswanpas k'anchana patamanmi, wasipi kaqkunata llapanta k'anchananpaq.

¹⁶Chay hinata k'anchayniykichis runakunaq ñawpaqenpi k'anchachun, allin ruwasqaykichista rikuspa, hanaq pachapi kaq Yayaykichista yupaychanankupaq, nispa.

¹⁷Jesusqa nillarqantaqmi: —Ama yuyaychischu Diospa kamachikuynin simitapas profetakunaq*f** qelqasqantapas yanqayachinaypaq hamusqaytaqa, manan yanqayachinaypaqchu hamuni, aswanpas hunt'anaypaqmi.

¹⁸Cheqaqtan niykichis, hanaq pacha kay pacha tukukunankama, kamachikuy simimantaqa manan huk ch'iñillanpas huk seq'ellanpas chinkanqachu llapan hunt'akunankama.

¹⁹Pipas kay sinchi huch'uylla kamachikuymanta hukninta p'akispa, chay hinata runakunaman yachachiqtaqa, Diosmi kamachikushaspa sinchi pisipaq hap'inqa, pipas hunt'an hinaspa yachachiqtataqmi ichaqa Dios kamachikushaspa ancha allinpaq hap'inqa.

²⁰Niykichismi, manachus kawsayniykichis kamachikuy simita yachachiqkunaqmantapas fariseokunaqmantapas*f** aswan allin kanqa chayqa, manan Diospa kamachikushasqanpipas kankichischu, nispa.

²¹Jesusqa nillarqantaqmi: —Uyarirqankichismi ñawpa runakunaman: Aman pitapas wañuchinkichischu, pipas runata wañuchiqqa juzganapaqñan kanqa, nisqa kasqanta.

²²Ñoqataq ichaqa niykichis, pipas wawqenpaq phiñakuqqa juzganapaqñan kanqa, pipas wawqenta k'amiqqa juzganapi taripanapaqñan kanqa, pipas wawqenta “Supay apasunki” niqqa infierno ninapi juzqanapaqñan kanqa.

²³Chay hinaqa ofrendaykita Diospa altarninman apaspa, chaypi wawqeykiq qan contra imapas kasqanta yuyarispaykiqa,

²⁴altar qayllaman ofrendaykita saqeykuy, hinaspa kutiriy, wawqeykiwanraq ñawpaqtaqa allipunamuy, kutimuspaykitaq ofrendaykita hayway.

²⁵Awqaykichus gobernadorman apasunki chayqa, ñanta rishaspallaykiraq paywan allipunapuy, juezman hap'iykachisunki chayqa, juezqa alcaidemanñan hap'iykachisunkiman, hinaspataqmi carcelpi rikukuwaq.

²⁶Cheqaqtan niyki, chaymantaqa manan lloqsimunkichu llapallan manukusqaykita kutichipunaykikama, nispa.

²⁷Jesusqa nillarqantaqmi: —Uyarirqankichismi: Aman wasanchankichu, nisqa kasqanta.

²⁸Ñoqataq ichaqa niykichis, pipas huk warmita munapayaspa qhawaqqa ñan sonqonpi chay warmiwan wasanchay huchata ruwanña.

²⁹Chayrayku paña ñawiykichus huchaman urmachisunkiman chayqa, horqokuspa wikch'uy, aswan allinmi qanpaq huknin ñawiykiq chinkanan, llapan cuerpoykiq infiernoman wikch'uykusqa kananmantaqa.

³⁰Paña makiykitaqchus huchaman urmachisunkiman chayqa, kuchurqospa wikch'uy, aswan allinmi qanpaq huknin makiykiq wit'ukunan, llapan cuerpoykiq infiernoman wikch'uykusqa kananmantaqa, nispa.

³¹Jesusqa nillarqantaqmi: —Ñawpaqmantapachan nishallanku: Pipas warminta wikch'uqqa, t'aqanakuy qelqata qochun, nispa.

³²Ñoqataq ichaqa niykichis: Mana qhellipi purishaqtin warminta wikch'uqqa, warmintan wasanchayman tanqaykun. Pipas wikch'usqa warmiwan casarakuqtaq wasanchay huchata ruwan, nispa.

³³Jesusqa nillarqantaqmi: —Uyarillarqankichistaqmi ñawpa runakunaman: Aman llullakuspa jurankichu, aswanmi jurasqaykita Señor Diospaq hunt'anki, nisqa kasqanta.

³⁴Ñoqataqmi ichaqa niykichis: Amapunin jurankichu. Aman jurankichu hanaq pacharaykupas, Diospa kamachikuna tiyananmi chayqa.

³⁵Aman jurankichu kay pacharaykupas, Diospa chaki sarunanmi chayqa. Aman jurankichu Jerusalenraykupas, ancha hatun Reypa llaqtanmi chayqa.

³⁶Aman jurankichu umaykiraykupas, manan atiwaqchu huk chukchallatapas yuraqyachiytapas yanayachiytapas.

³⁷Aswanpas rimayniykichisqa kachun: “Arí” nisqaqa, “arí” nisqallapuni, “manan” nisqapas, “manan” nisqallapuni, chaykunamanta huk-hina niyqa saqraq yuyaychasqanmi, nispa.

³⁸Jesusqa nillarqantaqmi: —Uyarirqankichismi ñawpa runakunaman: Runamasinpa ñawinta horqoqpaqqa paypa ñawinpas horqosqallataq kanqa, kirun horqoqpaqpas paypa kirunmi horqosqallataq kanqa, nisqa kasqanta.

³⁹Ñoqataq ichaqa niykichis: Ama mana allin ruwaqniykichistaqa tupapakuychischu, aswanqa pipas paña uyaykipi ch'aqlasunki chayqa, lloq'e uyaykitapas kutirichiy.

⁴⁰Pipas pleiteaspa camisaykita qechuyta munaqmanqa ponchoykitawanpas qoykapuy.

⁴¹Pipas kuskan leguata riysinaykipaq pusachikuqniykitaqa, huk leguata riysiy.

⁴²Mañakuqniykimanqa qoy, qanmanta manukuyta munaqmanpas amataq “manan” niychu, nispa.

⁴³Jesusqa nillarqantaqmi: —uyarillarqankichistaqmi: Runamasiykitan munakunki, awqaykitataq cheqnikunki, nisqa kasqanta.

⁴⁴Ñoqataq ichaqa niykichis: Munakuychis awqaykichiskunata, [saminchaychis ñakaqniykichiskunata, allinta ruwapuychis cheqnikuqniykichiskunapaq,] mañapuychis k'amiqniykichiskunapaqpas qatiykachaqniykichiskunapaqpas.

⁴⁵Ahinapin hanaq pachapi kaq Yayaykichispa wawankuna kankichis, payqa intintan lloqsichimun allinkunapaqpas mana allinkunapaqpas, parachimullantaqmi chaninkunapaqpas mana chaninkunapaqpas.

⁴⁶Munakuqnillaykichista munakuwaqchis chayqa, ¿ima premioyoqtaq kawaqchis? ¿Manachu contribución sik'iqkunapas chay hinallatataq ruwanku?

⁴⁷Wawqeykichiskunallatachus napaykunkichis chayqa, ¿hukkunaq ruwasqanmantaqa astawanchu ruwashankichis? ¿Manachu Diospi mana iñiqkunapas chay hinallatataq ruwashanku?

⁴⁸Imaynan hanaq pachapi Taytaykichispas chaninpuni, chay hinallataq qankunapas chaninpuni kaychis, nispa.